Nebukadinejaar sɔbɩrɛ Jerujalɛmdara balaɲɔdaa
25
1 Sedesɩasɩ dor jamana a cʋʋna yɛna yʋɔr phe bire na sɩpora yʋɔr, wire yʋɔr. Sɩ ɲẽbe yʋɔr sɩporɩ wire yʋɔraalera Nebukadinejaarɩkɛ dɔnɩ Babɩlɔn jamana pɔr na ɔɔ sɔrasɩsɔ fɛw a jɛ Jerujalɛm ƴɛbʋrɔ wɩ kena Jerujalɛmdara kʋʋr. Dɩ wɩ pɛr koke nãcelesɔ a dii dɩɩra. 2 Wɩ sɔbɩrɛ dɩɩ foo a dana Sedesɩasɩɩ yɛna yʋɔr bɩɛl yɛraakɛ a cʋʋnɩ jamana dʋʋra. 3 Dɩ kɔmɛr kharɛ dɩɩra na sobɔr, dɩ dɩdara na n yɩ dikora'. Dɩ sɩporɩ wire yʋɔr phe birira, 4 Babɩlɔndara cure kaar dɩ bɛr gʋʋra. Dɩ Juda ko kena fɛw thɩɩrɛ dɩtɩnɔ na lõfonʋɔɔkɛ hanɩ gʋʋ yeɲɔɔ thɩ̃thɩɩn, kɛ hanɩ jamanaa nãkʋɔr khʋra a caalɛ, sɩrakɛ Babɩlɔn sɔrasɛ hale a kpala dɩɩra. Dɩ jamana gbaar hʋɛɛkɛ n jalanɩ Araba bə̃ faana a ca. 5 Sɩ Babɩlɔn sɔrasɛ weguure a kpaan fʋʋ Jeriko bə̃ faana, dɩ ɔɔ sɔrasɩsɔ fɛw caalɛ sa fagʋʋ. 6 Dɩ wɩ fʋrɛ Sedesɩasɩ jamana a jalna Babɩlɔn jamanaa pa Rɩbɩla dɩɩra, a kɩɩlnaa. 7 Dɩ wɩ kʋʋrɛ Sedesɩasɩɩ bikũusɔ ɔɔ ƴɛra. Agɩpɩ Babɩlɔn jamana pɛrɛ dɩ wɩ cɩɩrʋ yinə, sa lii na ther sɛ jɔrkɔ̃sɔ a jalna Babɩlɔn dɩɩra.Babɩlɔndara kʋɛrɛ Jerujalɛm dɩɩ
8 Nebukadinejaarɩ yɛna kpelẽ phe bire yɛraakɛ a cʋʋnɩ jamana dʋʋra Babɩlɔn dɩɩra, yɩɛrɩlee ɲẽbe yemɔy sɩporɩ wire makoɲɔra, ga wiile Nebujaradã lõ Jerujalɛm dɩɩra. Nebukadinejaarɩkɛ dɔnɩ Babɩlɔn jamana, ɔɔ thɔ̃daar gɩ, kɛ dɔnɩ bɛbɛraa kɔ̃tɩ̃. 9 Dɩ a thiire Thãgba Kɔ̃tɩnɩ cɔ, na jamanaa cɔ, na Jerujalɛm cɔna fɛw, a thiinə tɩɩ kɔ̃tɩnasɔɔ cɔsɔ fɛw. 10 Dɩ Babɩlɔn sɔrasɛ fɛʋʋkɛ hanɩ kha na bɛbɛraa kɔ̃tɩ̃ɩle wɩɛrɛ dɩ bɛr gʋʋkɛ diəni Jerujalɛm dɩɩra.
Balaɲɔ tɩbɩlaakɛ wɩ fʋlɛnɩ jalna Babɩlɔn dɩɩra
11 Nebujaradãakɛ dɔnɩ bɛbɛraa kɔ̃tɩ̃ fʋlɛlɛ tɩbɩlaakɛ kɔɔ sɛnɩ dɩɩra a jalna Babɩlɔn. A fʋlɛlɛ wɩrɛɛkɛ kɔɔ 'laanɛnɩ awɩbara a ha Babɩlɔn jamana, a fʋlɛna dɩda jɔjʋɔɔkɛ kɔɔ sɛnɩ. 12 Sɩ bɛbɛraa kɔ̃tɩ̃ɩle faarɛ tibil ɩkhasɔ wɩrɛraakɛ dʋɔnɩ bɔdara, wɩ tɔɔ le dɩɩra a na hɩnɛ dɩvɛ̃ thɩr lɩɛsɔ, a na kʋlɛna lɩɛsɔ.
13 Babɩlɔndara khaarɛ ther sɛ thɩrkaraakɛ kɔɔ hanɩle Thãgba Kɔ̃tɩnɩ cɔ lõfonɔra. Wɩ khaarɛ thɩ̃ tɔ hotoro yɩrasɔ, a cʋɔrna ther sɛ ɓalãgaakɛ wɩ n wenɩ laɲʋɔn, kɛ kɔɔ hanɩle Thãgba Kɔ̃tɩnɩ cɔ. Wɩ khɩɩrɛ ther sɛnaale a kɔna Babɩlɔn dɩɩra. 14 Wɩ khɩɩrɛ bʋlaasɔ, na pɛlsɔ, na khalasɔ, na bilẽsesɔ, na thɩ̃be fɛʋʋkɛ wɩ cʋʋnanɩ ther sɩɛ, kɛ wɩ n kɔɔ donanɩ thɔma Thãgbara. 15 Dɩ gardɛɛ kɔ̃tɩ̃ɩle khɩɩrɛ dakha dɔ ti bilẽse, na tɔmɩ̃ jɛbɩ gborminəsɔ, na thɩ̃be fɛʋʋkɛ wɩ cʋʋnanɩ dɛ, na gɩrɛ fɛʋʋkɛ wɩ cʋʋnanɩ dɛ bulo. 16 Ther sɛ thɩrkara yeɲɔ, na ther sɛ ɓalãga kɔ̃tɩ̃ɩkɛ wɩ n wenɩ laɲʋɔn, na ɔɔ hotoro yɩrasɔɔkɛ a dɛɛnɔnɩ kɛ Salomɔ̃ kɔɔ pɛrnɩ dɩ wɩ cʋʋ dɩɩ do Thãgba Kɔ̃tɩnɩ cɔda, na thɩ̃be fɛʋʋkɛ wɩ cʋʋnanɩ ther sɩɛ, kɛ tibil na punonɩ na ther na jɩ agɩ kilə nɔa'. 17 Thɩrkara yeɲɔɔle fɛw, agɩ ƴũu gbã mãkhananɛ mɛtɛrɛ yʋɔr phe biri. Wɩ cʋʋrɛ agɩ yʋ subidasɔ na ther sɩɛ, dɩ ƴũu gbãʋ mãkhana mɛtɛrɛ bɩɛl na dakuru. Thɩrka yʋ subidaasɔɔ bɔɩdasɔ hale a ho tɛmɛ̃, a hana girenadɩ sɩɩr dɩɩ diiro, kɛ wɩ cʋʋnanɩ ther sɩɛra dakha. Thɩrkara yeɲɔɔle fɛw na agɩ bɔɩdasɔ hor kha oti fɛw.
18 Bɛbɛraa kɔ̃tɩ̃ɩle fʋrɛ Serayaakɛ dɔnɩ gbõdaar, na Sofonɩɩkɛ dɔnɩ ɔɔ khukhu, a fʋlɛna Thãgba fʋɔr cɔ lõfonɔ bɛbɛra yẽtherɩkɛ hanɩ le. 19 Dɩ a fʋrɛ tɩɩ kɔ̃tɩ̃ bɩɛlɩkɛ dɔnɩ sɔrasɛɛ kɔ̃tɩ̃ le dɩɩra, a fʋlɛna kona yemɔy wɩrɛraakɛ dɔnɩ jamana khukhu bɩnɔsɔ, kɛ hanɩle dɩ bɩnɔ. A fʋrɛ dakha ʋrɛ dɔnɩ sɔrasɛɛ kɔ̃tɩ̃ɩ sɛbɛ kheredaar, kɛ n hɩnɛnɩ dʋɔdaraa sɔrasɩ gba thɩmɩɩ, a fʋlɛna kona kpalãther dʋɔdararaakɛ hanɩle dɩ bɩnɔ. 20 Nebujaradãakɛ dɔnɩ bɛbɛraa kɔ̃tɩ̃ fʋlɛ wɛr a jalna Babɩlɔn jamananaakɛ hanɩle Rɩbɩla dɩɩra. 21 Dɩ Babɩlɔn jamana kʋʋr wɛr le Rɩbɩla dɩɩra, Hamatɩ bəənnə. Thale wɩ fʋlɛ Judadara a jalna dɩ kpɩɩra, dɩ wɩ hʋnɔna awɩ dɩ.
Gedalɩaakɛ dɔnɩ Juda gobanɛɛrɩ thɩmɩ
22 Sɩ tɩbɩlaakɛ kɔɔ sɛnɩ Juda dɩɩra, kɛ dɔnɩ wɩrɛ Nebukadinejaar kɛ dɔnɩ Babɩlɔn jamana kɔɔ faanɩ dɩ wɩ too dɩɩra, a pɛ warɛ Ahɩkamɩ bikuun Gedalɩa dɩ do war gobanɛr; ɔɔ thɩ kɔ̃tɩ̃ɩ i n dʋɔn Safã.
23 Ɔbɔɔkɛ sɔrasɩ kɔ̃tɩnasɔ fɛw na awɩ sɔrasɩsɔ nɩɛnɩ Babɩlɔn jamana pɛrɛ Gedalɩa dɩ do gobanɛr, wɩ pɔr le ɔɔ pa Mɩsɩpa dɩɩra. Wɩrɛ jalanɩ dʋɔn: Netanɩaa bikuun Ɩsɩmayɛl na Kareyaa bikuun Yohana na Tanumɛtɩɩ bikuun Serayaakɛ thɛnɩ Netofa dɩɩra, na Yajanɩaakɛ ɔɔ thɩ thenɩ Maakatɩ dɩɩra. Wɛr jala na awɩ sɔrasɩsɔ. 24 Dɩ Gedalɩa ʋlfɛna wɛr na awɩ sɔrasɩsɔ ayɩ: «Na n do maar n fʋ nɩ Babɩlɔndarara ga. Nɩ tɔɔ dɩɩra, a na dɔ thɔma Babɩlɔn jamanana, puure na dã na'.» 25 Sɩ yɩɛrɩlee ɲẽbe makoɲɔ sɩpora, Netanɩaa bikuun Ɩsɩmayɛlɩkɛ dɔnɩ jamanaa məl, kɛ ɔɔ thɩ kɔ̃tɩ̃ɩ i n donɩ Elɩsama pɔnanɛ kona yʋɔr a kʋna Gedalɩa, a kʋʋrna Juifisɔ na Babɩlɔndaraakɛ kɔɔ hanɩ kha na Gedalɩa Mɩsɩpa dɩɩra. 26 Liir tɩbɩla fɛw: bɩsanasɔ na tɩɩ kɔ̃tɩnasɔ, na sɔrasɛɛ kɔ̃tɩ̃sɔ ɩɩr a jal Ejipiti, gɩdonɩ maar fʋlɛ wɛr Babɩlɔndarara.
Babɩlɔn jamana jɩrɛ Yehoyakɩn bʋɔra
27 Wɩ jalnanɛ Juda jamana Yehoyakɩn Babɩlɔn dɩɩra dɩɩ cʋʋ yɛna kpelẽ yʋɔr makoɲɔ, sɩ Evil-Merodakɩ gba jamana dʋʋr Babɩlɔn dɩɩra. Dɩ yɛna kpelẽ yʋɔr makoɲɔɔ sɩpora yʋɔr yeɲɔdaarɩ wire kpelẽ makoɲɔra, caca yɩɛraalera a donɩ jamana, a jɩrɛ Yehoyakɩnɩkɛ kɔɔ dɔnɩ Juda jamana bʋɔra, a khɛrʋ dɩ the khaɩra. 28 Dɩ a cʋgʋʋrɛ bɔɔ, a ɩɩrʋ dɩ jɔ jamana wɩrɛ hanaanɩ kha le Babɩlɔn dɩɩra. 29 A cʋʋrɛ dɩ wɩ debʋʋ khaɩ kẽkena, sɩ da n kho dikor na jamana wire fɛw, a dana ɔɔ yi pɩ wi. 30 Thale Babɩlɔn jamana n ha Yehoyakɩn thɩ̃ɛ wo thɩ̃ɛɛkɛ na n buloonɩ wire fɛw, a dana ɔɔ yi pɩ wi.