Suraꞌna Hi Paulu To Nopokatu
Pe ToSarani I Kota
Roma
Lolita to mampokononto ohina suraꞌ
Hampiha kota Roma iomo pahurahana poparenta kodatua Roma to mokuasaꞌi woriꞌ woiꞌ ntaniꞌna. Tungkaihana hi Paulu moꞌukiꞌ suraꞌ hieꞌe, mewali haꞌanu paguru to modumbuꞌ mpololeke pe tosarani i Roma noniuꞌ agama Sarani, alaꞌ hi Paulu handoaꞌi tene holangko nolou pe Roma ako mampaguruhi. Suraꞌ hieꞌe noꞌukiꞌ hi Paulu, kolentuꞌana matengkaꞌ mampowute Kareba Moromiꞌ ikotolu mpihana, ba io uwaꞌ i Korintus.
Poturuꞌ to paralu mpololeke teꞌukiꞌ i Rm. 1:17 to mantiꞌi waheꞌe: Ka Kareba Moromiꞌ, tobahaꞌ hohumbo lalane hingkeꞌna mohintuwuꞌki huliꞌ hante Pueꞌ Ala. Mohintuwuꞌki huliꞌ hante Pueꞌ Ala nokomi pepoꞌohinta pe Io. I lali suraꞌ hieꞌe, hi Paulu moꞌukiꞌ: lekiꞌ-lekiꞌna toaꞌ madosamo, moromiꞌ toYahudi, moromiꞌ to handoꞌio toYahudi. Ingkiꞌ hieꞌe masipatoꞌki mantorimo pehuku ka Pueꞌ Ala, nokomi komadosanta (3:9-19). Ala komarimana Pueꞌ Ala, Nohompoꞌki ka dosanta moliu ikomahina Pueꞌ Yesu (3:24-25, 5:8). Ane mepoꞌohiki pe hi Yesu, hingkiꞌ himpolohoꞌki ka pehuku dosanta, hei Norekeꞌki modame hante Pueꞌ Ala (3:22, 26, 4:24-25, 5:1).
I lali suraꞌ hieꞌe, hi Paulu mepoturuꞌ noniuꞌ tungkaihana Pueꞌ Ala pe toYahudi, to rotiꞌi woꞌo toSaraeli (9:1—11:32). Notiꞌi hi Paulu, hinewowoꞌena koworiꞌara toYahudi hawaꞌhi pahua kotehompoꞌ alaꞌ hawaꞌhi hiniꞌ mepoꞌohi pe hi Yesu (10:1-4). Alaꞌ kotara mengkoruꞌ horiana, tebungkahimo lala hingkeꞌna woriꞌ toaꞌ to handoꞌio toYahudi pahua kotuwuꞌ to wolaꞌ (11:11-15, 30-31). Kehapoꞌi watoꞌomo angkana nopoꞌohi hi Paulu, toSaraeli hingkiꞌ tehompoꞌhi ka pehuku dosara (11:26).
Koꞌukoana hi Paulu mopaguru tosarani to meꞌohaꞌ i kota Roma noniuꞌ i walia to masipatoꞌ i tosarani. Nopaguruhi hingkeꞌna mampokarimahi hangko awara (12:9-16, 13:8-14), mengkoruꞌhi pe topohawaꞌ (13:1-7), hei momeꞌadaꞌihi (14:1—15:13).