Koworiꞌara toYahudi hawaꞌhi mepoꞌohi pe hi Yesu
9
1-2 Lalingku masusa hei maporiꞌ mpololeke, alaꞌ hangko toSaraeliku hawaꞌhi hiniꞌ mepoꞌohi pe hi Yesu. Tuꞌu mpololeke to kutiꞌi tiꞌo, hawaꞌa mowuti, Kerisitu to pobahaꞌ lalingku, Inohaꞌ Mangkolehi to mololita i lalingku. 3 Aginamo aku to buntoꞌo hei nikaꞌa ka Kerisitu, ane podo hangko toSaraeliku salamaꞌhi. 4 Alaꞌ iomohi to Noꞌuwiꞌ Pueꞌ Ala hei Nopopewalihi anaꞌNa hadoduoNa. Pueꞌ Ala mampomombahakihi kuasaꞌNa hante komanobaꞌNa, hei alaꞌ dandiNa pe toYahudi hampiha, horiana uwaꞌ pohaꞌanuare hante Pueꞌ Ala. Nopaꞌanihi HawaꞌNa hei Nopoturuꞌhi lala mpenomba. Woriꞌ dandi to nopowute Pueꞌ Ala pe toSaraeli. 5 Iohi muleꞌna tododulunta hampiha to Noꞌuwiꞌ Pueꞌ Ala. Hei Datu Topohompoꞌ,a motuntuni konipoꞌanaꞌkiNa, Io woꞌo muleꞌna hi Saraeli.Makaja kuasaꞌne Kerisitu ka lekiꞌ-lekiꞌna.
Iomo Pueꞌ Ala to masipatoꞌ topokodeꞌ wute nantolou-louna. Ami!
Hawaꞌi lekiꞌ-lekiꞌna muleꞌna hi Burahima
6 Hawaꞌi lekiꞌ-lekiꞌna toaꞌ to i Saraeli mewali toaꞌna Pueꞌ Ala, angkana inioꞌ nipekiri dandina Pueꞌ Ala pe toSaraeli hawaꞌi tebuhoꞌi. 7 Alaꞌ i lumbura muleꞌna hi Burahima, hawaꞌi lekiꞌra norekeꞌ Pueꞌ Ala anaꞌna hi Burahima, alaꞌ Pueꞌ Ala modandimo pe hi Burahima, Notiꞌi, Bateꞌnalu muleꞌna hi Isaki to hingkiꞌ rorekeꞌ anaꞌmu. 8 Uwaꞌ palaihane to kuladu: hawaꞌi lekiꞌna toaꞌ to nipoꞌanaꞌki ka muleꞌna hi Burahima to mewali anaꞌna Pueꞌ Ala, bateꞌnalu toaꞌ to nipoꞌanaꞌki motuntuni dandina Pueꞌ Ala to mewali anaꞌNe. 9 Alaꞌ hi Isaki nipoꞌanaꞌki motuntuni dandina Pueꞌ Ala pe hi Burahima. Dandi tiꞌo waheꞌe: kira-kira toꞌa dongkaꞌ tempo to hibobali, hingkiꞌ mahuliꞌA, hei i tempo tiꞌo, hi Sarai hantambimu hingkiꞌ mampoꞌanaꞌki haduo oꞌanaꞌ tomaꞌani.
10 Hei handoꞌio tiꞌolu, hi Esau hante hi Akoꞌ tiꞌo, tomoropaꞌhi to nopoꞌanaꞌki hi Ribeka. Hi Isaki iomo umoꞌra, hei io haduo tododulungki. 11-12 Ikohandoaꞌana tene hi Ribeka moꞌanaꞌ, Pueꞌ Ala mololita pe io, Notiꞌi, Anaꞌmu to kokokaꞌ hingkiꞌ mengkoruꞌ pe hineeꞌna. Palaihana: kohandoaꞌara tene nipoꞌanaꞌki, nopokonontomo Pueꞌ Ala himo to hingkiꞌ Noꞌuwiꞌ hingkeꞌna pahua pebarakati. To noꞌuwiꞌ Pueꞌ Ala mewali toaꞌNa, hawaꞌi Noꞌuwiꞌ alaꞌ komoromiꞌna waliara, angkana Noꞌuwiꞌ alaꞌ peleihaNa hadoduoNa. 13 I lali Suraꞌ Mangkolehi, Pueꞌ Ala mantiꞌi waheꞌe: “Hi Akoꞌ to Kuꞌuwiꞌ, angkana hi Esau hawaꞌi Kuꞌuwiꞌ.”
Pueꞌ Ala to mampokononto himo to hingkiꞌ pahua pebarakati
14 Mewaliꞌ, hapo tene to wadi hingkiꞌ totiꞌi? Ba hawaꞌi maniuꞌ pampokonontone Pueꞌ Ala? Inioꞌ nipekiri kohawaꞌna maniuꞌ Pueꞌ Ala, Io to moꞌuwiꞌ haduo hei to ntaniꞌna hawaꞌi Noꞌuwiꞌ! 15 Hangangaa ikolowoikei lolitane Pueꞌ Ala pe nabi Musa hampiha to mantiꞌi:
Akumo to mampokononto
pe hihimo hingkiꞌ Kupomombaha komarimangKa,
hei pe hihimo hingkiꞌ Kupomombaha kopopuhiꞌna lalingKu. \rq (Kel. 33:19)
16 Io horiana, Pueꞌ Ala mampetidoꞌki komarimaNa i haduo toaꞌ, handoꞌio alaꞌ jamana hei peleihana toaꞌ tiꞌo, angkana Pueꞌ Ala hadoduoNa to mampokononto. 17 Hangangaa ikolowoikei woꞌo hapo to noꞌukiꞌ hi Musa noniuꞌ lolitana Pueꞌ Ala pe hi Pirao. Notiꞌi, “Kupopewaliko datu hingkeꞌna hingkiꞌ tepobuhoꞌi tungkaihangKa: Hingkiꞌ Kupomombaha kuasaꞌKa, horiana konaꞌKu hingkiꞌ nipokodeꞌ i humanele duniaꞌ”. 18 Mewaliꞌ, tobahaꞌ mpololeke: Pueꞌ Ala mampetidoꞌki rimaNa pe himo toaꞌ to Noꞌuwiꞌ, hei Io woꞌo wadi mampomorintodi lalina toaꞌ ntaniꞌna. Wadi Nowali hatoꞌo motuntuni peleihaNa hadoduoNa.
19 Bateꞌna uwaꞌhi toaꞌ to hingkiꞌ meꞌitano, Ane Pueꞌ Ala wadi mowali hapolu motuntuni peleihaNa hadoduoNa, mahamporeꞌi hinaꞌ Io mosalaꞌi tene walianta to kodake, alaꞌ hawaꞌi uwaꞌ howeꞌ haduo to wadi moꞌewa peleihaNa? 20 Halali-halali, inioꞌ itiꞌikei hatoꞌo! Hawaꞌi masipatoꞌ ingkiꞌ manusiaꞌ mokamoroki Pueꞌ Ala. Uwaꞌrei kiri mantiꞌi pe tomoteruꞌi, mahamporeꞌi hinaꞌ iteruꞌa waheꞌe? 21 Hantaro masipatoꞌ mpololeke topoteru kiri tiꞌo mowali kiri motuntuni peleihana hadoduona. Ka hampeꞌohaꞌa woiꞌ to mapuluꞌ, wadi nowali roꞌonu kiri; haꞌanu to nipakeꞌ i posusaꞌa, hei haꞌanu to nipakeꞌ ando-andona.
22 Hatoꞌo woꞌo Pueꞌ Ala makuasaꞌ mowali hapo peleihaNa i ingkiꞌ hei masipatoꞌ mampetidoꞌki kobukotaNa. Angkana kehapoꞌi hatoꞌo Pueꞌ Ala sabaraꞌlu tene pe iohi to mampobukotaꞌI. Hei iomohi to nipatimomo mantorimo pehuku. 23 Alaꞌ kosabaraꞌNa, mombaha komanobaꞌne tuwuꞌNa i toaꞌ to Noꞌuwiꞌ hingkiꞌ mantorimo komarimaNa. Nopatimomokihi umbiꞌ, hingkeꞌna pahuahi dolaꞌra i lali komanobaꞌna tuwuꞌNa tiꞌo. 24 Ingkiꞌmo hieꞌe to Noꞌuwiꞌ pahua pebarakati tiꞌo, hei handoꞌiolu ka lumbura toYahudi, angkana uwaꞌhi woꞌo to Noꞌuwiꞌ ka lumbura to handoꞌio toYahudi.
25 I lali suraꞌna nabi Hosea to noꞌukiꞌ hampiha, Pueꞌ Ala mantiꞌi waheꞌe:
Toaꞌ to handoꞌiohi toaꞌKu
hingkiꞌ Kutiꞌi toaꞌKu,
toaꞌ to hawaꞌi Kupokarima
hingkiꞌ Kupokarima. \rq (Hos. 2:22)
26 Hampiha Pueꞌ Ala mantiꞌi pe toaꞌ i woiꞌ ntaniꞌna:
Ingkei handoꞌiokei toaꞌKu.
Angkana hingkiꞌ hupaꞌ tempone,
Pueꞌ Ala to tuwuꞌ hingkiꞌ mantiꞌi i toaꞌ tiꞌo:
Anaꞌkumokei! \rq (Hos. 1:10)
27 Hei nabi Yesaia woꞌo mololita hampiha noniuꞌ i hangko toSaraelina waheꞌe:
Kehapoꞌi koworiꞌra toSaraeli
hibali koworiꞌna woꞌoni i bota ntahiꞌ,
angkana hawaꞌi woriꞌ to hingkiꞌ noposalamaꞌ Pueꞌ Ala.
28 Hamboaꞌmo morue,
Pueꞌ Ala hingkiꞌ hohiꞌ mobutusi
toaꞌ to i duniaꞌ. \rq (Yes. 10:22-23)
29 Uwaꞌ woꞌo lolita ntaniꞌna to noꞌukiꞌ nabi Yesaia to mantiꞌi waheꞌe:
Ane kehawaꞌi nopelobi Pueꞌ Ala to Makuasaꞌ
haꞌumbora duo to mampemuleꞌkiki,
keropuꞌmoki,
hibali hante toSodomo hante toGomora hampiha. \rq (Yes. 1:9)
Himolu to mepoꞌohi pe Kerisitu, hingkiꞌ notorimo Pueꞌ Ala
30 Mewaliꞌ hapo tene to wadi hingkiꞌ totiꞌi? Toaꞌ to handoꞌiohi toSaraeli hawaꞌhi magega mampaliꞌ lala hingkeꞌna mewalihi modame hante Pueꞌ Ala. Angkana kehapoꞌi hatoꞌo, nopokonontomo Pueꞌ Ala nokomi pepoꞌohira, horiana modamehi mahuliꞌ hante Pueꞌ Ala. 31 Angkana ane toSaraelihi, moruemohi mampaliꞌ lala hingkeꞌna mewalihi modame hante Pueꞌ Ala moliu i pampetuntuira aturana hi Musa, angkana hawaꞌi rohua. 32 Mahamporeꞌi hinaꞌ toSaraeli hawaꞌhi pahua to ropaliꞌ tiꞌo? Alaꞌ mohinaruluhi i waliara hadoduora, iomo, pampetuntuira Aturana hi Musa, hei hawaꞌhi mepoꞌohi pe Pueꞌ Ala. Hiwintiꞌhi i watu kohiwintiꞌa. 33 Kohiwintiꞌra tiꞌo nipowute hampiha i lali Suraꞌ Mangkolehi. Notiꞌi Pueꞌ Ala waheꞌe:
Ipehoromuakei moromiꞌ!
Kuporiamo haꞌanu Watu i biri Sio.
Woriꞌ toaꞌ hingkiꞌ hiwintiꞌ i Watu tiꞌo,
koꞌukoana hipotumpapaꞌ.
Angkana himolu to mepoꞌohi pe Io,
hawaꞌi hingkiꞌ nipokohili
alaꞌ pepohinarura hingkiꞌ tebuhoꞌi. \rq (Yes. 28:16)