Walia to masipatoꞌ i toaꞌ to mepoꞌohi (12:1—15:13)
12
1 Mewaliꞌ, halali-halali, alaꞌ kokodeꞌna rimana Pueꞌ Ala i ingkiꞌ, iomo horiana kuperapiꞌ hingkeꞌna ipeweikei kotuwuꞌmi pe Pueꞌ Ala mewali popenomba to tuwuꞌ, to mangkolehi hei to mampomotanaꞌ laliNa, iomo lala mpenomba to masipatoꞌ pe Pueꞌ Ala. 2 Inioꞌkei mampetuntui waliara toaꞌ to i duniaꞌ hieꞌe to hawaꞌhi mengkoruꞌ pe Pueꞌ Ala, angkana hinamo Pueꞌ Ala mowolaꞌi pekirimi hingkeꞌna tewolihi waliami. Alaꞌ ane iwalikei hatoꞌo, hingkiꞌ ibahaꞌkei mpololeke peleihane Pueꞌ Ala i lali kotuwuꞌmi: PeleihaNa to moromiꞌ to mampomotanaꞌ laliNa hei to masipatoꞌ.Kopebahaꞌ to nopaꞌanikiki Pueꞌ Ala
3 Alaꞌ kopopuhiꞌna laliNa, Pueꞌ Ala moꞌuwiꞌa hingkeꞌna mewaliꞌa suroNa, iomo horiana kupowutekikei lolita hieꞌe: inioꞌkei mampokokodeꞌ. Angkana pekirimi hangangaa hintotoꞌ hante kopebahaꞌ to nodolaꞌ-dolaꞌkikei Pueꞌ Ala, alaꞌ pepoꞌohimi pe hi Yesu. 4 Pandiriꞌ, i wotanta woriꞌ dolaꞌna, angkana haꞌanu wotalu. Lekiꞌ-lekiꞌna dolaꞌna molangkaꞌ-langkaꞌ podumbuꞌane. 5 Hatoꞌo woꞌo ingkiꞌ to mepoꞌohi pe Kerisitu: woriꞌki, angkana hawowotaluki alaꞌ pohintuwuꞌta hante Kerisitu, hei mohintuwuꞌki lekiꞌ-lekiꞌta haduo hei haduo. 6 Haduo-haduoki pahua komapande to molangkaꞌ-langkaꞌ, motuntuni hapo to nopaꞌanikiki Pueꞌ Ala ka kopopuhiꞌna laliNa.
Himo to pahua komapande mampowute lolitana Pueꞌ Ala,
hangangaa mampololita hintotoꞌ hante pepoꞌohina.
7 Himo to pahua kopebahaꞌ mosulungi hangko awana,
hangangaa mesulungihi ka kopopuhiꞌna lalina.
Himo to pahua komapande mepaguru,
hangangaa mepaguru mpololeke.
8 Himo to pahua kopebahaꞌ mampokaroho lalina hangko awana,
hangangaa nopopatengkaꞌ ka lali-lalina.
Himo to pahua kopebahaꞌ modolaꞌ-dolaꞌ hapo to uwaꞌ i io,
hangangaa nopewei ka kopopuhiꞌna lalina.
Himo to pahua komapande motadulakoi,
hangangaa mewali tadulako to modoto.
Hei himo to pahua kopebahaꞌ mowali to moromiꞌ
hangangaa nowali hante komotanaꞌ.
Hangangaa mowalikei to moromiꞌ pe lekiꞌ-lekiꞌna toaꞌ
9 Ipokarimakei awami ka lalimi-lalimi. Ipohentekei waliami to kodake, hei mowaliakei nturusi walia to moromiꞌ. 10 Momepokarimakei hei momeꞌadaꞌikei haduo hei haduo hibalikei topohalali. 11 Hangangaa modotokei majama, inioꞌkei lohe. Ipopatengkaꞌkei jamane Pueꞌ hante kopopuhiꞌna lalimi. 12 Hangangaa motanaꞌkei alaꞌ pepohinaruami i lekiꞌ-lekiꞌna to hingkiꞌ nowalikikei Pueꞌ Ala. Mantahakei i lali komaporiꞌ. Modotokei mekokae. 13 Isulungikei toaꞌne Pueꞌ Ala to uwaꞌ i lali komakuraꞌra. Hangangaa motanaꞌkei mantorimo tolori.
14 Ane uwaꞌ toaꞌ to mampoperima-rimakei, inioꞌkei itundaꞌ, angkana hangangaa iperapiꞌkei pe Pueꞌ Ala hingkeꞌna Nobarakatihi. 15 Hangangaa motanaꞌkei moꞌawa hante toaꞌ to motanaꞌ, meꞌolakei moꞌawa hante toaꞌ to meꞌola. 16 Mohintuwuꞌkei hante lekiꞌ-lekiꞌna toaꞌ. Inioꞌkei mampokokodeꞌ, angkana ipohintotoꞌkei waliami hante toaꞌ to i wowoiꞌ tuwuꞌra, hei inioꞌkei mampetomapande.
17 Ane uwaꞌhi to mowali dake pe ingkei, inioꞌhi nihowoni. Iwalikei hapo to moromiꞌ i peꞌelena lekiꞌ-lekiꞌna toaꞌ. 18 Ipaliꞌkei lala hingkeꞌna modamekei nturusi hante lekiꞌ-lekiꞌna toaꞌ. 19 Halali-halali to kupokarima: inioꞌ nihowoni kokodakene toaꞌ ntaniꞌna. Itedehikei Pueꞌ Ala mohukuhi, alaꞌ i lali Suraꞌ Mangkolehi, notiꞌi Pueꞌ Ala waheꞌe:
Aku to makuasaꞌ mohowoni.
Aku to makuasaꞌ mehohuku. \rq (Ul. 32:35)
20 Mewaliꞌ, ipetuntuikei poturuꞌ i lali Suraꞌ Mangkolehi to mantiꞌi:
Ane poniꞌmi bilora, nipopopangkahi.
Ane mangkumarohi, nipopaꞌinuhi.
Ane iwalikei hatoꞌo, hingkiꞌ mohilihi. \rq (Ams. 25:21-22)
21 Inioꞌ nihowoni waliane toaꞌ to kodake hante walia to kodake woꞌo, angkana inanikei walia to kodake hante waliami to moromiꞌ.