Roma 13

Hangangaa mengkoruꞌki pe topoparenta

1-2 Lekiꞌ-lekiꞌna toaꞌ hangangaa mengkoruꞌ pe topoparenta, alaꞌ kuasaꞌna moparenta ka Pueꞌ Ala. Iomo horiana toaꞌ to moꞌewa topoparenta, hibalilu hante moꞌewa Pueꞌ Ala, alaꞌ topoparenta to uwaꞌ, Pueꞌ Ala to mampokononto. Hei toaꞌ to moꞌewa topoparenta bateꞌna hingkiꞌ pahua pehuku! 3 Ane moromiꞌi waliami, hawaꞌkei paralu morokaꞌ pe topoparenta. Angkana toaꞌ to kodake waliana, bateꞌna morokaꞌ pe topoparenta. Io horiana, ane ileikei hingkeꞌna hawaꞌkei morokaꞌ pe topoparenta, hangangaa mowalikei nturusi to moromiꞌ, hei hingkiꞌ noperenakikei topoparenta. 4 Alaꞌ topoparenta tiꞌo, iomo hawiꞌna Pueꞌ Ala to mampopatengkaꞌ jamaNa hingkeꞌna moromiꞌ kotuwuꞌmi. Angkana ane mowalikei to kodake, bateꞌna morokaꞌkei pe topoparenta, alaꞌ uwaꞌ kuasaꞌre mehohuku. Topoparenta tiꞌo hawiꞌna Pueꞌ Ala hingkeꞌna mangkomi pehukuNa i toaꞌ to mowali to kodake. 5 Iomo horiana hangangaa mampetuntuikei hawaꞌra topoparenta, handoꞌio alaꞌ komotehuꞌmi nihuku angkana alaꞌ i lalimi ibahaꞌkei, tiꞌo to hangangaa iwalikei.

6 Iomo horiana hangangaa mobaiarikei sima, alaꞌ topoparenta tiꞌo mampopatengkaꞌ jama to nopaꞌanikihi Pueꞌ Ala. 7  Hangangaa ibaiarikei pe topoparenta hapo to masipatoꞌ ibaiarikei, rapaꞌna: sima hei woriꞌ tene to ntaniꞌna. Mengkoruꞌkei pe toaꞌ to hangangaa nipengkoruꞌi, hei niꞌadaꞌi lekiꞌ-lekiꞌne to masipatoꞌ niꞌadaꞌi.

Hangangaa marimaki pe hangko awanta alaꞌ hingkiꞌ hupaꞌ Pueꞌ Yesu

8 Anioꞌkei maꞌinda pe hangko awami, angkana maꞌindakei i lali pomepokarima haduo hei haduo, alaꞌ himolu to mampokarima hangko awana, iomo to mampetuntui aturana Pueꞌ Ala to nopowute hi Musa. 9 I lali aturana Pueꞌ Ala uwaꞌ hawaꞌ to mantiꞌi: inioꞌkei mebualosi, inioꞌkei merorokoꞌ, inioꞌkei manako, inioꞌkei mangkohoka hapolu to uwaꞌ i awami. Lekiꞌ-lekiꞌna hawaꞌ tiꞌo hante hawaꞌ to ntaniꞌna woꞌo ipetuntuikei, ane mampetuntuikei hawaꞌ to halangkaꞌ hieꞌe: Ipokarimakei hangko awami hibali koꞌipokarimana wotami hadoduomi. 10 Ane ipokarimakei hangko awami, hawaꞌkei mowali to kodake pe iohi. Mewaliꞌ ane marimakei, palaihana: ipetuntuikei lekiꞌ-lekiꞌna Hawaꞌne Pueꞌ Ala.

11 Lekiꞌ-lekiꞌna tiꞌo hangangaa ipopatengkaꞌkei, alaꞌ ibahaꞌmokei hapo to masipatoꞌ iwalikei i tempo hinewowoꞌena. Mepongkamokei majama mpololeke, alaꞌ koꞌipoꞌohinakei Pueꞌ Yesu ka uluꞌ-uluꞌna, hinewowoꞌena, kododungku-dungkuamo ando kosalamaꞌa ka Pueꞌ Ala. 12  Duniaꞌ hieꞌe mokorindi, angkana tempo komokorindi hieꞌe hingkiꞌ liumo, hei hingkiꞌ mehupaꞌ komobaro ikohupaꞌna huliꞌ Yesu Kerisitu. Io horiana hangangaa ipohentekei walia to mokorindi hei hangangaa mowaliakei moromiꞌ hingkeꞌna tiꞌo to mewali wuladoꞌmi moꞌewa komokorindi. 13 Hangangaa iwalikei hapo to masipatoꞌ, hibali to niwali i tempo mobaro. Inioꞌkei malanu-lanu, inioꞌkei mowali walia to mekokomaꞌi hante motuntuni peleihami to kodake. Inioꞌkei mosisalaꞌ ba mowahiꞌ. 14 Hinamo Pueꞌ Yesu Kerisitu mewali laba i lali kotuwuꞌmi. Inioꞌkei mampekiri walia to kodake, hingkeꞌna inioꞌkei mowali to motuntuni peleihana lalimi hadoduomi.