Suraꞌna Hi Paulu To Nopokatu
Pe ToSarani I Kota
Roma
Tabea
1
Pe tosaranii kota Roma
1 Suraꞌ hieꞌe ka aku hi Paulu, rumbaꞌana Yesu Kerisitu, to Noꞌuwiꞌ mewali suroNa mampowute Kareba Moromiꞌ to ka Pueꞌ Ala. 2 Hampiha, Pueꞌ Ala modandimo moliu i nabi-nabi noniuꞌ Kareba Moromiꞌ, hei tiꞌo to teꞌukiꞌ i lali Suraꞌ Mangkolehi. 3 Kareba Moromiꞌ tiꞌo noniuꞌ Anaꞌna Pueꞌ Ala, Pueꞌta Yesu Kerisitu. Motuntuni konipoꞌanaꞌkiNa, Io haduo pemuleꞌana datu Daudi. 4 Angkana hi Yesu Iomo woꞌo Anaꞌna Pueꞌ Ala, hei Io mangkolehi hibali Pueꞌ Ala. Mambaha lekiꞌ-lekiꞌna tiꞌo, alaꞌ Pueꞌ Ala mampotuwuꞌ huliꞌ ka komahia. Iomo Pueꞌta Yesu Kerisitu!
5 Alaꞌ kohiYesuna, Pueꞌ Ala mampaꞌaniꞌa woriꞌ pebarakati, horiana Nohiniꞌa mewali suroNa, hingkeꞌna aku to mampowute Kareba Moromiꞌ pe humanele duniaꞌ i toaꞌ to handoꞌiohi toYahudi, hingkeꞌna mepoꞌohihi hei mengkoruꞌhi pe Pueꞌ Yesu, wute konaꞌNa nipokodeꞌ. 6 Hatoꞌo woꞌo ingkei tosarani to i Roma. Koworiꞌami handoꞌiokei toYahudi, angkana Pueꞌ Ala mowowoikei woꞌo mewali toaꞌna Yesu Kerisitu. 7 Iomo horiana kupokatu suraꞌ hieꞌe pe ingkei. Pueꞌ Ala mampokarimakei hei mowowoikei mewali toaꞌNa. Hinamo Pueꞌ Ala Umoꞌta hei Pueꞌ Yesu Kerisitu mobarakatikei ka kopopuhiꞌna laliNa hei mampaꞌanikei Romiꞌ Ngkotuwuꞌ.
Hi Paulu dokoꞌ pe Roma
8 Uluꞌ-uluꞌna, kutiꞌi woriꞌ komoromiꞌna Pueꞌ Ala alaꞌ koꞌingkeina halali-halali. Kutiꞌi hatoꞌo alaꞌ komarohona pepoꞌohimi pe Pueꞌ Yesu tekarebamo i humanele duniaꞌ. 9 Ka lalingku mpololeke mampopatengkaꞌa jama to nopaꞌanikiꞌa Pueꞌ Ala. Jamangku tiꞌo, mampowute Kareba Moromiꞌ noniuꞌ AnaꞌNa. Hei Pueꞌ Ala to mosobiꞌi kokuponindimi nturusi i lali pekokaengku. 10 Kuperapiꞌ i lali pekokaengku, woiwoina Nopaꞌaniꞌa tempo ako mangkohidupaꞌkikei. 11 Kukodokoꞌi mpololeke mampohidupaꞌkikei, hingkeꞌna moliu i aku, hingkiꞌ pahuakei pebarakati to ka Inohaꞌ Mangkolehi to hingkiꞌ mampokaroho pepoꞌohimi. 12 Tungkaihangku hingkeꞌna wadiki momepokaroho lali, alaꞌ hibobalimoki mepoꞌohi pe Yesu Kerisitu.
13 Halali-halali, kotuꞌuana woriꞌ mpiha kukodokoꞌi mangkohidupaꞌkikei, angkana poko uwaꞌ to mosalemporiꞌa. Tungkaihangku ako mangkohidupaꞌkikei, hingkeꞌna uwaꞌ wuaꞌne pajamangku i kotami, hibali wuaꞌna pajamangku i lumbuna toaꞌhi to handoꞌiohi toYahudi i bolaꞌ-bolaꞌ ntaniꞌna. 14 Alaꞌ paraluꞌa mampowute Kareba Moromiꞌ pe lekiꞌ-lekiꞌna toaꞌ, moromiꞌ pe toYunani hei to handoꞌio toYunani, moromiꞌ to mosikolaꞌ hei to hawaꞌi mosikolaꞌ. 15 Iomo horiana kukodokoꞌi mpololeke mampowute woꞌo Kareba Moromiꞌ pe toaꞌ to uwaꞌ i Roma.
Ka Kareba Moromiꞌ tobahaꞌ lala kosalamaꞌa
16 Hawaꞌa mohili mampowute Kareba Moromiꞌ, alaꞌ moliu Kareba Moromiꞌ tiꞌo, Pueꞌ Ala mampopebahaꞌ kuasaꞌNa mamposalamaꞌ toaꞌ to mepoꞌohi ka pehuku dosara, uluꞌ-uluꞌna toYahudi, wute-wute woꞌo toaꞌ to handoꞌiohi toYahudi. 17 Ka Kareba Moromiꞌ tiꞌo, tobahaꞌ hohumbo lalane hingkeꞌna nipomodameki mahuliꞌ hante Pueꞌ Ala. Lalana Waheꞌe: mewaliki modame hante Pueꞌ Ala nokomi pepoꞌohinta pe Io. Hawaꞌi uwaꞌ lala ntaniꞌna, alaꞌ i lali suraꞌ Mangkolehi teꞌukiꞌmo waheꞌe: Toaꞌ to nipomodame hante Pueꞌ Ala, iomohi to salamaꞌ alaꞌ pepoꞌohira.
Woriꞌ toaꞌ masipatoꞌ pahua pehukuna Pueꞌ Ala alaꞌ komadosara (1:18—3:20)
Woriꞌ toaꞌ pobahaꞌ koꞌuwaꞌna Pueꞌ Ala,
18 Ka suruga, Pueꞌ Ala hadoduoNa mampomombaha kobukotaNa alaꞌ lekiꞌ-lekiꞌna dosa to uwaꞌ i lalina toaꞌ hei lekiꞌ-lekiꞌna waliara to kodake. Alaꞌ nokomi waliara to kodake tiꞌo, toaꞌ hawaꞌhi pobahaꞌ poturuꞌ to tuꞌu. 19 Hapo to paralu nobahaꞌ manusiaꞌ noniuꞌ Pueꞌ Ala mambahamo, alaꞌ Pueꞌ Ala hadoduoNa to mampokonontokihi. 20 Kehapoꞌi hawaꞌi toꞌokiꞌ noniuꞌ Pueꞌ Ala, angkana ka pewalina duniaꞌ, toaꞌ pobahaꞌ koꞌuwaꞌna Pueꞌ Ala, alaꞌ ka lekiꞌ-lekiꞌna to Nopopewali, mambahamo komanobaꞌna tuwuꞌNa, hei mombaha woꞌo kuasaꞌNe to hawaꞌi mokoꞌukoa. Mewaliꞌ, hawaꞌi uwaꞌ toaꞌ to wadi mosapuaka lekiꞌ-lekiꞌna tiꞌo. 21 Kehapoꞌi robahaꞌ mpololeke koꞌuwaꞌne Pueꞌ Ala, angkana hawaꞌi roꞌadaꞌi, hei hawaꞌi woꞌo ropokodeꞌ. Pampekirira hawaꞌi modumbuꞌ hei lalira mokorindi hante moꞌelahi ka Pueꞌ Ala. 22 Rorekeꞌ mapandehi, hantaro bebehi! 23 Hawaꞌhi hiniꞌ menomba pe Pueꞌ Ala to tuwuꞌ wute nantolou-louna. Menombahi pe lente to rowali hadoduora motuntuni lentena toaꞌ, lentena tinti, ule ba pinatuwuꞌ ntaniꞌna to hampaiꞌlu kotuwuꞌre i duniaꞌ hieꞌe.
24 Mewaliꞌ, alaꞌ kobebera tiꞌo, iomo horiana nopotedehihi Pueꞌ Ala motuntuni peleihana lalira to kodake, koꞌukoana mowalihi salaꞌ to mekokomaꞌi hei mepokohili hante hangko awara. 25 Hawaꞌhi mampoꞌohi hapo to tuꞌu noniuꞌ Pueꞌ Ala, angkana wuliha mampoꞌohihi hapo to salaꞌ. Hawaꞌhi hiniꞌ menomba pe Pueꞌ Ala to mowalihi. To ropenombai hante to ropengkoruꞌi wuliha to nowali Pueꞌ Ala. Hantaro kotuꞌuana, Tomowali wae to hangangaa topokodeꞌ wute nantolou-louna. Amin!
26 Mewaliꞌ, nokomi kohawaꞌra hiniꞌ menomba pe Pueꞌ Ala, angkana menombahi pe to ntaniꞌna, iomo horiana Nopotedehimohi motuntuni peleihana lalira to mepokohili tiꞌo, wute-wute i towoweꞌe mampohantambi hangko towoweꞌena. 27 Hatoꞌo woꞌo tomaꞌani: mampohantambi hangko tomaꞌaniana. Tomaꞌani mowali walia to hawaꞌi masipatoꞌ i hangko tomaꞌanira, hei walia tiꞌo mepokohili. Koꞌukoana, pahuahi pehuku to hintotoꞌ hante waliara to masalaꞌ mpololeke tiꞌo.
28 Nokomi kohawaꞌra hiniꞌ mopangakuꞌ Pueꞌ Ala i lali pekirira, iomo horiana nopotedehimo Pueꞌ Ala pekirire mewali kodake, koꞌukoana mowalihi to hawaꞌi masipatoꞌ. 29 Woriꞌ langkaꞌ dosa hante pekiri to hawaꞌi mononto i lalira.
Hawaꞌhi pangkororeina,
mampokarugiꞌ toaꞌ,
mohiriꞌhi,
merorokoꞌhi,
mosisalaꞌhi,
mowutihi,
momekabiriꞌhi
hante mangkomi-komihi lolita.
30 Mampokodakehi toaꞌ,
mampokoiꞌhi Pueꞌ Ala,
hawaꞌhi poꞌadaꞌ,
mampokokodeꞌhi,
mampetoꞌuwaꞌhi,
Mampaliꞌhi lala to wolaꞌ mowali to kodake.
Hawaꞌhi mengkoruꞌ pe tomotodira.
31 Hawaꞌhi hiniꞌ motuntuni peleihana Pueꞌ Ala,
hawaꞌhi mampekiri toaꞌ ntaniꞌna
hawaꞌhi mampobuhoꞌi dandira,
hawaꞌhi marima pe hangko awara,
hawaꞌhi monindi pe hangko awara.
32 Pobahaꞌhi mpololeke aturana Pueꞌ Ala to mantiꞌi hihimolu to hatoꞌo, hangangaa nihuku mahi. Angkana kehapoꞌi hatoꞌo, mowaliluhi nturusi walia to kodake tiꞌo, hei handoꞌio tiꞌolu, iohi woꞌo mampotanaꞌhi toaꞌ to mowali to kodake.