Pehukuna Pueꞌ Ala pe toaꞌ to hawaꞌi mengkatobaꞌ
2
1-2 Ibahaꞌkei mpololeke, ane Pueꞌ Ala mobutusi toaꞌ to mosalaꞌi hangko awana, pobutusiNa bateꞌna maniuꞌ. Angkana ingkei, hawaꞌkei masipatoꞌ mosalaꞌi toaꞌ ntaniꞌna, alaꞌ ane mosalaꞌikei toaꞌ ntaniꞌna, mopalaiha mosalaꞌikei woꞌo wotami hadoduomi, alaꞌ hapo to rowali toaꞌ ntaniꞌna, tiꞌo woꞌo to iwalikei. Mewaliꞌ, hawaꞌi mpuꞌu uwaꞌ lalami mampetotuꞌu wotami. 3 Ane mosalaꞌikei toaꞌ ntaniꞌna, angkana ingkei woꞌo mowali walia to hatoꞌo, inioꞌ nipekiri hawaꞌkei hingkiꞌ nohuku Pueꞌ Ala. 4 Moromiꞌ mpololeke laline Pueꞌ Ala, sabaraꞌ hante buhaꞌ rima, angkana inioꞌ ipariwoiꞌkei. Hangangaa ikolowoikei: tungkaihane Pueꞌ Ala to moromiꞌ, iomo horiana Nopaꞌanikei tempo mengkatobaꞌ ka dosami.5 Angkana lalimi morintodi, hei hawaꞌkei hiniꞌ mowolihi waliami. Alaꞌ waliami tiꞌo pedeꞌ mampobukota Pueꞌ Ala i ando pobutusi i koꞌukoana duniaꞌ. Hei Pueꞌ Ala mobutusi hante mononto. 6 Io hingkiꞌ mohowoni waliara lekiꞌ-lekiꞌna toaꞌ. 7 Uwaꞌ toaꞌ to mowalihi nturusi hapo to moromiꞌ, alaꞌ iohi mampaliꞌhi pepokodeꞌ hante peꞌadaꞌi ka Pueꞌ Ala, hei mampaliꞌhi woꞌo kotuwuꞌ to wolaꞌ to hawaꞌi uwaꞌ koꞌukoana. I toaꞌ to hatoꞌo, Pueꞌ Ala hingkiꞌ mampaꞌanihi kotuwuꞌ to hawaꞌi mokoꞌukoa. 8 Angkana uwaꞌhi woꞌo toaꞌ to mampekirilu wotara hadoduora. Hawaꞌhi hiniꞌ motuntuni poturuꞌ to tuꞌu, motuntuniluhi walia to kodake. Iohi tiꞌo to hingkiꞌ mantorimo kobukotana Pueꞌ Ala. 9-10 Lekiꞌ-lekiꞌna toaꞌ to mowali dake, bateꞌra hingkiꞌ pahua komaporiꞌ. Angkana toaꞌ to mowali romiꞌ hingkiꞌ pahuahi pepokodeꞌ, peꞌadaꞌi hante Romiꞌ Ngkotuwuꞌ, uluꞌ-uluꞌna pe toYahudihi, honiꞌi pe to handoꞌio toYahudi, 11 alaꞌ Pueꞌ Ala hawaꞌi mampopoꞌori-ori toaꞌ.
Aturana Pueꞌ Ala to noꞌukiꞌ hi Musa
12 Toaꞌ to madosa to hawaꞌi pobahaꞌ Aturana hi Musa, konohukura Pueꞌ Ala hawaꞌi motuntuni Aturana hi Musa. Angkana toYahudi to pobahaꞌ Aturana hi Musa hei madosa hingkiꞌ Nohukuluhi woꞌo Pueꞌ Ala, motuntuni Aturana hi Musa. 13 Alaꞌ toaꞌ to podo pobahaꞌlu aturana Pueꞌ Ala to noꞌukiꞌ hi Musa hawaꞌi hingkiꞌ modame hante Pueꞌ Ala, angkana toaꞌ to mampetuntui lekiꞌ-lekiꞌna atura to teꞌukiꞌ i lali hawaꞌna hi Musa hingkiꞌ modame hante Pueꞌ Ala. 14 Toaꞌ to handoꞌio toYahudi ane mowalihi walia to hintotoꞌ hante Aturana hi Musa, kehapoꞌi hawaꞌi robahaꞌ hapo to teꞌukiꞌ i hawaꞌna tiꞌo, mombahamo koꞌuwaꞌnamo hawaꞌne Pueꞌ Ala i lalira, 15 hei tiꞌomo to mampokonontokihi hapo to moromiꞌ hante hapo to hawaꞌi moromiꞌ. Robahaꞌ i lalira ane hapo to rowali moromiꞌ ba hawaꞌi moromiꞌ.
16 Angkana i ando pobutusi i kotutuana duniaꞌ, Pueꞌ Ala to hingkiꞌ mampaꞌani kuasaꞌ pe hi Yesu Kerisitu mobutusi to moromiꞌ hante to hawaꞌi moromiꞌ, wute i lekiꞌ-lekiꞌna to tewuni i lalira toaꞌ. Tiꞌomo halangkaꞌ poturuꞌ ka Kareba Moromiꞌ to kupowute.
ToYahudi pobahaꞌ hawaꞌna hi Musa,
17 Mewaliꞌ, hohumbomokei toYahudi? Uwaꞌkei to mampokokodeꞌ, itiꞌikei ingkeilu toaꞌne Pueꞌ Ala alaꞌ ipetuntuikei Aturane hi Musa. 18 Ingkei toYahudi, ibahaꞌmokei peleihane Pueꞌ Ala hei ibahaꞌkei mampopoꞌori hapo to moromiꞌ hante hapo to hawaꞌi moromiꞌ, alaꞌ nipoturuꞌmokikei Aturana hi Musa. 19-20 Lalimi mantiꞌi, ingkiꞌ hieꞌe to mapande. Tobahaꞌ mampoturuꞌ toaꞌ to hawaꞌi pobahaꞌ Pueꞌ Ala. Ingkiꞌ hieꞌe to hangangaa mampomobaro lalina toaꞌ to uwaꞌhi tene i lali komokorindi hei mampokononto toaꞌ to handoaꞌhi tene pobahaꞌ poturuꞌ to tuꞌu, alaꞌ poturuꞌ to tuꞌu tiꞌo teꞌukiꞌ i lali Aturana hi Musa.
21 Mewaliꞌ, ane mampoturuꞌkei toaꞌ ntaniꞌna, mahamporeꞌi hinaꞌ ingkei hadoduomi hawaꞌkei motuntuni poturuꞌ to tuꞌu tiꞌo? Ipoturuꞌkei toaꞌ ntaniꞌne hingkeꞌna hawaꞌhi manako, hantaro ingkei hadoduomi to manako! 22 Mampatiꞌikikei toaꞌ ntaniꞌna inioꞌkei mebualosi, hantaro ingkei hadoduomi mebualosilukei woꞌo! Mangkodokukei to ropopenomba i lomoa, angkana noloukei manako parewa i lali tambi penombaha pe lomoa. 23 Ba mampokokodeꞌkei alaꞌ pobahaꞌkei Aturana hi Musa? Hapomo dumbuꞌne itiꞌikei pobahaꞌkei atura tiꞌo, angkana hawaꞌkei moꞌadaꞌi Pueꞌ Ala alaꞌ hawaꞌkei motuntuni aturaNa? 24 Uwaꞌ to teꞌukiꞌ i lali Suraꞌ Mangkolehi to mantiꞌi waheꞌe: Ingkei toYahudi, nokomi kokodakena waliami, horiana konaꞌna Pueꞌ Ala nipokokeniꞌa i roboꞌ ntaniꞌna.
ToYahudi nibulabaꞌ motuntuni Aturana hi Musa,
25 Ingkei toYahudi, itiꞌikei uwaꞌ podumbuꞌane adaꞌ pebulabaꞌ motuntuni hawaꞌna hi Musa. Uwaꞌ mpuꞌu podumbuꞌane konibulabaꞌmi, ane ipetuntuikei mpololeke Aturane hi Musa. Angkana ane hawaꞌi ipetuntuikei Aturane hi Musa, hawaꞌi uwaꞌ dumbuꞌne konibulabaꞌmi tiꞌo. 26 Toaꞌ to handoꞌiohi toYahudi, hawaꞌhi nibulabaꞌ motuntuni Aturana hi Musa. Angkana ane mononto waliare motuntuni poturuꞌ to teꞌukiꞌ i lali Aturana hi Musa, bateꞌna hingkiꞌ notorimohi Pueꞌ Ala hibali hante toaꞌ to nibulabaꞌ motuntuni Aturana hi Musa tiꞌo. 27 Ane hatoꞌoꞌi, i kotutuana duniaꞌ, toaꞌ to handoꞌiohi toYahudi hingkiꞌ mosalaꞌikei, alaꞌ hawaꞌkei mampetuntui hawaꞌna Pueꞌ Ala, kehapoꞌi teꞌukiꞌmo i lali Aturana hi Musa. Nibulabaꞌkei woꞌo motuntuni hawaꞌ tiꞌo, angkana to mampetuntui hawaꞌna Pueꞌ Ala wuliha to hawaꞌi nibulabaꞌ.
28 ToYahudi nibulabaꞌ motuntuni Aturana hi Musa, angkana konibulabaꞌra tiꞌo iomo adaꞌ to rowalilu i wotara hei mambahalu i howali. Hawaꞌhi mewali toaꞌna Pueꞌ Ala nokomi adaꞌ pebulabaꞌ. 29 Angkana toYahudi to mewali toaꞌna Pueꞌ Ala, iomo to mampetuntui peleihana Pueꞌ Ala ka lalina mpololeke, hei wadi nipandiriꞌ hibali to nibulabaꞌ i lalina nokomi Inohaꞌ Mangkolehi, handoꞌio nokomi atura-atura to teꞌukiꞌ. Kehapoꞌi hawaꞌki ropokodeꞌ toaꞌ, angkana Pueꞌ Ala bateꞌna mampokodeꞌki.