Komorasiꞌara toYahudi, hei Pueꞌ Ala tontona tungkuꞌ
3
1 Ingkiꞌ toYahudi hante to handoꞌio toYahudi hibobaliluki, hapo rasiꞌte mewaliki toYahudi, hei hapo rasiꞌte nibulabaꞌ? 2 Angkana kotuꞌuana uwaꞌ mpuꞌu rasiꞌkio toYahudi, hei woriꞌ podumbuꞌane! Uluꞌ-uluꞌna, Pueꞌ Ala mepaꞌani BooNa pe ingkiꞌ toYahudi hampiha. 3 Mewaliꞌ, Hohumbo ane uwaꞌ toYahudi to hawaꞌhi tungkuꞌ i pepoꞌohira? Ba Pueꞌ Ala hamboaꞌmo hingkiꞌ mampobuhoꞌi dandiNa pe iohi lekiꞌ-lekiꞌra? 4 Hawaꞌi hatoꞌo. Kehapoꞌi lekiꞌna toaꞌ to hawaꞌi mampobuhoꞌi dandira, angkana Pueꞌ Ala tontona hingkiꞌ mampobuhoꞌi dandiNa. Alaꞌ uwaꞌ teꞌukiꞌ i Suraꞌ Mangkolehi to mantiꞌi waheꞌe:O Pueꞌ, lekiꞌna to Itiꞌi tuꞌu.
Kehapoꞌi uwaꞌ to mosalaꞌiKo,
bateꞌMu penani. \rq (Mas. 51:6)
5 Mewaliꞌ, waliana toaꞌ to hawaꞌi mononto mampomombaha komonontona pobutusina Pueꞌ Ala. Ane hatoꞌoꞌi, hapo tene to hohumbo hingkiꞌ totiꞌi? Ba hawaꞌi maniuꞌ kobukotane Pueꞌ Ala? (Peꞌitanongku hieꞌe, peꞌitano manusiaꞌlu). 6 Angkana pekiri hieꞌe hawaꞌi tuꞌu! Ane rapaꞌna hawaꞌi mononto Pueꞌ Ala, palaihana Io hawaꞌi wadi mobutusi kara-karara lekiꞌ-lekiꞌna toaꞌ i ando pobutusi i kotutuana duniaꞌ. 7 Mahamporeꞌi hinaꞌ aku to rosalaꞌi nokomi dosangku, hantaro waliangku to kodake to mampomombaha komonontona Pueꞌ Ala horiana konaꞌNa nipokodeꞌ? 8 Uwaꞌ woꞌo toaꞌ to mowuliori-ori lolitangku. Rotiꞌi mololitaꞌa waheꞌe: Aginamo towalimolu walia to kodake hingkeꞌna konaꞌna Pueꞌ Ala hingkiꞌ nipokodeꞌ. Toaꞌ to mantiꞌi hatoꞌo, masipatoꞌ mpololeke nohukuhi Pueꞌ Ala!
Lekiꞌ-lekiꞌna toaꞌ madosa
9 Mewaliꞌ, ba ingkiꞌ toYahudi meliu komoromiꞌte ka toaꞌ ntaniꞌna? Hawaꞌi! Alaꞌ hibalimo to ka kutiꞌimo, lekiꞌ-lekiꞌna toaꞌ bateꞌna masalaꞌ, alaꞌ ingkiꞌ lekiꞌ-lekiꞌta nokuasaꞌiki dosa, moromiꞌ toYahudi moromiꞌ toaꞌ ntaniꞌna. 10 Alaꞌ hampiha teꞌukiꞌ i lali Suraꞌ Mangkolehi to mantiꞌi waheꞌe:
Hawaꞌi uwaꞌ howeꞌ haduo toaꞌ to maniuꞌ i pampeꞌelena Pueꞌ Ala.
11 Hawaꞌi uwaꞌ howeꞌ haduo to pobahaꞌ hapo to moromiꞌ.
Hawaꞌi uwaꞌ howeꞌ haduo to mampaliꞌ Pueꞌ Ala.
12 Lekiꞌ-lekiꞌna toaꞌ motinuni Pueꞌ Ala.
Hamboaꞌmo modumbuꞌ tuwuꞌre.
Hawaꞌi uwaꞌ toaꞌ to moromiꞌ waliare, howeꞌ haduo hawaꞌi uwaꞌ. \rq (Mas. 14:1-3, 53:1-3)
13 Pololitara mangkomi toaꞌ pe komahia.
Ka lilaꞌra mesuwu lolita to mepomonawuꞌ,
ka omeꞌra mesuwu lolita hibali ule to moꞌupoꞌ. \rq (Mas. 5:10, 140:4)
14 Poko motundaꞌhi toaꞌ ntaniꞌna,
hei lolitara mampomolalo lalira toaꞌ ntaniꞌ. \rq (Mas. 10:7)
15 Hali-halihi mepopoꞌioꞌio hei merorokoꞌ.
16 I imbolu koꞌakoara, mangkomihi posisalaꞌ hante komaporiꞌ.
17 Hawaꞌi robahaꞌ lala pohintuwuꞌ. \rq (Yes. 59:7-8; Ams. 1:16)
18 Hawaꞌi robahaꞌ mengkoruꞌ pe Pueꞌ Ala. \rq (Mas. 36:2)
19 Tobahaꞌ aturane hi Musa nipaꞌanikihi pe to hangangaa mampetuntui hawaꞌ tiꞌo. Mewaliꞌ, hawaꞌi uwaꞌ howeꞌ haduo toaꞌ to podehoꞌ mopangakuꞌ kohawaꞌna masalaꞌ. Lekiꞌ-lekiꞌna toaꞌ bateꞌna nobutusi Pueꞌ Ala. 20 Hawaꞌi uwaꞌ howeꞌ haduo to wadi modame hante Pueꞌ Ala, alaꞌ mampetuntuiꞌi lekiꞌ-lekiꞌna Aturana hi Musa. Aturana tiꞌo mampotongawalu komadosana toaꞌ.
Lala hingkeꞌna toaꞌ modame hante Pueꞌ Ala (3:21—5:21)
Modameki hante Pueꞌ Ala nokomi pepoꞌohinta pe Pueꞌ Yesu
21 Hinewowoꞌena Pueꞌ Ala mampatidoꞌkimokiki hohumbo lalane hingkeꞌna modameki hante Io, angkana hawaꞌi moliu i Aturana hi Musa. Suraꞌna hi Musa hante suraꞌna nabi-nabi, mampokononto potuntuninta Atura hi Musa hawaꞌki mampodame hante Pueꞌ Ala, 22 angkana modameki hante Pueꞌ Ala alaꞌ pepoꞌohinta pe hi Yesu Kerisitu. Lekiꞌ-lekiꞌna toaꞌ to mepoꞌohi pe hi Yesu modame hante Pueꞌ Ala, alaꞌ Io hawaꞌi mampopoꞌoriꞌori toYahudi hante to handoꞌio toYahudi. 23 Lekiꞌ-lekiꞌta toaꞌ madosa. Io horiana moꞌelaki ka Pueꞌ Ala hei hawaꞌki masipatoꞌ pahua dolaꞌta i lali komanobaꞌNa. 24 Angkana alaꞌ nohompoꞌmoki Yesu Kerisitu, Pueꞌ Ala mampohenteki ka pehuku dosanta, hei modamemoki hante Io. Lekiꞌ-lekiꞌna tiꞌo Nopaꞌanikiki ntooꞌ-ntooꞌ ka kopopuhiꞌna laliNa.
25 Pueꞌ Ala mampewei hi Yesu hibali popenomba hingkeꞌna mewali lala podame. Hi Yesu nirokoꞌ hei hibobo raꞌaNe motuntuni pampokonontona Pueꞌ Ala. Io mahi hingkeꞌna ingkiꞌ to mepoꞌohi niꞌampuni dosante. Pueꞌ Ala mowali tiꞌo notongawa komonontoNe. Alaꞌ ikohandoaꞌana tene hi Yesu mahi, Pueꞌ Ala hawaꞌi mohuku lekiꞌ-lekiꞌna toaꞌ to madosa nokomi kosabaraꞌNa. 26 Angkana hinewowoꞌena Pueꞌ Ala mampetidoꞌkimo komonontoNa, hingkeꞌna lekiꞌ-lekiꞌna toaꞌ to mepoꞌohi pe hi Yesu, hingkiꞌ norekeꞌ Pueꞌ Ala mononto i pampeꞌeleNa.
27 Mewaliꞌ, hawaꞌki masipatoꞌ mampokokodeꞌ alaꞌ notorimoki Pueꞌ Ala, handoꞌio nokomi petuntuta i Aturana hi Musa, angkana nokomi pepoꞌohinta pe Pueꞌ Yesu. 28 Hieꞌemo tungkaihane lolitangku: Mewaliki modame hante Pueꞌ Ala, handoꞌio ka walianta to moromiꞌ motuntuni Aturana hi Musa, angkana nokomi pepoꞌohinta pe hi Yesu. 29 Ba ipekirikei Pueꞌ Ala iomo Pueꞌnalu toYahudihi? Hawaꞌreꞌi woꞌo Io Pueꞌne toaꞌ ntaniꞌna? Hingkeꞌna ibahaꞌkei Io woꞌo Pueꞌna toaꞌ ntaniꞌna! 30 Alaꞌ haduolu Pueꞌ Ala, hei Io hadoduona to mampodameki hante wotaNa alaꞌ pepoꞌohinta, moromiꞌ toYahudi hante to handoꞌiohi toYahudi.
31 Mewaliꞌ, wadireꞌi topohentemo Aturane hi Musa, alaꞌ Pueꞌ Ala mampodamemoki hante wotaNa nokomi pepoꞌohinta, handoꞌio alaꞌ pampetuntuinta i Atura tiꞌo? Hawaꞌi! Inioꞌ nipekiri hatoꞌo! Angkana, alaꞌ pepoꞌohinta, hangangaa topoꞌilali Aturane hi Musa tiꞌo hingkeꞌna tobahaꞌi peleihane Pueꞌ Ala.