Bhalʉwa wa maba nɨnɔ Pɔlɔ ukpikilyo ndɨ Bakolito
Lɨkpʉmʉka la mambwa
Pɔlɔ ukpikilyo ndɨ bakilisito ba Kolito bhalʉwa yi nɨmʉ kumbuso wa nzɛ yimoti kakpiko nɨnɔ ka Bakolito wa mambwa. Ko ngbingo yi nɨnɔ, yʉkanana kɛgʉ ndɨ lugo ka Pɔlɔ na Bakolito. Kumbuso kakpiko bhalʉwa wa Bakolito wa mambwa, Pɔlɔ ɨndatʉ ndɨ kaʉnda, ʉtakanya bɛ bakolutono ko bhulyo bʉngama kakɨ, kyɛ ba kʉwa ndɨ kaʉbɨbya batʉ nɨbɔ bapága mʉtʉʉ ma bɔngɔ. Kumbuso yi, ukpikilyo ndɨ bhalʉwa kauyoyiso ka mapakʉ 2.3-4 na 7.8, nɨyɔ kɛgʉ bata na lɨsyɛ li nɨlɨ. Tito nɔ ʉmɨndɨlya ndɨ na bhalʉwa yi nɨnɔ, atakanya Pɔlɔ ka Makedhonia, apága mongoni manza ko bhulyo yi bɛ budhingi ka bakilisito Bakolito, boikonini. Ka Makedhonia, Pɔlɔ akpiko kʉwa ndɨ bhalʉwa wa maba ka Bakolito kowoniso magyagya kakɨ, na kautumiso bakilisito mambɛngɨ kumbuso wa ngbingo wa bʉkpɛkɨ-kpɛkɨ bi nɨbɔ (mapakʉ 1-7).
Ka Makedhonia, Pɔlɔ akpiko kʉwa ndɨ bhalʉwa wa maba ka Bakolito kowoniso magyagya kakɨ, na kautumiso bakilisito mambɛngɨ kumbuso wa ngbingo wa bʉkpɛkɨ-kpɛkɨ bi nɨbɔ (mapakʉ 1-7).
Ka mapakʉ 8-9, ʉpá ndɨ mʉtʉʉ komosisyo kaʉpʉna banyɔ nɨbɔ bapʉnga ndɨ ligubho li kyɛ busingyi na ɨbʉ bakilisito ba yangya ka Yelusalɛma (Wanda 1Bakolito.16). Luki limoti, bomuwoniso ka Pɔlɔ ba tʉ ndɨ bata aka ka kanisa ya Kolito. Kʉsɔ wa bhalʉwa yi nɨnɔ, owonisotʉ gɔnɨ bʉngama kakɨ abhɛ atʉtʉmbwa ( mapakʉ 10-13).
Bhalʉwa yi nɨnɔ amutumo na kumbu bɨdɛ. Pɔlɔ okpikotʉ gɔnɨ makpʉmʉka makpʉ ko bhulyo kakɨ mʉdɔngɔnɨ abhɛ yigyogyiso na bonziki kakɨ.