2
1 Kinili, nakɨnagʉ ndɨ bata bɨnza kaɨnda kamundoku kyɛ nakamulyisoni kumbu. 2 Nakamuliso kumbu, wanɨ nɔ togwo kʉwa na ɨyɨ magyagya ? Kikigʉ mbɛyɨ asɨ mʉtʉ yi nɨnɔ aka nɔ nalyisi kumbu ? 3 Namukpikilyo ndɨ bhalʉwa bɛyɔ+\fr 2.3 \ft Pɔlɔ akanzɨna wanʉ ko bhulyo bhalʉwa bemoti nɨnɔ ukpikilyo ndɨ Bakolito, kɛgʉ 1Bakolito. kyɛ ngbingo yi nɨnɔ nosilo mino ku kunu kʉ, makelyisonitɔgʉ kumbu ibunu nɨbɔ makwanana ndɨ kegwiso magyagya. Nakaibho bɨnza bɛ magyagya kamɨ a nɨmɔ kunu basɨ. 4 Namukpikilyo ndɨ bhalʉwa yi nɨnɔ nɨ nanalya kumbu kʉgbɛ, lɨmbɛngɨ ekondikonogini bɨsʉlʉ-sʉlʉ, bomomiso-miso betumini bɨdɛ. Nakamukpikilyogʉ ndɨ kyɛ lyoni kumbu, luki limoti, a ndɨ kowoniso sɨpanasɨsɔ sidhingi nɨsɔ na nosu kʉgʉ kunu.Kapɨlya mʉtʉ nɨnɔ ogyi bʉnyɛ
5 Kiko nɨ mʉmbanzʉ ogyini lɨkpʉmʉka lilyisiso kumbu, kegyilyigʉ ɨmɨ, luki limoti amugyilyi ibunu basɨ. Nakakya kʉwa bɔngɔ, nabɨkya ambɛ agyilyi bemoti-bemoti lugo kunu. 6 Mʉtʉ yi nɨnɔ amalyɨ kʉwa ka azabʉ yi nɨnɔ aka nɔ batʉ budhingi bápɨ bi. 7 Mbɨya wanʉ, okwononi kapɨlya mʉtʉ yi nɨnɔ na katumiso lɨmbɛngɨ kyɛ kolyonitɔgʉ kʉgbɛ wa adhɨkaga mino. 8 Kinili, nakamʉkʉnga ambɛ muwonisiloni mʉtʉ yi nɨnɔ sɨpananɨsɔ. 9 A bɛyɔ, wa namukpikilyo ndɨ mino bhalʉwa yi nɨnɔ, namʉkɨngɨla ndɨ bʉkɨngɨla kyɛ nibhi ikanɨ mɛmʉkanagatʉ ka makpʉmʉka masɨ. 10 Ngbingo yi nɨnɔ mapilyi mino mʉmbanzʉ, ɨmɨ napilyini gɔnɨ. Kiko nɨ nopilyini ka masɨ nɨmɔ nokwononi mino kapɨlya, nagyaga bɛyɔ ko bhulyo kunu ko miso ka Kilisito, 11 kyɛ mumuyoniso katindungulyogonitɔ. A bɛyɔ, tibhogotʉ bokoli kakɨ bayasɨ.
Pɔlɔ a lɨmbɛngɨ bɨda ka mugi ma Tolowa
12 Ngbingo yi nɨnɔ nosilo ndɨ mino ka mugi ma Tolowa kabɨkyaga Mongoni Manza ka Kilisito, Mombukwono-dhosu eukwilyo ndɨ mupumi bikpo kagya ligubho kʉ bɛyɔ. 13 Luki limoti, na ndɨ lɨmbɛngɨ bɨda kyɛ nakatakanyagʉ ndɨ mika-mama bɛyɔ ka Tito. Kinili, tasanana ndɨ na batʉ ba Tolowa, naga ka Makedhonia.
Yeso-Kilisito nɔ apága ɨbhɨbha
14 Kunzi avɨ ɨbhɨbha, kyɛ atɨmakyaga masyɛ masɨ ka mʉdɔngɔ ma ɨbhɨbha ka botutungyo nɨmɔ Kilisito atikpokyonisigo mino. Atɨva ibusu kokpokyoniso mongoni ka Kilisito ka bapa bayasɨ, mʉdɔngɔnɨ bɛyɔ sʉ yanza oumogo mino. 15 A bɛyɔ, ta abhɛ sʉ yanza ka Kilisito kambwa ko Kunzi. Sʉ yi nɨyɔ a ka batʉ nɨbɔ binisononi na muukuso na gʉtʉgʉ ka nɨbɔ bobungogo. 16 Ka batʉ nɨbɔ bobungogo, a sʉ ya kukwakʉ, nɨyɔ atɨkaga ka kukwakʉ. Luki limoti, ka nɨbɔ binisono na muukuso, a sʉ ya ɔbɨlɨ, nɨyɔ apága ɔbɨlɨ. Wanɨ sɛ kʉwa nɔ okwononi ka inguwo ya ligubho li nɨlɔ ? 17 Takɛgʉ ibusu abhɛ batʉ budhingi nɨbɔ bagyaga bokoli ka lɨkpʉmʉka ko Kunzi. Luki limoti, tabɨkyaga lɨkpʉmʉka ko Kunzi ka bungbingbili, kyɛ ɨyɨ nɔ atitikoku ndɨ mʉdɔngɔnɨ abhɛ bagya-ligubho ka Kilisito.