Bhalʉwa wa maba nɨnɔ Pɔlɔ ukpikilyo ndɨ Bakolito
Yuuso
1
1 Ɨmɨ Pɔlɔ, na atʉtʉmbwa ka Yeso-Kilisito pisi ka sɨpananɨsɔ ko Kunzi. Ibusu no mika-mama bɛyɔ ka Tɨmɔtɛɔ bɔ tamukpikilyi bhalʉwa yi nɨmʉ, ibunu batʉ ba Kanisa ko Kunzi ka Kolito na batʉ basɨ ko Kunzi nɨbɔ ba ka iwili ya Akaya. 2 Obhosu Kunzi ɨbʉ na Mombukwono-dhosu Yeso-Kilisito bamudukilyi ɨzɨyɔ na mazɨyɔ.Pɔlɔ akamigisyo Kunzi ɨbhɨbha
3 Tabhibhisini Kunzi, Abhakɨ Mombukwono-dhosu Yeso-Kilisito, Bhabha wa lɨmbɛngɨ lo kumbu, atitumisogo mambɛngɨ bongbingo basɨ. 4 Atitumisogo mambɛngɨ kʉsɔ wa bʉkpɛkɨ-kpɛkɨ kusu basɨ, kyɛ pisi ko ngu nɨyɔ tinisono na iyu kotukyoku kʉ kakɨ, takwananɨtɔ gɔnɨ ibusu kaʉgyɨlya batʉ bagɔgɔ bɛgɛyɔ. 5 A bɛyɔ, mʉdɔngɔnɨ bɛyɔ talyaga mino kumbu pa imoti na Kilisito ka yigyogyiso kakɨ dhidhidhi, ɨyɨ atitumisogo mambɛngɨ bɛgɛyɔ. 6 Kiko nɨ ibusu takaigyogyiso, a kyɛ mambɛngɨ amutumi, minisono na muukuso. Kiko nɨ batitumisini mambɛngɨ, a kyɛ mambɛngɨ amutumi gɔnɨ ibunu kyɛ mokibhyi yigyogyiso yi nɨyɔ mʉdɔngɔnɨ abhɛ ibusu. 7 Kinili, tikogo bakɨtambɨa na ibunu kyɛ tibhogotʉ ambɛ mʉdɔngɔnɨ bɛyɔ migyogyisogo mino pa imoti na ibusu, mambɛngɨ amutumogo bɛgɛyɔ pa imoti na ibusu.
8 Bomika-mama, to bi kapa bɛ wibhonito bʉkpɛkɨ-kpɛkɨ dhidhidhi nɨbɔ tabhangana ndɨ na ibu ka iwili ya Azia. Bʉkpɛkɨ-kpɛkɨ bi a ndɨ bapʉ kʉgbɛ, akɨtaga ngu kusu, takɛgʉ ndɨ bata gʉtʉgʉ na mʉtamanagɨ bɛ takwananatʉ kaiko na ɔbɨlɨ. 9 Ta ndɨ kaɨna abhɛ batikulyini ngbanga bɛ batɨmwɔgɨ. Igyonoso ndɨ bɛyɔ kyɛ takibhumonito kubhatʉ, luki limoti, tɨgʉmyɨ ko Kunzi nɨnɔ upupisogo bambanzʉ ka bambʉkʉ. 10 Kunzi nɔ atɨkʉlaga ndɨ ka inguwo ya kukwakʉ kwi nɨkwɔ, atɨkʉlagatʉ aka bata. A bɛyɔ, ta na bhaya kʉ kakɨ bɛ idhukulogotʉ katɨkʉlaga aka. 11 Ibunu gɔnɨ makatɨbhɨnɨka pisi ka likungoni. Kunzi ʉkanatʉ likungoni ka batʉ budhingi nɨbɔ bakatɨkʉngʉlya, atidukilyo bʉbʉnga. Kʉwa wagɔwa, batʉ budhingi babhibhisotʉ ndɛkɛ ko bhulyo kusu.
Pɔlɔ kɛgʉ bata na lɨgʉndʉ ka Kolito
12 Ɨbhɨbha kusu nɨ bʉdhɛmʉ ba mambɛngɨ kusu, tɨgyaga ndɨ ko miso ka batʉ basɨ, kʉgbɛ yi, lugo kunu na lɨmbɛngɨ la kisiso nɨ takɛgʉ na bokoli, mʉdɔngɔnɨ bɛyɔ Kunzi apaga mino. Yɨgya yi nɨyɔ kotukyokugʉ ndɨ ka yimibho ka bomikya bambanzʉ, luki limoti a ndɨ ɨzɨyɔ ko Kunzi. 13-14 A bɛyɔ, kʉsɔ wa babhalʉwa kusu, tamukpikilyogo ndɨ makpʉmʉka mi nɨmɔ aka mɔ makwanana katangʉlaga na kotombisyo. Nakaɨna abhɛ motombisyotʉ ndɛkɛ bɨnza lɨkpʉmʉka li nɨlɨ, kyɛ mbɨya yi nɨmʉ, makanotombisyigʉ mbɛyɨ. Lɨkpʉmʉka li a bɛ tɨbhɨbhaga ndɛkɛ na ibunu mabhɔbhɔ ka lɨsyɛ li nɨlɔ Yeso, Mombukwono-dhosu igoku ndɛkɛ mino.
15 Kabyɛnɛnɛ na mʉtamanagɨ mi nɨmɔ, na ndɨ mbɛyɨ na mʉsasa kaɨnda kamundoku ku kunu kʉ kyɛ minisoni na bʉbʉnga ka nganga ya yɨba. 16 Na ndɨ na mʉtamanagɨ kabyɛ pisi ku kunu kʉ, kumbuso yi nadhwɛ ka Makedhonia. Ngbingo kamɨ wakigoku kʉ bɛyɔ, nobyeku bata pisi ku kunu ibha mɛpágɨtɔ mukumbo nɨmɔ abhɨnɨka buti kamɨ ka lɨgʉndʉ la Yudhea. 17 Ambɛ, tamanaga yi nɨyɨ epupo ndɨ ka lɨmbɛngɨ aka ? Ikanɨ, wa nosisilyogo mino kagya luki, nagyaga yimibho ya lɨmbanzʉ ? Nakwanana kabɨkya bɛ « iyo » ikanɨ « kalɨ » ko ngbingo bemoti ? 18 Kunzi a dhɛmʉ, lɨkpʉmʉka nɨlɔ tamʉbɨkyaga ndɨ kɛgʉ ndɨ na mambɛngɨ maba. 19 Silivanɔ, Timotɛɔ na ɨmɨ tamʉbɨkyaga ndɨ mongoni ka Yeso-Kilisito, Miko Kunzi. Yeso kabɨkyagɨgʉ lɨkpʉmʉka na mambɛngɨ maba. Luki limoti, ɨyɨ nɨ « Iyo » nɨnɔ otukyoku ko Kunzi. 20 A bɛyɔ, Kunzi utulyoso ndɨ bagɔmɛ basɨ nɨbɔ ʉwanyaga ndɨ pisi ka Yeso. Kinili, pisi ka Yeso, takwanana kabɨkya bɛ « A asɨ bɛyɔ aka yɔ » kabhibhiso Kunzi. 21 Kunzi nɔ atipiko ibusu na ibunu ka bhaya pisi ka Kilisito. Ɨyɨ mombukwono-dhakɨ yi nɔ atɨpʉnaga. 22 Atibhiso ndɨ na likingyosi limoti bɛnɛ kowoniso bɛ ta batʉ kakɨ. Atitumiso na Lɨmbɛngɨ-Lotu abhɛ luki la mambwa ka makpʉmʉka mi nɨmɔ atɨwanyaga.