Bhalʉwa wa mambwa nɨnɔ Pɔlɔ ukpikilyo ndɨ Bakolito
Lɨkpʉmʉka la mambwa
Pɔlɔ akpikilyi musilyoni ka bakilisito ba gʉdʉ wa Kolito bhalʉwa yi nɨmʉ kyɛ ʉtʉmbʉlyagɨ bʉkpɛkɨ-kpɛkɨ nɨbɔ ingyo ndɨ lugo kabʉ na kausikisyo gɔnɨ ka yuuso dhidhi-dhi nɨyɔ ba ndɨ kamuusogo. Kinili, bhalʉwa yi nɨmʉ a na mʉtʉʉ manzanza mudhingi gʉtʉgʉ ko bhulyo ka bakilisito ba lɨsyɛ li nɨlɨ.
Ka mapakʉ 1-6, Pɔlɔ atʉmbʉlaga makpʉmʉka makpʉ, kʉgbɛ yi, nɨyɔ o ndi yɨgbananaga ka bakilisito na nɨyɔ o ndi bɨlya.
Ka mapakʉ 7-16, Osikisyo ka yuuso yakpʉ nɨyɔ o ndi ɔbɨlɨ ka bakilisito.
Kʉpakʉkɔ kwa 13, akapá mʉtʉʉ kʉgʉ wa sɨpananɨsɔ na nɨyɔ ya 15 kʉgʉ wa pupo ka mbʉkʉ.Kʉsɔ wa Ligubho ka Batʉtʉmbwa 18.1-17, bakwanana katangʉlaga bɛyɔ Pɔlɔ ʉbɨkyaga ndɨ mino Bayudha na batʉ bi nɨbɔ bakɛgʉ Bayudha Mongoni Manza ka Kolito. Nɨyɔ a ndɨ mʉpʉnganagɨ ma kanisa yi nɨyɔ. Kumbuso kasyɛsyɛ ka Kolito, aga ndɨ ka ɛfɛsɔ. Akpiko ndɨ bhalʉwa yi nɨmʉ kʉ bɛyɔ. A bhalʉwa ya maba nɨnɔ ukpikilyo ndɨ Bakolito(Wanda 5.9), luki limoti, nɨnɔ wa mambwa kɛgʉ bata. Kolito a ndɨ gʉdʉ wa ɨzangɨya ka zebhu wa mugi ma Giliki. Batʉ ba bagʉdʉ dhidhidhi bodhogoku ndɨ wa kagya bumbula. Bamibhogo ndɨ gʉdʉ yi nɨnɔ abhɛ pa ya gbɨlɨtɔ na nɨyɔ ya bɨlya.
Kʉsɔ wa bhalʉwa yi nɨmʉ takaɨna bɛyɔ akautumiso mino bakilisito lɨmbɛngɨ bɛ bakipónitɔgʉ bata ka bɨlya, luki limoti biki na ɔbɨlɨ ko bhulyo yibhibhiso Kunzi pisi ko ngu ya Lɨmbɛngɨ-Lotu(6.19-30).