Bhalʉwa nɨnɔ Pɔlɔ ukpikilyo ndɨ Balʉma
Lɨkpʉmʉka la mambwa
Pɔlɔ ukpikilyo ndɨ bakilisito ba Lʉma bhalʉwa yi nɨmʉ ngbingo yi nɨnɔ a ndɨ mino komosisyo lɨgʉndʉ kakɨ la masasaa lɨbɨkyaga Mongoni Manza. A ndɨ na musasa kadhwɛ ka Lʉma, kʉ a mbɛyɨ ndɨ mino nɨ kanodhwigʉ, aga miso ya ɨngɛngɛ, adhwɛ ka Esipani kobyokogoku Mongoni Manza (15.22-24). Ukpikilyo ndɨ bhalʉwa yi nɨmʉ kaʉbɨkya ɨndatʉ kʉ, apága gɔnɨ bakilisito mʉtʉʉ.
Bhalʉwa ka Balʉma akatʉmbʉlaga mongoni masɨ mi nɨmɔ Pɔlɔ abɨkyaga ndɨ. Mongoni mi ka bukudu nɨma: « Kunzi umibhogo bomikya-bambanzʉ abhɛ batʉ bongbngbili nɨ babinikyonini, bhaya yi nɨyɔ aka yɔ yɔ okwononi» (1.17).
Akanzɨna kʉgʉ wa makpʉmʉka masaa :
Katʉkya ka kʉpakʉkɔ kwa 1-8, akanzɨna ko bhulyo yʉkanana na kʉbangakʉ lugo wa mʉtʉʉ ma kanisa na bhaya ko Kunzi nɨnɔ Yeso-Kilisito apaga bɛ bagyɨ bɛyɔ. Kanisa wa Lʉma a ba bakilisito budhingi nɨbɔ bakɛgʉ bomikya-bayudha. Luki limoti, Bayudha ba bakpʉ ka Lʉma, bemoti-bemoti lugo kabʉ biitoni bakilisito. Ɨbʉ bidhukulogo kabyɛ bopisi ba ya mʉtʉʉ ma kanisa ka Bayudha aka. Ambɛ, batʉ bi nɨbɔ bakɛgʉ Bayudha nɨbɔ bɨɨta bakilisito bakwanana gɔnɨ kagya bɛyɔ ? Yuuso yi nɨyɔ ogbomiso ndɨ makanisa mi nɨmɔ ɨbʉkʉta ndɨ mbɨya bamʉ. Pɔlɔ abɨkya ndɨ batʉ basɨ ba batʉ banyɛ iki Bayudha ikanɨ batʉ bi nɨbɔ bakɛgʉ Bayudha. Wɨna sɛ kɛgʉ na mʉtʉʉ ma Kanisa gʉtʉgʉ mumoti aka nɨmɔ apaga bʉnyɛ. Luki limoti, bomikya bambaznʉ basɨ bakwanana kainisoniso na muukuso ko ngu ya Lɨmbɛngɨ-Lotu kyɛ Yeso-Kilisito akaʉtɨka ko Kunzi.
Katʉkya ka 9 - 11 Pɔlɔ akanzɨna ko bhulyo ya yʉkanana lugo wa Israeli, lɨvananza nɨlɔ Kunzi apʉnaga ndɨ, na bakilisito. Mʉdɔngɔnɨ abhɛ sɨbhʉkʉsɔ, bhaya ka bakilisito ɨbʉkʉta ka lɨtɔmbʉ ka Bayudha. Gʉtʉgʉ bɛyɔ, Bayudha basɨ bɨɨtagʉ bakilisito. Pɔlɔ akabɨkya bɛ Kunzi akaidhukulogo kaʉpa na kaʉmaga lɨvananza kakɨ. Lɨsyɛ limoti, bɛvananza bayasɨ pa imoti na nɨyɔ kakɨ bibhotʉ ndɛkɛ bʉnza ko Kunzi nɨyɔ owoniso kʉsɔ ka Yeso-Kilisito.
Katʉka ka mapakʉ 12 - 15 Pɔlɔ akanzɨna ko bhulyo ya ɔbɨlɨ okwononi kaiko kʉsɔ wa Kanisa ka Yeso-Kilisito. Akatʉmbʉlaga bɛyɔ bokwononi gɔnɨ mino kabhibhiso Kunzi na kaiko n ayʉkanana na batʉ bagɔgɔ. Akaʉngʉnga batʉ nɨbɔ bomogoni ka bhaya kaiko kaʉkanana na ba na bhaya bɨpɛkɛ-pɛkɛ. Kunzi ʉkʉlaga bomikya-bambanzʉ basɨ ka bʉnyɛ na kaʉkwakʉ. Mbɨya-mbɨya yi nɨmʉ, bakwanana kaiko na yʉkanana lugo kabʉ, na yʉkanana na Kilisito pisi ko ngu ya Lɨmbɛngɨ-Lotu.
Bhalʉwa ka Balʉma ɨsɨlya na yuuso dhidhi dhi ( mapakʉ 16). Akatwa mino ka balʉkʉ na boko budhingi. Bakilisito nɨbɔ bandɛlɨ biitono kʉwa buwobhi na nɨbɔ ba lɨsyɛ li nɨlɨ.