Balʉma 1

Bhalʉwa nɨnɔ Pɔlɔ ukpikilyo ndɨ Balʉma

Yuuso

1 Ɨmɨ Pɔlɔ, mʉgya-ligubho ka Yeso-Kilisito nɔ nakpiki bhalʉwa yi nɨmʉ. Kunzi ɛmaka ndɨ kaiko atʉtʉmbwa, ɛtɛ dhi kabɨkyaga Mongoni Manza kakɨ. 2 Mongoni Manza mi nɨmɔ Kunzi awanyaga ndɨ ndɛlɨ aka, pisi ka bogyalandʉ kakɨ kʉsɔ wa Mobiso Motu. 3-4 Akanzɨna ko bhulyo ko Mikakɨ, Mombukwono-dhosu Yeso-Kilisito nɨnɔ ɨbʉkʉta ndɨ abhɛ mʉmbanzʉ pisi ka lɨvananza ka ngama Dhaudhi. Luki limoti, wa opupo ndɨ mino ka mbʉkʉ, Lɨmbɛngɨ Lotu owoniso ndɨ no ngu bɛ a Miko Kunzi. 5 Ko pisi ka Yeso, Kunzi ɛpá ɨzɨyɔ kaiko atʉtʉmbwa ka ɨbhɨbha kakɨ, kauluto bambanzʉ ba bɛvananza bayasɨ kabhaɨlya na kagya Mʉtʉʉ kakɨ. 6 Ma gɔnɨ kʉsɔ ka batʉ bi nɨbɔ, ibunu bi nɨbɔ Kunzi amʉmakaga kaiko batʉ ka Yeso-Kilisito. 7 Nakamukpikilyo ibunu nɨbɔ ma kʉ ka Lʉma, ibunu basɨ nɨbɔ Kunzi amʉpa, amʉmaka kaiko batʉ kakɨ botu. Obhosu Kunzi na Mombukwo-dhosu Yesu-Kilisito amudukulyi ɨzɨyɔ na mazɨyɔ.

Pɔlɔ akapa kaɨnda kaʉnda Bakilisito ba Lʉma

8 Kambwa wa yasɨ, nakabhibhiso Kunzi kamɨ pisi ka Yeso-Kilisito ko bhulyo kunu basɨ, kyɛ mongoni ma bhaya kunu akomisikono ka ɔbɨlɨ wasɨ. 9 Kunzi nɨnɔ nagugubhyogo na lɨmbɛngɨ limoti kabɨkyaga Mongoni Manza ko mikakɨ, akaibho bɛ nakabɨkya lɨngʉnʉ. Akaibho bɛ nasyɛgɛ lɨmbɛngɨ kunu, 10 bongbingo basɨ wa nalʉmbago mino. Nakakʉnga Kunzi ambɛ kapa, eukulyi pisi kaɨnda kamʉnda. 11 A bɛyɔ, na na mʉsasa kʉgbɛ kamʉmɨna, kyɛ namʉpɨ́ apɛpɛ nɨnɔ wa Lɨmbɛngɨ-Lotu, ibha wikoni bakamaga bingumu ka bhaya. 12 Na kʉgbɛ, nakapa kamʉmɨna kyɛ totumisoni mambɛngɨ kʉsɔ wa bhaya.

13 Ibunu bomika-mamaaa, nakapa ambɛ wibhoni bɛ nikogotʉ ndɨ na mʉtamanagɨ nganga bɨkyɔ kaɨnda kamʉnda, luki limoti kadhwɛ mɔnɨ na bʉbwanʉ pisi kanoukwikonigʉ. Nakapa ambɛ ligubho kamɨ abʉkʉtɨ masɔlɔ lugo kunu bɛgɛyɔ abʉkʉta ndɨ mino ka bɛvananza bayagɔgɔ . 14 Nokwononi kaɨnda ka batʉ basɨ iki ka batʉ ba ɨbhɨbha ikanɨ ka nɨbɔ ba payaya, iki ka batʉ ba balʉwa ikanɨ ka nɨbɔ bakasʉmagʉ. 15 Kinili, na gɔnɨ na mʉsasa kobikyogoku Mongoni Manza kʉ kunu ka nɨbɔ mikogo ka Lʉma.

Ngu ya Mongoni Manza

16 Nakɛgʉ no suni kabɨkyaga Mongoni Manza. A bɛyɔ, a ngu nɨyɔ Kunzi uukusogo na iyu batʉ basɨ nɨbɔ babhalyaga, kapʉnga mbɛyɨ na Bayudha sɛ kʉwa nɨbɔ bakɛgʉ Bayudha. 17 A bɛyɔ, Mongoni Manza okowoniso bɛyɔ Kunzi uitisogo mino bambanzʉ kodhoku batʉ bongbingbili ko miso kakɨ. A pisi ka bhaya aka, katʉkya ka mʉpʉnganagɨ na kadhwɛ ka mulibo, mʉdɔngɔnɨ bɛyɔ Mobiso abɨkyaga mino bɛ : « Mʉtʉ wo ngbingbili iko ndɛkɛ na ɔbɨlɨ pisi ka bhaya. »+\fr 1:17 \ft Abakuki 2:4.

Ngbʉta ko Kunzi ka batʉ banyɛ

18 Kunzi akowoniso ngbʉta kakɨ kotukyoku kʉgʉ wa lɨsyɛ ka bʉnyɛ basɨ na yɨgya yanyɛ yasɨ ka bambanzʉ. Bakpɨngbaga lɨkpʉmʉka la lɨngʉnʉ pisi ka yɨgya kabʉ yanyɛ yi nɨyɔ. 19 Luki limoti, lɨkpʉmʉka nɨlɔ bambanzʉ bakwanana kaibho ko bhulyo ko Kunzi a bɨngbanganya, kyɛ ɨyɨ nɔ umibhiso ndɨ bɨngbanganya. 20 A bɛyɔ, katʉkya ndɨ wa aka wa Kunzi agya ndɨ mino ɔbɨlɨ, makpʉmʉka nɨmɔ kinisonogɨgʉ, akaɨbɨkya bɛ ngu kakɨ ya bɛnzɛ na bɛnzɛ na yimibhisikoso kakɨ bɛ a Kunzi, inisonogo bɨngbanganya ka makpʉmʉka nɨmɔ agya ndɨ. Kinili, bambanzʉ bakikigʉ no pisi yi nɨyɔ bɨgbʉka mino. 21 Bamibhotʉ Kunzi, luki limoti bakabangagɨgʉ na kamigisilyo ɨbhɨbha bɛyɔ okwononi mino. Luki limoti, bamʉ kabʉ odhonuku biyoyoyo, mambɛngɨ kabʉ ma bungingi otigoloni ko bhiti. 22 Bɨbhɨbhaga bɛ ba na yimibho, luki limoti ba bongingi. 23 Ka pa yibhibhiso Kunzi nɨnɔ kokwogigʉ, bobhibhosogo kʉwa ɨbʉ gbɨlɨtɔ payaya nɨtɔ bambanzʉ bagya ka likingyosi ka mʉtʉ wa lɨtɔmbʉ, ikanɨ la bombu, ikanɨ la banyama ba magʉ makwanganya, ikanɨ la banyama nɨbɔ bolutikonogo wasɨ.

24 Kinili, Kunzi ʉsa kʉwa ndɨ kagya makpʉmʉka ma mʉsʉgʉ kabyɛnɛnɛ na mʉsasa ma mambɛngi kabʉ, kʉwa wa gɔwa, bapʉnga kagyɨlyana makpʉmʉka mo suni lugo kabʉ. 25 Bogomosyono lɨngʉnʉ nɨlɔ ko Kunzi na lɨkpʉmʉka la kʉbɔbɔkʉ. Banobhibhiso na kogugubhyo makpʉmʉka nɨmɔ Kunzi agya ndɨ nɨ bakɛgʉ kabhibhiso ɨyɨ Kunzi mombukwono-dhakɨ. Ɨyɨ nɨnɔ okwononi na ɨbhɨbha ka bɛnzɛ na bɛnzɛ ! A bɛyɔ.

26 Kinili, Kunzi ʉsa ndɨ ka mʉsasa ma nzʉyɨ nɨmɔ mʉpá suni. Boko kabʉ banasyɛnɛnɛ lugo kabʉ, yɨgya yi nɨyɔ a dhi na nɨyɔ igyonosogo. 27 Mʉdɔngɔnɨ bɛgɛyɔ, balʉkʉ basa kasyɛ na boko, banapa kayʉngana na kasyɛnɛnɛ lugo kabʉ; banagya lɨkpʉmʉka lo suni. Kʉwa wa gɔ wa, bakainiso na mʉkalya nɨmɔ okwononi na yɨgya yanyɛ kabʉ.

28 Yɛkɨ bakapagʉ ndɨ kamibho Kunzi, Kunzi ʉsa ndɨ kʉsɔ wa yimibho kabʉ ya bungingi, kinili bakagya nɨlɔ bakakwanigʉ bi kagya. 29 Babutumo na lɨkpʉmʉka nɨlɔ kɛgʉ la bungbingbili, bʉnyɛ, mʉsasa, dɨya; babutumo na imi, banamwɔnɔnɔ lugo kabʉ, ipʉmbʉ, kʉbɔbɔkʉ na banagya nɨlɔ aka lɔ bopo. Banabʉkʉlyanaga makpʉmʉka, 30 banabɨkyana makpʉmʉka manyɛnyɛ; ba bomuyoniso ko Kunzi, bakɛgʉ kabangana, batʉ ba bakɨbhɨnɨka na bayɨbhɨbha, batʉ ba bokoli na batʉ bakugbomiso babʉkʉta kabʉ bamʉ. 31 Bakɛgʉ na yimibho, banabɨkya makpʉmʉka nɨ bakɛgʉ kagya, batʉ ba lɨmbɛngɨ lapʉ nɨ bakɛgʉ no kumbu na batʉ bagɔgɔ. 32 Wɨkwɛ sɛ, bibhotʉ mʉngɨmbɔ ko Kunzi nɨmɔ akabɨkya bɛ batʉ nɨbɔ bɨgyaga bɛyɔ bokwononi na kukwakʉ. Gʉtʉgʉ bɛyɔ aka yɔ, bakaidhukulogo aka na yɨgya yi nɨyɔ, banʉbhaɨlya gɔnɨ nɨbɔ bagyaga makpʉmʉka mi nɨmɔ.