Togyogini nɨlɔ ubosilo gɔnɨ bɛngɛnɨ
15
1 Ibusu nɨbɔ ta bapʉpʉ ka bhaya, tokwononi kaʉtʉngbʉlaga batʉ nɨbɔ ba na bʉpɔ ka bhaya. Tokokwononigʉ kakɨsa nɨlɔ aka lɔ atibosilo. 2 Okwononi bɛ mʉtʉ yɨkaka-yɨkaka lugo kusu akɨsɨ kaubosilo bɛngɛnɨ, kaʉtʉngbʉlaga, na kaungotiso ka bhaya. 3 A bɛyɔ, Kilisito kakɨsagɨgʉ ndɨ nɨlɔ abosilogo ndɨ ɨyɨ mombukwono- dhakɨ. Luki limoti, igyonoso ndɨ bɛyɔ Mobiso ko Kunzi ikpiko mino bɛ : « Kunziooo ! Mosikoni nɨmɔ bʉsɨkaga ndɨ, emigilyoku kʉwa ndɨ ɨmɨ+\fr 15.3 \ft Mambʉ 69.10..» 4 Masɨ nɨmɔ ikpikogo ndɨ ndɛlɨ ka Mobiso ko Kunzi, ikpikogo ndɨ kyɛ atɨtɨwɨ. Mobiso mi nɨmɔ atɨpága lɨmbɛngɨ lɨnda, atitumiso mambɛngɨ bɛkyɛ tiki na mʉtamanagɨ. 5 Kunzi nɨnɔ apága lɨmbɛngɨ lɨnda na otumiso mambɛngɨ, amʉpɨ́ yʉkanana lugo kunu mʉdɔngɔnɨ bɛyɔ Yeso-Kilisito apaga mino. 6 Kʉwa wa gɔ wa, ibunu basɨ, miko kabhibhiso Kunzi, Abhakɨ Mombukwono-dhosu Yeso-Kilisito na lɨyʉ limoti. Mongoni Manza a ko bhulyo ka batʉ basɨ
7 Tilyononi lugo kunu kyɛ Kunzi avɨ ɨbhɨbha mʉdɔngɔnɨ bɛgɛyɔ Kilisito amʉtɨlya ndɨ mino. 8 A bɛyɔ, nakamʉbɨkya lɨngʉnʉ ambɛ Kilisito odhoku ndɨ kaiko mʉgya-ligubho ka Bayudha kowoniso lɨngʉnʉ ko Kunzi pisi kautulyoso bagʉmɛ nɨbɔ Kunzi ʉpá ndɨ batɨtabʉ. 9 Odhoku ndɨ gɔnɨ kyɛ batʉ bi nɨbɔ bakɛgʉ Bayudha babhibhisi Kunzi ko bhulyo lɨmbɛngɨ kakɨ lo kumbu, bɛgɛyɔ Mobiso abɨkya mino bɛ :
« Kinili, nubhibhisogo ndɛkɛ lugo ka batʉ nɨbɔ bakɛgʉ Bayudha,
nɨmbɨlaga ndɛkɛ ko bhulyo ɨbhɨbha yo lino kakʉ. »+\fr 15:9 \ft Mambʉ 18:50.
10 Mobiso abɨkyatʉ gɔnɨ bɛ :
« Ibunu, batʉ nɨbɔ makɛgʉ Bayudha, gwoni magyagya pa imoti na
lɨvananza nɨlɔ Kunzi apʉnaga ndɨ ! »+\fr 15:10 \ft Yɨgɨlya Mʉtʉʉ 32:43.
11 Obikyoku bata bɛ :
« Ibunu bɛvananza bayasɨ, mubhibhisoni Kunzi,
ibunu batʉ basɨ, mubhibhisoni. »+\fr 15:11 \ft Mambʉ 117:1.
12 Mʉgyalandʉ Isaya abɨkya gɔnɨ bɛ :
« Mʉtʉ bemoti ka lɨvananza ka Yɛsɛ+\fr 15:12 \ft Yɛsɛ : A ndɨ abhakɨ Dhaudhi. odhokuto ndɛkɛ,
amaga ndɛkɛ, alya bʉngama kʉgʉ wa bɛvananza,
na bɛvananza bobhiso ndɛkɛ mʉtamanagɨ kabʉ kʉ kakɨ. »
13 Kunzi nɨnɔ apága mʉtamanagɨ, amutumisi na magyagya na mazɨyɔ ko bhulyo bhaya nɨyɔ ma noyu kʉ kakɨ, ibha motumi na mʉtamanagɨ pisi ko ngu ya Lɨmbɛngɨ-Lotu.
Pɔlɔ akabɨkyaga Mongoni Manza ka batʉ nɨbɔ bakɛgʉ Bayudha
14 Bamamakɨ, ɨmɨ bɨkpɛ nakaibho bɨnza ambɛ ma batʉ banza kʉgbɛ, butumo na masɨ nɨmɔ okwononi bɛ mibhi, mibhogotʉ kapánana mʉtɨwɨ. 15 Luki limoti, namukpikilyogɔtʉ makpʉmʉka mudhingi kʉsɔ wa bhalʉa kamɨ nɨ nakɛgʉ na kʉbangakʉ, kamutomosyo mʉtʉʉ nɨmɔ mʉkana ndɨ. Nokpikogo ndɨ bɛyɔ ko bhulyo ɨzɨyɔ nɨyɔ Kunzi ɛpá ndɨ, 16 kaiko mʉgya-ligubho ka Yeso-Kilisito lugo wa bɛvananza nɨbɔ bakɛgʉ Bayudha. Nakagya ligubho abhɛ kumu ko Kunzi kabɨkyaga Mongoni Manza kakɨ, ibha batʉ nɨbɔ ba kɛgʉ Bayudha bɨɨtɨ apɛpɛ nɨnɔ abosilogo Kunzi, apɛpɛ nɨnɔ Lɨmbɛngɨ-Lotu abubisoni bitu. 17 Kʉsɔ wa matɨkana kusu na Yeso-Kilisito, nakwanana nɛkɨ kaɨbhɨbha ko bhulyo ligubho nɨlɔ nakagyɨlya Kunzi. 18 A bɛyɔ, nakɨkpʉnda kabɨkya lɨkpʉmʉka, iko nɨlɔ aka lɔ Kilisito otulyoso ndɨ pisi kʉ kamɨ kyɛ batʉ nɨbɔ bakɛgʉ Bayudha bamibhi Kunzi. Agya ndɨ nɨlɔ pisi ka mʉnzɨna na yɨgya kamɨ, 19 pisi ko ngu ya mokingyosi na makpʉmʉka mʉmbanga-mbanga nɨmɔ nagya ndɨ ko ngu ya Lɨmbɛngɨ-Lotu. Kinili, nabɨkyaga ndɨ Mongoni Manza ka Kilisito ka ba pa bayasɨ katʉkya ka Yelusalɛma na kadhwɛ ka iwili ya Ililiko. 20 Luki limoti, na ndɨ kapa kabɨkyaga Mongoni Manza asɨ ka bapa nɨbayɔ bakanukonigʉ mino mongoni ka Yeso, kyɛ nakɛgʉ ndɨ kapa kopiko ka mubumbe ka mʉtʉ nagɔgɔ. 21 Nagya ndɨ mʉdɔngɔnɨ bɛyɔ Mobiso abɨkya mino bɛ :
« Batʉ nɨbɔ bakʉbɨkyagagʉ ndɨ Mongoni kakɨ, bamɨnatʉ ndɛkɛ,
a bɛyɔ, batʉ nɨbɔ bakʉkanagʉ ndɨ Mongoni kakɨ, botombisyotʉ ndɛkɛ. »+\fr 15:21 \ft Isaya 52:15.
Pɔlɔ a na tamanaga kaaga ka Lʉma
22 Ligubho lo Mongoni Manza lɔ ɛkpɨngba ndɨ nganga bɨkyɔ kaɨnda ku kunu kʉ. 23 Luki limoti, mbɨya wanʉ nomoni ligubho kamɨ ka bewili bi nɨbayɨ. Kʉsɔ wa byanga budhingi, nikogo na mʉsasa kaɨnda kamʉmɨna. 24 Nabyɛ banʉ kʉ, ngbingo yi nɨnɔ niko banʉ mino kaɨnda ka Ɨsɨpanyɛ. A bɛyɔ, na na mʉtamanagɨ kamʉmɨna wa niko banʉ mino kakɨtaga kʉ bɛyɔ. Togwo banʉ na ibunu magyagya kʉsɔ wa masyɛ makɛdɛ. Na gɔnɨ kapa ambɛ ipoponito banʉ ko bhulyo lɨgʉndʉ li nɨlɔ. 25 Luki limoti, mbɨya wanʉ, nakaɨnda ka Yelusalɛma kagya ligubho pa imoti na batʉ ko Kunzi nɨbɔ kʉ bɛyɔ. 26 A bɛyɔ, bakilisito ba iwili ya Makedhonia na nɨbɔ ba Akaya bukononi bi, bʉmʉmʉla bangyɔ ko bhulyo ka batʉ ba yangya nɨbɔ ba lugo ka batʉ ko Kunzi nɨbɔ ba ka Yelusalɛma. 27 Bukononi bi nɨ ɨbʉ aka kaʉmʉmʉla bangyɔ bi nɨbɔ kyɛ okwononi bi kagya bɛyɔ aka yɔ. A bɛyɔ, batʉ nɨbɔ bakɛgʉ Bayudha binisono ndɨ na muuukuso ko bhulyo ka Bayudha, okwononi nɛkɨ bɛ ɨbʉ busingyitɔ gɔnɨ Bayudha na mukumbo kabʉ. 28 Wa nama banʉ mino kaʉlʉpyá bangyo bi nɨbɔ, nabyɛ banʉ pisi kʉ kunu kaaga ka Ɨsɨpanyɛ. 29 Nakaibho ambɛ wa nosilo banʉ mino ku kunu kʉ, nadhwɛ banʉ mutumo na bʉbʉnga ka Yeso-Kilisito bɨdɛ.
30 Bamamakɨ, nakaɨtatanaga na ibunu ko lino ka Mombukwono-dhosu Yeso-Kilisito, na ka sɨpananɨsɔ nɨsɔ Lɨmbɛngɨ-Lotu apága ambɛ isingyoni ka lʉnga nɨlɔ na mino, pisi ka malʉmba. 31 Ilumbilyoni ambɛ Kunzi ebuulyogitɔ ka mabɔkʉ ka bomuyoniso bo Mongoni Manza nɨbɔ ka Yudhɛya, ibha batʉ ko Kunzi nɨbɔ ka Yelusalɛma bʉtɨlyɨtɔ bangyɔ nɨbɔ nakaɨnda na ibu. 32 Kʉwa wa gɔ wa, Kunzi kapa, nadhwɛ banʉ ku kunu kʉ, mutumo na magyagya bɨdɛ. Noyukumo banʉ mino yɨkɛdɛ lugo kunu. 33 Kunzi nɨnɔ apága mazɨyɔ iki pa imoti na ibunu basɨ. A bɛyɔ.