Balʉma 16

Pɔlɔ akaumuusogo Bakilisito Balʉma

1 Namusili mʉsalɨ kusu bɛyɔ ka Foibhɛ nɨnɔ a mʉgya-ligubho ka kanisa ya Kekulɛa. 2 Mutilyoni bɨnza ko lino ka Mombukwono-dhosu, bɛyɔ okwononi mino kaʉgyɨlya batʉ ko Kunzi. Musingyoni ka masɨ nɨmɔ iko na nzoyi yi. A bɛyɔ, ɨyɨ obhinikoni buti ka batʉ budhingi gʉtʉgʉ ɨmɨ aka mombumkwono-dhaki yi.

3 Namuusogito Pelesila ɨbʉ na mbʉnyakɨ bɛyɔ ka Akila, ibusu na ɨbʉ ta bagya-ligubho ka Yeso Kilisito. 4 Ba ndɨ buwobhi kolumwogo ko bhulyo kamɨ. Kɛgʉ asɨ ɨmɨ aka nɔ nakaumigisyo ɨbhɨbha, luki limoti makanisa ma giyo ka batʉ nɨbɔ bakɛgʉ Bayudha bakagya bɛgɛyɔ. 5 Numuusogito gɔnɨ batʉ ba kanisa nɨbɔ bamʉmʉkanaga ka ndabʉ kabʉ. Namuusito wai-dhamɨ bɛyɔ ka Ɨpɛnɛtʉ nɨnɔ a mʉtʉ wa mambwa ka bhaya ka iwili ya Azia*. 6 Namuusogito Malia nɨnɔ amugugubhyo ndɨ kʉgbɛ. 7 Numuusogito bava-kʉ-kamɨ bɛyɔ ka Andoloniko na Yunia, nɨbɔ batigwi ndɨ na ɨbʉ ka bhɔlɔkɔ. Ba na ɨbhɨbha yidhingi lugo ka batʉtʉmbwa*, ɨbʉ gɔnɨ bɔ bɨɨta ndɨ bakilisito kambwa kamɨ.

8 Namuusito Apuliatʉ, wai-dhamɨ mʉpaka kʉsɔ ka Mombukwono-dhosu. 9 Namuuso Ulubhano, mʉgya-ligubho ka Kilisito pa imoti na ibusu, na Sitakisi, wai-dhamɨ mʉpaka. 10 Namuuso Apɨlɛ, nɨnɔ igwinonogo ndɨ ka bhaya. Numuusogo gɔnɨ batʉ ba ndabʉ ka Alisitobhulu. 11 Namuusito mamakɨ bɛyɔ ka Elodhiyo. Numuusogo batʉ nɨbɔ babɨnɨkyana Mombukwono-dhosu, nɨbɔ bikogo ka ndabʉ ka Nalukiso. 12 Namuusogito Tɨlɨfɨna ɨbʉ na Tɨlɨfʉsa. Boko bi nɨbɔ bagugubyo ndɨ Mombukwono-dhosu na kɛkɛlɛ. Namuusogo gɔnɨ wai-dhamɨ bɛyɔ ka Palusi, nɨnɔ agyɨlya ndɨ gɔnɨ Mombukwono-dhosu ligubho na kɛkɛlɛ. 13 Namuusito Lʉfʉ, nɨnɔ mʉgya-ligubho wa lɨngʉnʉ ka Mombukwono- dhosu na amakɨ. Ɨyɨ mama yi nɨnɔ navaga gɔnɨ abhɛ mama aka bɨkpɛ. 14 Namuusito Asukilisito, Fuligo, Ɨlɨmɛ, Patʉlʉbha, Ɨlɨma na bomomosu nɨbɔ ba pa imoti na ɨbʉ. 15 Namuusito Fɨlɔlɔgɔ na Yulia, Nɨlɨɔ na mʉsalɨ kakɨ, Ulipa na batʉ ko Kunzi basɨ nɨbɔ ba pa imoti na ɨbʉ. 16 Tilyononi, mopututonogo abhɛ bomika-muko. Makanisa ka Kilisito masɨ amumuusogito.

Lɨkpʉmʉka la mulibo

17 Ibunu bamamakɨ, nakamʉbɨkya ambɛ wiminyonito na batʉ nɨbɔ bakamakya yɨgbananaga, kyɛ bakaʉtʉmba bakilisito ko pisi ya bungbingbili, banagya dhi na nɨlɔ bamuwoniliso ndɨ. Makubyenitɔgʉ. 18 A bɛyɔ, inguo ya batʉ bi nɨbɔ bakɛgʉ kagugubhyo Kilisito, Mombukwono-dhosu, luki limoti bakogugubyo asɨ bamʉma kabʉ aka. Pisi ka mʉnzɨna kabʉ mandɛngɛ-ndɛngɛ na ma kʉbɔbɔkʉ, bʉbɔbɔgɔ batʉ ba mambɛngɨ mopoli. 19 Batʉ basɨ bibhogotʉ bɛyɔ ibunu mabangaga mino Mombukwono-dhosu. Kinili, nakogwo magyagya ko bhulyo kunu. Nakapa ambɛ wikoni bagɛgɛlɛ bʉgya lɨkpʉmʉka lanza, miko bakɨmɨnya kakya bʉnyɛ. 20 Kunzi, nɨnɔ apága mazɨyɔ adɨtagatʉ banʉ Mumuyoniso kusili wa bakagba kunu bɨnvɨ nvɨ nvɨ. Ɨzɨyɔ ka Mombukwono-dhosu Yeso-Kilisito iki pa imoti na ibunu.

21 Timotio, nɨnɔ tagyaga na ɨyɨ ligubho amumuusito. Bava-kʉkamɨ bɛyɔ ka Lukio, Yasɔna na Sosipateli bamumuusogito gɔnɨ. 22 Ɨmɨ Telitio, nɨnɔ nokpiki mobiso mi nɨma, namumuusito ko lino ka Mombukwono-dhosu.

23 Gayo, nɨnɔ etilyi bi kʉ kakɨ amumuusogito. Batʉ ba kanisa bamʉmʉkanaga kʉ kakɨ. Ɨlasɨtɔ nɨnɔ obuulyogo buyi ba gʉdʉ amumuusito, gʉtʉgʉ momosu bɛyɔ ka Kwalatʉ.

[\v 24 Ɨzɨyɔ ka Mombukwono-dhosu Yeso-Kilisito iki pa imoti na ibunu basɨ. A bɛyɔ.]

Bhibhiso ya mulibo

25 Tabhibhisini Kunzi! Ɨyɨ nɔ akwanana kamungotiso ka bhaya, mʉdɔngɔnɨ bɛyɔ Mongoni Manza nɨmɔ nakabɨkyaga o mino kabɨkya. Pisi ka Mongoni Manza mi nɨmɔ, Kunzi ibhisikoso ndɨ lɨkpʉmʉka li nɨlɔ a ndɨ la kɨsʉma katʉkya ka bʉndɛlɨ aka. 26 Luki limoti mbɨya wanʉ, ipupisoni kʉwa bɨngbanganya pisi ka mobiso ka Bogyalandʉ, Kunzi wa bɛnzɛ na bɛnzɛ opóni mʉtʉʉ bɛkyɛ bɛvananza bayasɨ babhaɨlyɨ, bagya mʉtʉʉ mi nɨmɔ. 27 Kunzi mʉkaka, mombukwono bʉgɛgɛlɛ basɨ avɨ ɨbhɨbha pisi ka Yeso Kilisito ka bɛnzɛ na bɛnzɛ ! A bɛyɔ.