Makabhisonito mʉmbanzʉ na mʉkɔmbʉ
14
1 Mutilyoni bɨnza mʉtʉ nɨnɔ a na bʉpɔ ka bhaya nɨ makɛgʉ na ɨbʉ na bodongoso ka mʉtamanagɨ kakɨ. 2 Mʉtʉ nagɔgɔ ɨnaga pisi ka bhaya kakɨ bɛ akwanana kalya malɨlɨ masɨa. Luki limoti, mʉtʉ yi nɨnɔ a na bʉpɔ ka bhaya alyaga ɨyɨ asɨ mapakʉ aka. 3 Mʉtʉ yi nɨnɔ alyaga ɨyɨ makpʉmʉka masɨ kokwononigʉ kamɨna payaya nɨnɔ alyaga ɨyɨ mapakʉ aka. Na gɔnɨ, nɨnɔ alyaga mapakʉ kabhisonito na mʉkɔmbʉ nɨnɔ alyaga makpʉmʉka masɨ, kyɛ Kunzi atilyoni. 4 Ɨwɛ nɨ wanɨ kabhiso mʉgya-ligubho ka mʉtʉ nagɔgɔ na mʉngɨmbɔ ? Mʉgya-ligubho yi nɨnɔ kigwinonogo ka ligubho kakɨ ikanɨ kasa, nɨlɔ andi mbʉkwakɨ aka. Luki limoti, igwinonogo ka ligubho kakɨ kyɛ Mombukwono-dhosu nɔ a no ngu kamomoso.5 Mʉtʉ nagɔgɔ ɨnaga abhɛ masyɛ magɔgɔ mɔ a na ɨzangɨya kakɨtaga, luki limoti ka mʉtʉ nagɔgɔ, masyɛ masɨ a mʉdɔngɔnɨ. Okwononi mʉtʉ wasɨ yɨkaka-yɨkaka ibhi bɨnza ka lɨmbɛngɨ kakɨ nɨlɔ akabhaɨlya. 6 Mʉtʉ nɨnɔ obhibhisogo lɨsyɛ limoti kakɨtaga magɔgɔ, agyaga bɛyɔ ko bhulyo yɨpá Mombukwono-dhosu ɨbhɨbha. Mʉtʉ nɨnɔ alyaga malɨlɨ masɨ, agyaga bɛyɔ ko bhulyo yɨpá Mombukwono-dhosu ɨbhɨbha kyɛ amigisyogo Kunzi ɨbhɨbha ko bhulyo malɨlɨ. Mʉtʉ nɨnɔ alyaga ɨyɨ mapakʉ aka agyaga bɛyɔ ko bhulyo yɨpá Mombukwo-dhosu ɨbhɨbha, ɨyɨ amigisyo gɔnɨ Kunzi ɨbhɨbha. 7 A bɛyɔ, kɛgʉ na mʉtʉ gʉtʉgʉ bemoti aka lugo kusu nɨnɔ a na ngu kʉgʉ wa ɔbɨlɨ kakɨ ka mombukwana-dhakɨ yi, kɛgʉ gɔnɨ na mʉtʉ gʉtʉgʉ bemoti aka nɨnɔ a no ngu kʉgʉ wa kukwakʉ kakɨ ka mombukwana-dhakɨ yi, 8 takiko na ɔbɨlɨ, a ko bhulyo yibhibhiso Mombukwono-dhosu, takokwo, a ko bhulyo kabhibhiso ɨyɨ aka gɔnɨ. Kinili, kiko gʉtʉgʉ kanɨ ta na ɔbɨlɨ ikanɨ tokwini, ta mukumbo ka Mombukwono-dhosu. 9 A bɛyɔ, Kilisito okwo ndɨ, opupo ka mbʉkʉ kyɛ iki Ngama ka batʉ nɨbɔ bokwogoni na nɨbɔ ba bubisi. 10 Luki limoti, ɨwɛ, ko bhulyo ɨkɨ yɔ wabhisogo mino mamakʉ na mʉngɨmbɔ ? Na ɨwɛ, ko bhulyo ɨkɨ yɔ wamɨnaga mino mamakʉ payaya ? Ibusu basɨ tiko ndɛkɛ ko ngbongu kambwa ko Kunzi. 11 A bɛyɔ, Mobiso ko Kunzi abɨkya bɛ :
« Ɨmɨ, Mombukwono-dhonu, nakamʉbɨkya lɨngʉnʉ bɛ :
batʉ basɨ bobuno ndɛkɛ moli kambwa kamɨ,
na ɨbʉ basɨ bebhibhiso ndɛkɛ. »+\fr 14:11 \ft Isaya 45.23.
12 Kinili, mʉtʉ yɨkaka-yɨkaka lugo kusu ozukogo ndɛkɛ lɨkpʉmʉka kakɨ mombukwono-dhaki yi kambwa ko Kunzi.
Wakagwisisonito mamakʉ ka bʉnyɛ
13 Tosini nɛkɨ kobhisono na mʉkɔmbʉ lugo kusu. Luki limoti, okwononi kagya bɛ : Takagyɨlyonito mʉmbanzʉ lɨkpʉmʉka gʉtʉgʉ limoti aka nɨlɔ akwanana kasokisogo ikanɨ kagwisiso. 14 Matɨkana kamɨ na Mombukwono-dhosu Yeso emibhisoni bɨnza bɛ malɨlɨ gʉtʉgʉ mimoti aka kɛgʉ ɔpɛ. Luki limoti, mʉmbanzʉ kɨna bɛ a ɔpɛ, alya ka yakɔlyɨ aka, mʉtʉ yi nɨnɔ imokyini nɨ ɨyɨ aka ka bʉnyɛ. 15 Wakiko mʉtʉ wanyɛ ko miso ka mamakʉ ko bhulyo malɨlɨ nɨmɔ walyaga, wakɛgʉ na sɨpananɨsɔ. Wakoputikosonito bhaya ka mʉtʉ nɨnɔ Kilisito akwilyogo ndɨ ko bhulyo ya malɨlɨ. 16 Kokwononigʉ bɛ luki nɨlɔ a lanza kʉ kunubinisoni abhɛ kiko luki lanyɛ ko miso ka batʉ bagɔgɔ. 17 A bɛyɔ, Bʉngama ko Kunzi kɛgʉ ko bhulyo malɨlɨ ikanɨ ko bhulyo luki limwo. Luki limoti, a ko bhulyo makpʉmʉka nɨmɔ Lɨmbɛngɨ-Lotu apága : bungbingbili, mazɨyɔ na magyagya. 18 Mʉtʉ yi nɨnɔ agugubhyogo Kilisito ko pisi yi nɨyɔ, ikogo mʉtʉ wanza ko miso ko Kunzi na ko miso ka bambanzʉ.
19 Kinili, tokisini na kɛkɛlɛ lɨkpʉmʉka nɨlɔ a na ɨzangɨya ko bhulyo yɨpá mazɨyɔ, na nɨlɔ atiukwilyo pisi katʉngbʉlanaga ka bhaya. 20 Makoputonitɔgʉ ligubho ko Kunzi ko bhulyo malɨlɨ. A lɨngʉnʉ bɛ takwanana kalya malɨlɨ masɨ, luki limoti, kɛgʉ bɨnza kalya luki nɨlɔ akwanana kagwisiso bɛngɛnɨ. 21 Kɛgʉ bɨnza kalya makɔlɔ ikanɨ komwo makana na kagya makpʉmuka masɨ nɨmɔ akwanana kagwisiso mamakʉ. 22 Buulyogo tamanaga kakʉ mombukwono-dhakɨ ko bhulyo makpʉmʉka mi nɨma kambwa ko Kunzi. Ɨgyagya ka mʉtʉ nɨnɔ kikogɨgʉ na botumo ka lɨmbɛngɨ kanɨ akapa kagya lɨkpʉmʉka ! 23 Luki limoti, Kunzi amakya ndɛkɛ ka mʉngɨmbɔ mʉmbanzʉ nɨnɔ akalya malɨlɨ na botumo kyɛ nɨyɔ akowoniso bɛ kɛgʉ wakamaga ka bhaya. Lɨkpʉmʉka lasɨ nɨlɔ kɛgʉ kotukyoku ka bhaya a bʉnyɛ.