Ubongogonito bangama
13
1 Mʉtʉ wasɨ okwononi kaʉbanga bangama kyɛ bʉngama basɨ otukyogoku ko Kunzi. Batʉ basɨ nɨbɔ ba ka bʉngama Kunzi nɔ ubhisogo. 2 Kinili, mʉmbanzʉ nɨnɔ agyaga dongoso na bangama, agyaga dongoso ka nɨlɔ Kunzi omoso. Batʉ nɨbɔ bagyaga bɛyɔ bimokyisiso ndɛkɛ nɨ ɨbʉ bamombukwono-dhabʉ ka mʉngɨmbɔ. 3 A bɛyɔ, batʉ nɨbɔ bagyaga bʉnza bakʉbangagɨgʉ bangama, luki limoti nɨbɔ bagyaga bʉnyɛ aka bɔ bʉbangaga. Wapatʉ kaiko kanɨ wakɛgʉ kaʉbanga bangama ? Gya nɛkɨ bʉnza, ngama ubhibhiso, 4 kyɛ a ka ligubho ko Kunzi kaʉkpamya kagya lɨkpʉmʉka lanza. Luki limoti, wakiko kagya bʉnyɛ, ɛɛɛ ! Mʉbangatʉ kyɛ akwananatʉ kaʉpá azabʉ. Ɨyɨ a ka ligubho ko Kunzi kowoniso ngbʉta ko Kunzi ka batʉ nɨbɔ bagyaga bʉnyɛ. 5 Kinili, okwononi kaʉbanga bangama, kɛgʉ asɨ ko bhulyo yɨkya ngbʉta ko Kunzi aka, luki limoti kyɛ lɨyʉ kunu la kʉsɔ akamʉkpamya kagya bɛyɔ.6 Kinili gɔnɨ makalyaga mino manzanza. A bɛyɔ, batʉ bi nɨbɔ bogyisisogo ligubho li nɨlɔ kyɛ Kunzi nɔ ubhiso bɛ bagyagɨ bɨnza. 7 Mupóni mʉtʉ wasɨ nɨlɔ okwononi bɛ bapɨ́ : kiko manzanza, makalya, kiko batakisi, muluwo, kiko kabanga mʉmbanzʉ, mabanga, kiko kabhibhiso, mabhibhiso.
Kaiko na sɨpananɨsɔ na bɛngɛnɨ
8 Makikonito no lubu ka mʉmbanzʉ gʉtʉgʉ bemoti aka, kiki asɨ sɨpananɨsɔ aka lugo kunu. Mʉtʉ yi nɨnɔ ʉpaga bɛngɛnɨ otulyosogo Mʉtʉʉ masɨ. 9 A bɛyɔ, Mʉtʉʉ nɨmɔ abɨkyaga bɛ : « Wakogyonitɔgʉ bɨlya, wakamwonitɔ mʉmbanzʉ, wakibonitɔgʉ, wakototonilyonitɔgʉ luki ka bɛngɛnɨ », na magɔgɔ masɨ amʉmʉkana ka mʉtʉʉ mimoti aka bɛ : « Mʉpa wai-dhakʉ abhɛ ɨwɛ mombukwono-dhakɨ yi. »+\fr 13.9 \ft Kopupo 20.13-17; Ɨgɨlya Mʉtʉʉ 5.17-21; Balawi 19.18. 10 Mʉtʉ yi nɨnɔ apaga wai-dhakɨ kagyɨlyɨgʉ bʉnyɛ gʉtʉgʉ bumoti aka. Kinili, sɨpananɨsɔ otulyosogo Mʉtʉʉ masɨ.
Wikoni bakɨtʉlya kaigoku ka Yeso
11 Gyoni bɛyɔ kyɛ makaibho bɨnza ambɛ ngbingo tino nɔ ta mino mbɨya wanʉ : ngbingo muzuzuko itulyonini. A bɛyɔ, mbɨya wanʉ, muukuso a kʉwa buwobhi na ibusu kakɨtaga ngbingo yi nɨnɔ tabhaɨlya ndɨ mino. 12 Bhiti idhukulogini, lɨsyɛ a buwobhi katɨnɨkaga. Tosini nɛkɨ yɨgya yanyɛ yo bhiti, tava makpʉmʉka ma lʉnga nɨmɔ bʉlananaga nomu na lɨsyɛ. 13 Tikini na yɨgya yanza nɨyɔ okwononi kaiko na lɨsyɛ. Tibuulyini ka mʉkɔdɔdɔ ma malɨlɨ, ka lɨbhʉma, ka bɨlya, ka makpʉmʉka manyɛnyɛ, ka mosooni na ko miso mopi. 14 Luki limoti, wimokisyoni ɔbɨlɨ wa mbɨya kʉsɔ ka Mombukwono- dhosu Yeso-Kilisito, nɨ makosigʉ bata lɨkpʉmʉka la nzʉyɨ kamuluto kagya mʉsasa ma nzʉyɨ.