Ngbanga lugo ka bakilisito
6
1 Kiko kanɨ mʉtʉ bemoti lugo kunu bodhwononini na mukilisito dhakɨ, ɨkpʉnda lɨkɨ kasungulyoku ka bazozi ba kunzi nɨ kindigʉ ka batʉ ko Kunzi ? 2 Makibhigʉ mbɛyɨ ambɛ batʉ ko Kunzi bɔ bakɔ ndɛkɛ mʉngɨmbɔ ma ɔbɨlɨ ? Kiko nɨ a bɛyɔ, makakwananɨgʉ gɔnɨ kakɔ ngbanga wa makpʉmʉka makɛkɛkɛ ? 3 Makibhigʉ mbɛyɨ ambɛ ibusu bɔ takɔ ndɛkɛ ngbanga ka bamalaika ? A ngɛnɛ-ngɛnɛ sɛ kʉwa asɨ makpʉmʉka ma ɔbɨlɨ yi nɨmʉna aka mʉ ? 4 Kiko kanɨ makolutono ko bhulyo makpʉmʉka bɛyɔ ka nɨma, ko bhulyo ɨkɨ yɔ mo mino kaɨnda na imu ko miso ka batʉ nɨbɔ kanisa kumibhigʉ ? 5 Nakabɨkya ambɛ a suni ku kunu. Kɛgʉ gʉtʉgʉ na mʉtʉ bemoti wa yimibho lugo kunu, nɨnɔ akwanana kakɔ ngbanga ka bakilisito badhakɨ ? 6 Atʉ sɛ kʉwa bɨnza Bakilisito kaɨsasambya kambwa ka batʉ ba kunzi ?7 A bɛyɔ, kaiko na bangbanga lugo kunu akowoniso bɛ ma kʉwa bugwo aka. Ko bhulyo ɨkɨ yɔ makokibyogigʉ mino lɨkpʉmʉka lanyɛ ? Ko bhulyo ɨkɨ yɔ mamʉyaga bɛ bamʉkʉpyɨ makpʉmʉka kunu ? 8 Luki limoti, ibunu bɔ mʉgyagyaga bɛngɛnɨ, manʉkʉpya makpʉmʉka. Batʉ bi nɨbɔ mugyogyisogo bɔ, ba bomomonu bakilisito aka. 9 Makibhogigʉ ambɛ batʉ nɨbɔ bagyaga bʉnyɛ bakinisonɨgʉ ndɛkɛ na pa ka Bʉngama ko Kunzi ? Mʉmbanzʉ kamubonitɔgʉ : batʉ ba yɨgya yanyɛ, batʉ nɨbɔ bobhibhisogo gbɨlɨtɔ, badanda, balʉkʉ nɨbɔ basyɛnɛnɛgɛ lugo kabʉ na boko lugo kabʉ, 10 batʉ bo kubakʉ, ba mʉsasa, badhangbala ba makana, batʉ nɨbɔ bʉbʉkʉlyaga bɛngɛnɨ makpʉmʉka, bonzikabʉ, batʉ bi nɨbɔ basɨ bakinisonɨgʉ ndɛkɛ na pa ka Bʉngama ko Kunzi. 11 Batʉ bagɔgɔ lugo kunu ba ndɨ mʉdɔngɔnɨ abhɛ ɨbʉ. Luki limoti, Kunzi amusukusogoni ndɨ, ɨtɨlya yo kunu dhi, amuiitiso bongbingbili ko lino ka Mombukwono-dhosu Yeso-Kilisito pisi ka Lɨmbɛngɨ ko Kunzi nɨnɔ kusu.
Nzʉyɨ nɨ ndabʉ ya Lɨmbɛngɨ-Lotu
12 Batʉ bagɔ lugo kunu babɨkyaga bɛ : « Nakwanana kagya makpʉmʉka masɨ bɛyɔ nopo mino. » Iyo, luki limoti, masɨ kɛgʉ na ɨzangɨya kʉ kunu. Nakwanana kabɨkya bɛ : « Nakwanana kagya masɨ bɛyɔ nopo mino. », luki limoti, nakabhaɨlyɨgʉ ambɛ ɨmɨ niki musunzu wo luki gʉtʉgʉ limoti aka. 13 Mabɨkyagatʉ gɔnɨ bɛ : « Bagya ndɨ malɨlɨ ko bhulyo mʉma na mʉma ko bhulyo malɨlɨ. » Luki limoti, Kunzi apʉta ndɛkɛ makpʉmʉka mi nɨmɔ masɨ maba. A bɛyɔ, Kunzi kagyagʉ ndɨ nzʉyɨ ko bhulyo yɨgya bɨlya, agya ndɨ ko bhulyo ka Mombukwono-dhosu na nzʉyɨ a ya ka Mombukwono-dhosu. 14 Kunzi nɨnɔ apupiso ndɨ Mombukwono-dhosu Yeso ka mbʉkʉ, atipupiso ndɛkɛ ibusu bɛgɛyɔ pisi ko ngu kakɨ.
15 Makibhogigʉ bɛ nzʉyɨ kunu a mabhabha ma nzʉyɨ ka Kilisito ? Nakwanana sɛ kʉwa kava pa ya nzʉyɨ ka Kilisito namatana na pa ya nzʉyɨ ka adanda ? Kigyonosigʉ ! 16 Makibhogigʉ ambɛ mʉtʉ yi nɨnɔ amatɨkanaga na adanda, bikogo kʉwa na ɨyɨ nzʉyɨ imoti ? A bɛyɔ, Mobiso Motu abɨkyaga bɛ : « Ɨbʉ baba biko kʉwa nzʉyɨ imoti. »+\fr 6.16 \ft Mʉpʉnganagɨ 2.24. 17 Luki limoti, nɨnɔ ɨmatɨkanaga na Mombukwono-dhosu bɨɨtaga kʉwa ɨbʉ na ɨyɨ luki limoti ka lɨmbɛngɨ.
18 Makogyonitɔ bɨlya ! Bʉnyɛ bagɔgɔ basɨ nɨbɔ mʉmbanzʉ agyaga ikogo kunzi wa nzʉyɨ kakɨ. Luki limoti, nɨnɔ agyaga bɨlya, agyaga bʉnyɛ ka nzʉyɨ kakɨ mombukwono-dhakɨ. 19 Makibhigʉ mbɛyɨ ambɛ nzʉyɨ kunu nɨ ndabʉ ya Lɨmbɛngɨ-Lotu ? Lɨmbɛngɨ-Lotu li nɨlɔ Kunzi amʉpá ndɨ ikogo kʉsɔ kunu. Nzʉyɨ kunu kɛgʉ yo kunu ka bamombukwono-dhonu, 20 kyɛ Kunzi amuluwo ndɨ na lɨgabhʉ lapʉ. Mubhibhisogoni nɛkɨ Kunzi na nzʉyɨ kunu.