Bɨlya kʉsɔ wa kanisa ya Kolito
5
1 Mongoni akada pa yasɨ bɛ makagya bɨlya lugo kunu. Bakabɨkya bɛ bʉnyɛ bi nɨbɔ ogikosini, kakɨtaga gʉtʉgʉ nɨbɔ ka batʉ nɨbɔ bakamibhigʉ Kunzi. A bɛyɔ, bakabɨkya bɛ atʉ na mʉtʉ bemoti lugo kunu nɨnɔ avi bi muko abhakɨ ! 2 Na ibunu makaɨbhɨbha kʉgbɛ ! Makwanana bi kalya kumbu, makpumyo mʉtʉ yi nɨnɔ ogyi inguwo ya lɨkpʉmʉka li nɨlɔ lugo kunu. 3-4 Gʉtʉgʉ bɛyɔ no mino ɨmɨ byɨ na ibunu ka nzʉyɨ, na pa imoti na ibunu ka lɨmbɛngɨ. Ko lino ka Mombukwono-dhosu Yeso, nokuni bi mʉngɨmbɔ ka mʉtʉ yi nɨnɔ ogyi bi bʉnyɛ bi nɨbɔ abhɛ nakiko bi lugo kunu. Ngbingo yi nɨnɔ mamʉmʉkanaga ndɛkɛ mino, nikogo ndɛkɛ pa imoti na ibunu ka lɨmbɛngɨ, na ngu ka Mombukwono-dhosu Yeso ikogo ndɛkɛ lugo kunu. 5 Makwanana nɛkɨ kasʉta mʉtʉ yi nɨnɔ ka Mumuyoniso, ibha nzʉyɨ kakɨ ya bʉnyɛ apʉtɨkanɨ,+\fr 5.5 \ft Wanda gɔnɨ ka 1Timotiɔ 1.20. Kasʉta mʉmbanzʉ ka mumuyoniso kyɛ nzʉyɨ kakɨ ya bʉnyɛ apʉtɨkanɨ, isi yi bɛ kalikiso mʉmbanzʉ ko ngbingo bemoti bɛnɛ kanɨ ogyini bʉnyɛ ka Kanisa bɛkyɛ ɨbɨmyɨ, otubo, kumbuso yi, akwanana bata kaɨga ka Kanisa. luki limoti, lɨmbɛngɨ inisono na muukuso ka lɨsyɛ nɨlɔ Mombukwono-dhosu igoku ndɛkɛ mino.6 Makɛgʉ na nɨlɔ mɨbhɨbha mino ! Makibhogɨgʉ mbɛyɨ ambɛ sɨbhʉkʉsɔ sɨkɛdɛ nɨsɔ ofulisogo mukati, ofulisogo mʉbʉngʉ masɨ ? 7 Wingumosoni nɛkɨ ! Tumboni sɨbhʉkʉsɔ si nɨsɔ sa ndɛlɨ sɔ. Na bɛyɔ, mɨɨta mʉbʉngʉ ma mbɨya nɨmɔ kɛgʉ na sɨbhʉkʉsɔ si nɨsɔ. Ma kʉwa bɛyɔ, kyɛ Kilisito okwoni ndɨ ko bhulyo kusu abhɛ mikya kɔndɔlɔ nɨnɔ bapága ka apɛpɛ ka Pasɨka. 8 Talyini nɛkɨ Pasɨka, kikonitɔgʉ na mukati nɨmɔ bobhisi na sɨbhʉkʉsɔ sa ndɛlɨ nɨsɔ ofulisogo ikanɨ yɨgya ya bɨlya. Luki limoti, tolyini nɨmɔ mokofulu, mambɛngɨ bɨngɔ na kʉsɔ wa lɨngʉnʉ.
9 Kʉsɔ wa bhalʉwa nɨnɔ namukpikilyi bi, namubikyi bi ambɛ makokogonitɔgʉ lɨmbɨdha na badanda. 10 Nakobikyigʉ bi ambɛ makukonononitɔgʉ na badanda basɨ ba ɔbɨlɨ, gʉtʉgʉ batʉ basɨ ba mʉsasa, gʉtʉgʉ bonzikabʉ, gʉtʉgʉ batʉ nɨbɔ bobhibhisogo gbɨlɨtɔ. Kiko bi bɛyɔ, ibha mopupotʉ bi ka ɔbɨlɨ ! 11 Luki limoti, namukpikilyi bi ambɛ makikonitɔgʉ kaʉkanana na mʉtʉ yi nɨnɔ akaɨmaka bɛ mukilisito, nɨ a sɛ adanda, mʉtʉ wa mʉsasa, mʉtʉ nɨnɔ obhibhisogo gbɨlɨtɔ, mʉtʉ nɨnɔ ʉbʉkʉlyaga bɛngɛnɨ makpʉmʉka, adhangbala wa makana ikanɨ munzikabʉ. Makokwononigʉ gʉtʉgʉ kalyalya na inguwo ya mʉtʉ yi nɨnɔ. 12-13 Kɛgʉ ligubho kamɨ kakɔ mʉngɨmbɔ ka batʉ ba kunzi, Kunzi nɔ ʉkʉlya ndɛkɛ. Luki limoti, ibunu, makakwananɨgʉ kaʉkʉlya batʉ ba kanisa kunu mʉngɨmbɔ ? Ikpikogo kʉsɔ wa Mobiso Motu bɛ : « Mukpumyoni mʉtʉ wanyɛ lugo kunu. »+\fr 5:13 \ft Yɨgɨlya Mʉtʉʉ 17:7.