Batʉtʉmbwa ka Kilisito
4
1 Mokwononi nɛkɨ katɨva abhɛ bagya-ligubho ka Kilisito nɨbɔ Kunzi ubhiso kabɨkyaga bodhikidi kakɨ. 2 Mʉtʉ nɨnɔ ikogo na ligubho bɛyɔ ka nɨlɔ, okwononi kaiko mʉtʉ wo ngbingbili. 3 Kʉ kamɨ, kagyɨgʉ luki kiko nɨ ibunu ikanɨ bazozi ba ɔbɨlɨ makesombiso yi. Gʉtʉgʉ ɨmɨ aka, nakisombisigʉ nɨ ɨmɨ mombukwono-dhakɨ yi. 4 Lɨmbɛngɨ a na ɨmɨ bɨdhɛɛɛ, luki limoti, kɛgʉ bɛkyɛ na mʉtʉ wo ngbingbili. Zozi kamɨ nɨ Mombukwono-dhosu. 5 Kinili, makasombisonitɔgʉ mʉmbanzʉ kambwa wo ngbingo nɨnɔ ibhiso ndɨ. Bundogoni yigoku ka Mombukwono-dhosu. Opupiso ndɛkɛ ka bʉngbanganya nɨlɔ alakɨsʉma ko bhiti, owoniso tamanaga ya bodhikidi nɨyɔ kʉsɔ wa mambɛngɨ ka bambanzʉ. Kʉwa wa, mʉmbanzʉ yɨkaka-yɨkaka inisono ndɛkɛ na ɨbhɨbha nɨyɔ okwononi na ɨyɨ kotukyoku ko Kunzi.6 Bamamakɨ, novi likingyosi ka Apɔlɔ na nɨlɔ kamɨ mombukwono-dhakɨ yi kyɛ amʉtɨwɨ. Takapa ambɛ byeni likingyosi kusu, mibho ɨsɨ ya mʉnzɨna mi nɨma : « Makokpokyononitɔgʉ kunzi wa Mobiso. » Mʉtʉ gʉtʉgʉ bemoti aka lugo kunu kabhibhisonitɔgʉ mʉmbanzʉ sɨpakala, amɨna wagɔgɔ payaya. 7 Wanɨ nɔ ubhiso kʉgʉ ka batʉ bagɔgɔ ? Kɛgʉ mbɛyɨ Kunzi nɔ ʉpá ndɨ masɨ nɨmɔ wa na imu ? Kiko nɨ a bɛyɔ, ko bhulyo ɨkɨ sɛ kʉwa yɔ wo mino kaɨbhɨbha abhɛ bakʉpágʉ ndɨ mʉpá ?
8 Mbɨya wanʉ, ma kʉwa na masɨ nɨmɔ ma na nzoyi yi ! Ma kʉwa na lɨngama ! Miitoni bangama, luki limoti, takɛgʉ ibusu bangama ! Makiko bi bangama ka lɨngʉnʉ, ibha talya bʉngama bi nɨbɔ pa imoti na ibunu. 9 Luki limoti, ɛgya abhɛ ibusu batʉtʉmbwa, Kunzi atiitisoni batʉ ba mulibo. Ko miso ka bambanzʉ, ta abhɛ batʉ bi nɨbɔ bakwanana kaulumwisogo ka pa yangba. Ɔbɨlɨ wasɨ, katʉkya ka bamalaika adhwɛ ka bambanzʉ bakatɨmɨna abhɛ batʉ ba payaya. 10 Ibusu, ta batʉ bo bhikyatʉ ko bhulyo ka Kilisito, luki limoti, ma ibunu batʉ ba bʉgɛgɛlɛ ka ɔbɨlɨ kunu kʉsɔ ka Kilisito. Ta na bʉpɔ, luki limoti, ma ibunu no ngu. Bamubhibhisogo ibunu kʉgbɛ, luki limoti, batɨmɨnaga ibusu payaya ! 11 Kadhwɛ ko ngbingo yi nɨmʉ, takaigyogyiso na nza na mʉsasa, takɛgʉ na botu, bakatɨbhʉma, tanamama bɨgbagbagba. 12 Takaɨkɔ bungu bɨkya kagya mogubho ibusu bamombukwono-dhosu bi. Nɨyɔ batɨtʉmbwaga, tudukulyogo batʉ bi bʉbʉnga. Nɨyɔ batigyogyisogo, tɨkʉkaga asɨ manzʉ aka. 13 Bakatɨnzɨnzɨnya yanyɛnyɛ, tosikisyo bɨwɛsɛɛɛ. Kadhwɛ ko ngbingo yi nɨmʉ, batɨmɨnaga abhɛ makpʉmʉka mʉpɔ ma ɔbɨlɨ, batʉ basɨ banatɨnda asɨ na ɨnyʉkʉ aka.
14 Nakɛgʉ kamukpikilyo bɛyɔ kamupíso suni, luki limoti, a ko bhulyo kamʉtɨwa ibunu abhɛ bomikamɨ bʉpaka kʉgbɛ. 15 A bɛyɔ, gʉtʉgʉ bambanzʉ bɛlɔfʉ tɛkɛbɛ bakamuwonisilo kaiko kʉsɔ ka Kilisito, wibhoni ambɛ obhonu a bemoti aka. Ɨmɨ nɨ obhonu pisi ka Yeso-Kilisito, kyɛ ɨmɨ nɔ namʉbɨkyaga ndɨ Mongoni Manza. 16 Yɛkɨ a bɛyɔ, kikiliki, byeni yɨgya kamɨ. 17 Kinili, namutikilyi bi Timɔtɨyɔ, mikamɨ mʉpaka, nɨnɔ wongbingbili kambwa ka Mombukwono-dhosu. Ɨyɨ nɔ amutomosyogo banʉ bopisi ka Yeso-Kilisito nɨbayɔ nabyɛgɛ ka ɔbɨlɨ kamɨ, mʉdɔngɔnɨ bɛyɔ nowonisilogo mino pa yasɨ ka makanisa masɨ.
18 Batʉ bagɔgɔ lugo kunu bakaɨbhɨbha, banasɨma bɛ nakodhukugʉ banʉ bata kamʉnda. 19 Luki limoti, Mombukwono-dhosu kapa, nodhokuto banʉ bɨkwa kamʉnda. Nakobhisigʉ banʉ lɨmbɛngɨ ka mʉnzɨna ka batʉ bi nɨbɔ bɨbhɨbhaga bɔ, luki limoti, ka nɨlɔ bagyaga. 20 Kyɛ Bʉngama ko Kunzi kɛgʉ ko bhulyo mʉnzɨna, luki limoti, a ko bhulyo ngu ya yɨgya. 21 Makapa ɨkɨ ? Makapa bɛ namudhulyiku na mufimbo, ikanɨ na sɨpananɨsɔ na lɨmbɛngɨ la mazɨyɔ ?