Batʉ ka Kilisito nɨ bawanɨ ?
3
1 Bomika-mama, wa ta ndɨ mino na ibunu, nakamʉnzɨnɨlyagɨgʉ ndɨ ɨmɨ abhɛ batʉ nɨbɔ bikogo na Lɨmbɛngɨ ko Kunzi. Luki limoti, akʉngaga ndɨ bɛ namʉnzɨnɨlyɨ abhɛ batʉ ba ɔbɨlɨ yi nɨmʉ, abhɛ bomiki bakɛkɛkɛ ka bhaya. 2 Namʉpága ndɨ molungo aka nɨ kɛgʉ malɨlɨ mousu-usu kyɛ makakwananɨgʉ ndɨ kotokwo. Gʉtʉgʉ mbɨya wanʉ, makakwananɨgʉ bɛgɛyɔ, 3 kyɛ ma mbɛyɨ bata abhɛ batʉ ba ɔbɨlɨ yi nɨmʉna aka mʉ. A bɛyɔ, ngbingo yi nɨnɔ mo mino no miso mopi na mosooni lugo kunu, nɨyɔ kɛgʉ kowoniso bɛ ma mbɛyɨ bata abhɛ batʉ ba ɔbɨlɨ aka ? Yɨgya kunu kɛgʉ kabyɛnɛnɛ na nɨyɔ ya ɔbɨlɨ aka ? 4 Ngbingo yi nɨnɔ bemoti lugo kunu o mino kabɨkya bɛ : « Na ɨmɨ mʉtʉ ka Pɔlɔ », na wagɔ bɛ « Na ɨmɨ mʉtʉ ka Apɔlɔ », yɨgya yi nɨyɔ kɛgʉ mbɛyɨ ya ɔbɨlɨ ?5 Apɔlɔ mbɛyɨ nɨ wanɨ ? Na Pɔlɔ nɨ wanɨ ? Ibusu, ta bagya-ligubho ko Kunzi, nɨbɔ tamʉwanyaga ndɨ pisi ya bhaya. Tagya ndɨ bɛyɔ kabyɛnɛnɛ na apɛpɛ nɨnɔ Mombukwono-dhosu apá ndɨ mʉmbanzʉ yɨkaka-yɨkaka. 6 Ɨmɨ nakʉna ndɨ masɔlɔ, Apɔlɔ odukogo ɨyɨ no libo, luki limoti, Kunzi obokiso. 7 Yɛkɨ a bɛyɔ, mʉtʉ yi nɨnɔ akʉnaga na nɨnɔ odukogo libo, basɨ ba payaya. Kunzi yɨkaka aka nɔ a na ɨzangɨya kyɛ ɨyɨ nɔ obokisogo masɔlɔ. 8 Nɨnɔ akʉnaga na nɨnɔ odukogo libo, basɨ ba mʉdɔngɔnɨ. Kunzi akalya ndɛkɛ mʉtʉ yɨkaka-yɨkaka kabyɛnɛnɛ na ligubho nɨlɔ agya ndɨ. 9 A bɛyɔ, tagyaga ligubho pa imoti no Kunzi. Ibunu, ma tiko kakɨ.
Ma gɔnɨ ndabʉ nɨyɔ akopiko. 10 Kabyɛnɛnɛ na apɛpɛ nɨnɔ Kunzi ɛpá, nakpɔ ndɨ mubumbe mʉdɔngɔnɨ abhɛ mupipiko wa kimibho. Mbɨya wanʉ, mʉtʉ wagɔgɔ nɔ akopiko kʉgʉ yi. Luki limoti, mʉtʉ wasɨ yɨkaka-yɨkaka ɨmɨnyɨtɔ bɛyɔ o mino kopiko kʉgʉ yi. 11 A bɛyɔ, mʉtʉ nagɔgɔ kakwananɨgʉ bata kobhiso mubumbe magɔgɔ kiki nɨmɔ aka mɔ. Mubumbe mi nɨ Yeso-Kilisito. 12 Batʉ bagɔgɔ bakwanana kopiko kʉgʉ wa mubumbe mi nɨmɔ na ɔlɔ, fɨza ikanɨ na matamʉ ma lɨgabhʉ lapʉ; bagɔgɔ na makʉ, nyasɨ ikanɨ na kasa. 13 Ligubho ka mʉtʉ yɨkaka-yɨkaka inisono ndɛkɛ bɨngbanganya ka Lɨsyɛ lɨkɔ mʉngɨmbɔ. Ka lɨsyɛ li nɨlɔ, buku akɨngɨla ndɛkɛ na owoniso ɨzangɨya ya ligubho ka mʉtʉ yɨkaka-yɨkaka. 14 Mʉmbanzʉ kopiko ndɨ ka mubumbe mi nɨmɔ nɨ ligubho kakɨ kopyigʉ, inisonotʉ ndɛkɛ na mʉkalya. 15 Luki limoti, ligubho li nɨlɔ kapyɛ, mʉtʉ yi nɨnɔ agya ndɨ, kinisonigʉ ndɛkɛ no luki. Gʉtʉgʉ bɛyɔ, mʉtʉ yi nɨnɔ aʉkatʉ ndɛkɛ, luki limoti, aʉka ndɛkɛ abhɛ akɨtanaga lugo wa lɨdada lo buku.
16 Makibhogɨgʉ mbɛyɨ ambɛ ma ndabʉ ko Kunzi na Lɨmbɛngɨ kakɨ ikogo kʉsɔ kunu ? 17 Mʉmbanzʉ kapanza ndabʉ ko Kunzi, Kunzi apanza ndɛkɛ ɨyɨ bɛgɛyɔ. A bɛyɔ, ndabʉ ko Kunzi a bitu, ibunu bɔ ma ndabʉ yi nɨyɔ.
18 Mʉmbanzʉ kibonitɔgʉ mombukwono-dhakɨ yi. Mʉmbanzʉ bemoti lugo kunu kɨmɨna abhɛ mʉtʉ yi nɨnɔ a na bʉgɛgɛlɛ ba ɔbɨlɨ yi nɨmʉ, okwononi ɨgyɨ abhɛ ngingi, kyɛ inisoni kʉwa na bʉgɛgɛlɛ ba lɨngʉnʉ. 19 A bɛyɔ, bʉgɛgɛlɛ ba ɔbɨlɨ yi nɨmʉ a bungingi ko miso ko Kunzi. Kinili, Mobiso Motu abɨkya bɛ : « Kunzi ungyosogo batʉ ba bʉgɛgɛlɛ bi nɨbɔ kʉsɔ wa bokoli kabʉ bɨkpɛ. »+\fr 3:19 \ft Yɔbhɔ 5:13. 20 Abɨkyagatʉ gɔnɨ bɛ : « Mombukwono-dhosu ibhogotʉ tamanaga ka batʉ ba bʉgɛgɛlɛ, ibho bɛ a ma payaya. »+\fr 3:20 \ft Mambʉ 94:11. 21 Mʉmbanzʉ kibhibhogonitɔgʉ nɛkɨ ko bhulyo ka mʉtʉ wa lɨtɔmbʉ, kyɛ makpʉmʉka masɨ a mo kunu, 22 iki Pɔlɔ, Apɔlɔ ikanɨ Pɛtɛlɛ, lɨtɔmbʉ, ɔbɨlɨ, kukwakʉ, makpʉmʉka ma mbɨya ikanɨ nɨmɔ akodhoku. Masɨ a mo kunu, 23 luki limoti, ibunu ma batʉ ka Kilisito, na ɨyɨ Kilisito a wa ko Kunzi.