Mongoni Manza ko bhulyo ka Yeso nɨnɔ babhangɨlaga ndɨ ka mʉsalabha
2
1 Bomika-mama, ngbingo yi nɨnɔ nɨnda ndɨ mino ku kunu kamʉbɨkyaga Mongoni kʉgʉ wa bodhikidi ko Kunzi, ɨmɨ, nakiwonisogʉ ndɨ abhɛ mʉtʉ wa kibho mʉnzɨna ikanɨ abhɛ mʉtʉ wa bʉgɛgɛlɛ budhingi. 2 A bɛyɔ, wa na ndɨ mino lugo kunu, nakapagʉ ndɨ kobhiso lɨmbɛngɨ ka makpʉmʉka magɔgɔ, kiki asɨ kamibho Yeso-Kilisito aka nɨnɔ babhangɨlaga ndɨ ka mʉsalabha. 3 Kinili, nɨnda ndɨ ku kunu kʉsɔ wa bʉpɔ, nzʉyɨ anɛtwa bɨkyakyakya na kʉbangakʉ. 4 Mʉnzɨna na mʉtʉʉ kamɨ kɛgʉ ndɨ nɨmɔ makubulisyo bambanzʉ ikanɨ ma bʉgɛgɛlɛ ba ɔbɨlɨ. Luki limoti, Lɨmbɛngɨ ko Kunzi a ndɨ kowoniso ngu kakɨ, 5 kyɛ bhaya kunu kigumyonitɔgʉ ka bʉgɛgɛlɛ ka bambanzʉ, luki limoti ko ngu ko Kunzi.Bʉgɛgɛlɛ ko Kunzi
6 Ngbingo yi nɨnɔ tʉtɨwaga mino batʉ nɨbɔ bʉngata ka bhaya, tatɨwaga na bʉgɛgɛlɛ ba lɨngʉnʉ nɨ kɛgʉ nɨbɔ ba ɔbɨlɨ yi nɨmʉ, ikanɨ nɨbɔ ka bangama, kyɛ ba batʉ bulumwogo. 7 Bʉgɛgɛlɛ nɨbɔ tanzɨnaga na ibu, a nɨbɔ otukyogoku ko Kunzi. A lɨkpʉmʉka nɨlɔ mʉmbanzʉ kakwananɨgʉ kotombisyo na yimibho kakɨ bɨkpɛ na a lakɨsʉma ka batʉ ba ɔbɨlɨ. Lɨkpʉmʉka li nɨlɔ Kunzi obungusyogo ndɨ kambwa kagya ɔbɨlɨ kyɛ tikito gɔnɨ ka ɨbhɨbha kakɨ. 8 Lugo ka bangama ba ɔbɨlɨ, kɛgʉ na bemoti nɨnɔ ibho ndɨ bʉgɛgɛlɛ bi nɨbɔ. Bakibho ndɨ, ibha bakabhangɨlagagʉ ndɨ Mombukwono-ɨbhɨbha ka mʉsalabha. 9 Luki limoti, a mʉdɔngɔnɨ bɛyɔ ikpikogo mino kʉsɔ wa Mobiso Motu bɛ :
« Nɨlɔ mʉmbanzʉ gʉtʉgʉ bemoti aka kɨnagʉ ikanɨ kaʉkana,
nɨlɔ mʉmbanzʉ gʉtʉgʉ bɛmoti aka katamanagagʉ,
imu mɔ Kunzi obungusyogo ndɨ ko bhulyo ka batʉ nɨbɔ bapaga. »a
10 A bɛyɔ, Kunzi atiukulyo ndɨ ibusu bɨngbanganya dhikidi kakɨ pisi ka Lɨmbɛngɨ-Lotu. Lɨmbɛngɨ-Lotu ibhogo masɨ, gʉtʉgʉ tamanaga nɨyɔ ayakɨsʉma kʉsɔ ko Kunzi. 11 Kɛgʉ na mʉmbanzʉ gʉtʉgʉ bemoti aka nɨnɔ akwanana kaibho tamanaga ka mʉtʉ wagɔgɔ, kiki nɨ lɨmbɛngɨ nɨlɔ aka lɔ a kʉsɔ ka mʉtʉ yi nɨnɔ. A bɛgɛyɔ, kɛgʉ na nɨnɔ akwanana kaibho tamanaga ko Kunzi, kiki asɨ Lɨmbɛngɨ ko Kunzi aka. 12 Takinisonogʉ ndɨ ibusu na lɨmbɛngɨ la ɔbɨlɨ yi nɨmʉ. Luki limoti, na Lɨmbɛngɨ nɨlɔ otukyoku ko Kunzi, kyɛ tibhi makpʉmʉka manzanza nɨmɔ Kunzi atɨpá ndɨ ka ɨzɨyɔ. 13 Ngbingo yi nɨnɔ tanzɨnaga mino, takanzɨnagɨgʉ na bʉgɛgɛlɛ ka bambanzʉ, luki limoti, tabɨkyaga nɨlɔ Lɨmbɛngɨ ko Kunzi atiwonisilogo, tanozukogo makpʉmʉka ma Lɨmbɛngɨ ka batʉ nɨbɔ ba na Lɨmbɛngɨ li nɨlɔ kʉsɔ kabʉ.
14 Mʉtʉ yi nɨnɔ ikogo ɨyɨ na tamanaga ya lɨmbanzʉ aka, kabhaɨlyagɨgʉ lɨkpʉmʉka nɨlɔ otukyogoku ka Lɨmbɛngɨ ko Kunzi. Lɨkpʉmʉka li nɨlɔ a bungingi kʉ kakɨ, kakwananɨgʉ kotombisyo, kyɛ Lɨmbɛngɨ Lotu aka lɔ awonisilo bi. 15 Mʉtʉ nɨnɔ a na Lɨmbɛngɨ ko Kunzi akwanana kotombisyo makpʉmʉka masɨ. Luki limoti, nɨmɔ Lɨmbɛgɨ ko Kunzi agyaga ɨyɨ, kɛgʉ na mʉtʉ gʉtʉgʉ bemoti aka nɨnɔ akwanana kotombisyo. 16 A mʉdɔngɔnɨ bɛyɔ ikpikogo mino kʉsɔ wa Mobiso Motu bɛ :
« Wanɨ nɔ ibhogo tamanaga ka Mombukwono-dhosu ?
Wanɨ nɔ akwanana katɨwa ? »+\fr 2:16 \ft Isaya 40:13 .
Luki limoti, ibusu, ta na tamanaga ka Kilisito !