Bagya-ligubho ba agɔmɛ wa mbɨya
3
1 Ambɛ, lɨkpʉmʉka li nɨlɔ a sɛ kʉwa kowoniso bɛ topungini bata kaɨbhɨbha nɨ ibusu bamombukwono-dhosu bi ? Tokwononi sɛ kʉwa kamuwoniso ikanɨ kamʉkʉnga babhalʉwa kusu ba ligubho mʉdɔngɔnɨ bɛyɔ batʉ bagɔgɔ bagyaga mino ? 2 Bhalʉwa kusu nɨ ibunu aka, ikpikogo ka mambɛngɨ kusu. Batʉ basɨ bakwanana kotombisyo na katangʉlaga. 3 A bɛyɔ, a bɨngbanganya bɛ ma bhalʉwa yi nɨnɔ Kilisito akpikogo ndɨ, ibusu kʉwa bɔ tamudhukulyoku na ɨyɨ. Bhalʉwa yi nɨnɔ kikpikogogʉ ndɨ na mabɔkʉ, luki limoti pisi ka Lɨmbɛngɨ ko Kunzi nɨnɔ a na ɔbɨlɨ. Kikpikogogʉ ndɨ gɔnɨ kʉgʉ wa mɨza wa lɨtalʉ+\fr 3.3 \ft Pɔlɔ akanzɨna ko bhulyo mʉtʉʉ ka Musa.Wanda gɔnɨ Kopupo 24.12; Yelemia 31.33; Izekieli 11.19; 36.26.., luki limoti kʉsɔ wa mambɛngɨ ka bambanzʉ.4 Takanzɨna bɛyɔ kabyɛnɛnɛ na yɨgʉmya kusu ko Kunzi pisi ka Kilisito. 5 Kɛgʉ bɛkyɛ takwanana kagya luki no ngu kusu bamombukwono-dhosu bi, luki limoti ngu kusu otukyogoku ko Kunzi. 6 Ɨyɨ nɔ atɨpá ngu kaiko bagya-ligubho ba agɔmɛ wa mbɨya. Agɔmɛ yi nɨnɔ kɛgʉ pisi ka Mʉtʉʉ, luki limoti ka Lɨmbɛngɨ-Lotu. Mʉtʉʉ atɨkaga ka kukwakʉ, Lɨmbɛngɨ-Lotu apá ilu ɔbɨlɨ.
7 Mʉtʉʉ nɨmɔ apága kukwakʉ ikpikogo ndɨ kʉgʉ wa mɨza wa lɨtalʉ, ɨbhɨbha ko Kunzi anzɛ ndɨ ko ngbingo yi nɨnɔ. Miso ka Musa obubo ndɨ biwenge-wenge ko ngbingo mʉkɛdɛ aka. Gʉtʉgʉ bɛyɔ, bomikya Bɛzɛlɛlɨ bakakwananɨgʉ ndɨ bata kanda+\fr 3.7 \ft Wanda ka Pupo 34.29. ko bhulyo ɨbhɨbha yi nɨyɔ. 8 Kiko nɨ a bɛyɔ, budhingi ba ɨbhɨbha ya ligubho la Lɨmbɛngɨ-Lotu iko sɛ kʉwa ndɛkɛ bʉnɨ ? 9 Kiko kanɨ ligubho lɨmakya ka mʉngɨmbɔ inisononi ndɨ na ɨbhɨbha, iko kʉwa lɨkɨ ka nɨlɔ la kuitiso bambanzʉ bongbingbili ko miso ko Kunzi ? 10 Takwanana kabɨkya bɛ ɨbhɨbha yi nɨyɔ a mbɨya wanʉ kɛgʉ no kingyoso na nɨyɔ ya ndɛlɨ, kyɛ nɨyɔ ya mbɨya yi nɨmʉ okitogi byɨ. 11 A bɛyɔ, kiko kanɨ makpʉmʉka mi nɨmɔ kolipyogigʉ a ndɨ na ɨbhɨbha, iko kʉwa lɨkɨ ka nɨmɔ asyɛsyɛgɛ !
12 Tɨgʉmya ko Kunzi pisi ka mʉtamanagɨ mi nɨmɔ. 13 Takɛgʉ ibusu abhɛ Musa nɨnɔ itikyo ndɨ miso na kɨtambala kyɛ bomikya Bɛzɛlɛlɨ bakinonitɔgʉ mulibo ma ɨbhɨbha nɨyɔ anzɛ ndɨ ko ngbingo mʉkɛdɛ aka. 14 Luki limoti, bakotombisyogʉ ndɨ. A bɛyɔ, kadhwɛ gʉtʉgʉ na lɨsyɛ li nɨlɨ, nɨyɔ bomikya Bɛzɛlɛlɨ batangʉlaga mobiso ka Agɔmɛ wa Ndɛlɨ, kɨtambala yi nɨyɔ a na ɨbʉ asɨ itikyo aka. Kɨtambala yi nɨyɔ akwanana kakʉlɨkana ka mʉtʉ yi nɨnɔ aka nɔ bomotikononi na Kilisito. 15 Kadhwɛ na lɨsyɛ li nɨlɨ, bongbingo basɨ wa batangʉlaga mino mobiso ka Musa, yimibho kakʉ ikogo yitikyo aka na kɨtambala yi nɨyɔ. 16 Luki limoti, mʉmbanzʉ kamigilyoku Mombukwono-dhosu, kɨtambala yi nɨyɔ atʉkya. 17 Mombukwono-dhosu yi nɨnɔ nɨ Lɨmbɛngɨ-Lotu. Pa nɨyɔ Lɨmbɛngɨ ka Mombukwono-dhosu a mino, kʉlɨkanaga a wa. 18 Ibusu basɨ nɨbɔ takɛgʉ bata na kɨtambala ko miso, ɨbhɨbha ka Mombukwono-dhosu akanzɛ pisi kusu mʉdɔngɔnɨ abhɛ ka nɛlaga. Ta kʉwa buikono ka likingyosi ka Mombukwono-dhosu, ɨbhɨbha kusu anidhukulogo kambwa aka. Nɨyɔ a ligubho la Lɨmbɛngɨ ka Mombukwono-dhosu.