Ɨzangɨya kʉsɔ wa bambɨkɛ ba ya tʉkʉtɔ
4
1 Kunzi atikwilyo ndɨ kumbu, atɨpá ligubho li nɨlɨ, kinili takakwananɨgʉ bata kaɨga kumbuso. 2 Tosoni bodhikidi na makpʉmʉka mo suni, takɛgʉ na bokoli na takogomosyonogigʉ lɨkpʉmʉka ko Kunzi. Luki limoti, tumibhisogo bambanzʉ lɨkpʉmʉka la lɨngʉnʉ bɨngbanganya, kyɛ mʉtʉ yɨkaka-yɨkaka ibhi kʉsɔ wa lɨmbɛngɨ kakɨ bɛ ta batʉ bongbingbili kambwa ko Kunzi. 3 Kiko nɨ Mongoni Manza nɨmɔ takabɨkyaga a na bʉkpɛkɨ-kpɛkɨ kotombisyo, a na bʉkpɛkɨ-kpɛkɨ asɨ ka batʉ nɨbɔ aka bɔ bakabyɛ pisi yibungogo. 4 Ɨbʉ bakɛgʉ kabɨnɨkyana kyɛ Abhɨlɨ nɨnɔ a kunzi wa ɔbɨlɨ yi nɨmʉ ukundumosoni yimibho. Upiyoso miso bipi kyɛ bakinonitɔ bʉngbanganya ba Mongoni Manza ma ɨbhɨbha ka Kilisito nɨnɔ a likingyosi ko Kunzi. 5 A bɛyɔ, takabɨkyagɨgʉ mongoni kusu ka bamombukwono-dhosu, luki limoti nɨmɔ ka Mombukwono-dhosu,Yeso-Kilisito. Ibusu yɨpɛpɛ, tiitoni kʉwa bosunzu kunu ko bhulyo kakɨ. 6 Kunzi abɨkya ndɨ bɛ : « Bʉngbanganya anzɨ ko bhiti+\fr 4.6 \ft Wanda ka Mʉpʉnganagɨ 1.3.. » Ɨyɨ gɔnɨ nɔ odhoku ndɨ na bʉngbanganya ka mambɛngɨ kusu, kyɛ atiwonisi ɨbhɨbha kakɨ nɨyɔ anzɛgɛ ko miso ka Kilisito.7 Luki limoti, ibusu bi nɨbɔ ta na ɨzangɨya yi nɨyɔ ta abhɛ bambɨkɛ ba ya tʉkʉtɔ, kyɛ bambazʉ bibhi bɨnza bɛ ngu yɨmbanga yi nɨyɔ kotukyokugu ku kusu, luki limoti ko Kunzi. 8 Tikogo kʉsɔ wa bʉkpɛkɨ-kpɛkɨ bongbingo basɨ, luki limoti tokibhyogo wa aka wa. Bikogo katiyongo, luki limoti tigwigo mambɛngɨ aka. 9 Batigyogyisogo, luki limoti Kunzi katɨsagɨgʉ. Batɨbhʉmyagatʉ bɨngɔmʉ-ngɔmʉ, luki limoti bakatɨmwɔgɨgʉ. 10 Tabhɨnɨkaga bongbingo basɨ kukwakʉ ka Yeso ka nzʉyɨ kusu, kyɛ ɔbɨlɨ kakɨ inisonitɔ gɔnɨ ka nzʉyɨ kusu. 11 Ta na ɔbɨlɨ, luki limoti, kukwakʉ ikogo katɨzʉza aka ko bhulyo ka Yeso, kyɛ ɔbɨlɨ kakɨ inisoni gɔnɨ ka nzʉyɨ kusu nɨyɔ ya lɨtɔmbʉ. 12 Kinili, kukwakʉ akagya ligubho kʉsɔ kusu, luki limoti, ɔbɨlɨ anagya ɨyɨ kʉsɔ kunu.
13 Ikpikogo ka Mobiso bɛ : « Nobinikyononi, kinili nanzɨnaa.» Ibusu ta gɔnɨ na bhaya yi nɨyɔ aka yɔ, kinili takanzɨna. 14 Takaibho ambɛ Kunzi nɨnɔ apupiso ndɨ Mombukwono-dhosu Yeso ka mbʉkʉ, atipupiso ndɛkɛ ibusu bɛgɛyɔ pa imoti na Yeso, atibhiso ibusu na ibunu buwobhi na ɨyɨ. 15 A bɛyɔ, takokibhyo masɨ mi nɨmɔ ko bhulyo bʉnza kunu kyɛ bʉbʉnga ko Kunzi odukoni kʉgbɛ kʉgʉ ka bambanzʉ budhingi, ibha bamigisilyi Kunzi ɨbhɨbha yidhingi ko bhulyo ya ɨbhɨbha kakɨ.
Bhaya yɔ apága ɔbɨlɨ wa bɛnzɛ na bɛnzɛ
16 Kinili, takɛgʉkadhɨkaga. Kiko gʉtʉgʉ nɨ nzʉyɨ kusu akaɨnda pʉtɨkana, ɔbɨlɨ kusu wa lɨmbɛngɨ ɨɨtaga wa mbɨya masyɛ masɨ. 17 A bɛyɔ, yigyogyiso nɨyɔ ta na iyu mbɨya wanʉ kɛgʉ yapʉ, na a ko ngbingo mʉkɛdɛ aka tokokingyoso na ɨbhɨbha nɨyɔ iko ndɛkɛ ya bɛnzɛ na bɛnzɛ. Yigyogyiso yi nɨyɔ, iyu yɔ akatibungusilyogo ɨbhɨbha yi nɨyɔ. 18 Ibusu, takɛgʉ kakɨsa nɨlɔ bakwanana kaɨna, luki limoti, nɨlɔ bakakwananɨgʉ kaɨna. A bɛyɔ, nɨlɔ inisonogo, kolipyogigʉ, luki limoti, nɨlɔ kinisonogɨgʉ a la bɛnzɛ na bɛnzɛ.