5
1 A bɛyɔ, nzʉyɨ kusu nɨyɔ ta na iyu kʉnʉ ka lɨtɔmbʉ a abhɛ ngbangba. Takaibho ambɛ, kapʉtɨkana gʉtʉgʉ, ta na ndabʉ ya bɛnzɛ na bɛnzɛ nɨyɔ Kunzi atibungusilyogo kʉgʉ wa lɨsyɛ. Ndabʉ yi nɨyɔ kipikogʉ na bambanzʉ, luki limoti na ɨyɨ bɨkpɛ. 2 Mbɨya-mbɨya wanʉ, takaigomisogo, ta na mʉsasa kʉgbɛ kaimokisyo kʉgʉ wa nzʉyɨ yi nɨyɔ ta na iyu kutuko kwagɔgɔ. Kutuko kwi nɨkwɔ nɨ ndabʉ kusu nɨyɔ ya kʉgʉ wa lɨsyɛ. 3 Takimokisyo yi, takikigʉ ndɛkɛ bondumbu. 4 A bɛyɔ, ngbingo yi nɨnɔ ta mbɛyɨ bata mino kʉsɔ wa ngbangba yi nɨyɨ aka yɨ, takaɨgama mʉdɔngɔnɨ abhɛ ta kiko na likumbogi liti. Kɛgʉ bɛ takapa kaasanana na nzʉyɨ ya lɨtɔmbʉ, luki limoti, takapa kaimokisyo nzʉyɨ ya kʉgʉ wa lɨsyɛ kyɛ ɔbɨlɨ oumi kukwakʉ. 5 Kunzi nɔ atibungusyogo ndɨ ko bhuylo ɔbɨlɨ yi nɨnɔ, atɨpá mbɛyɨ ndɨ Lɨmbɛngɨ-Lotu ka makpʉmʉka mi nɨmɔ atɨwanyaga ndɨ.6 Kinili, takɛgʉ mino na kʉbangakʉ bongbingo basɨ. Takaibho bɛ takiko na nzʉyɨ ya lɨtɔmbʉ, ta byɨ na Mombukwono-dhosu, 7 kyɛ takakpakyana pisi ka bhaya nɨ kɛgʉ pisi ka nɨlɔ takaɨna. 8 A bɛyɔ, takɛgʉ butumo na kʉbangakʉ, ta na mʉsasa kaasanana na nzʉyɨ yi nɨyɔ, tɨnda kaiko buwobhi na Mombukwono-dhosu. 9 Luki limoti, gʉtʉgʉ takiko na nzʉyɨ yi nɨyɨ ikanɨ takasanana na iyu, lɨkpʉmʉka la ɨzangɨya nɨ kabhosiliso yi. 10 A bɛyɔ, ibusu basɨ tikotʉ ndɛkɛ ko ngbongu kambwa ka Kilisito, mʉtʉ yɨkaka-yɨkaka inisono na mʉkalya kabyɛnɛnɛ na yɨgya kakɨ yanza ikanɨ yanyɛ ngbingo yi nɨnɔ a ndɨ mino ka lɨtɔmbʉ.
Kaʉkanana no Kunzi pisi ka Kilisito
11 Tibhogotʉ isi yɨbanga Mombukwono-dhosu, kinili tagyaga kɛkɛlɛ bɛ batʉ bagɔgɔ bamibhitɔ gɔnɨ. Kunzi atimibho bɨnza, na na mʉtamanagɨ bɛ matimibhogotʉ gɔnɨ bɨnza kʉsɔ wa mambɛngɨ kunu. 12 Takɛgʉ kaɨbhɨbha kambwa kunu, luki limoti, takamuwoniso pisi kaiko na bugindo ko bhulyo kusu. Kinili, makwanana kʉwa kausikisyo batʉ nɨbɔ bikogo na bugindo ka makpʉmʉka nɨmɔ inisonogo nɨ kɛgʉ nɨmɔ ikogo kʉsɔ wa mambɛngɨ. 13 Kiko kanɨ tinisogo abhɛ batʉ bobhikyatʉ, a ko bhulyo ko Kunzi. Luki limoti, kiko kanɨ ta bamʉ ngbingbili, a ko bhulyo kunu. 14 Takpakyanaga kusili wa sɨpananɨsɔ ka Kilisito, ibusu bi nɨbɔ tibhogo bɨnza ambɛ mʉtʉ bemoti nɔ ukwilyogo ndɨ batʉ basɨ. Kinili, ibusu basɨ tamatɨkana na ɨbʉ ko pisi ya kukwakʉ kakɨ. 15 Okwo ndɨ ko bhulyo ka batʉ basɨ, kyɛ batʉ bi nɨbɔ ba na ɔbɨlɨ, ɔbɨlɨ kabʉ kikonitɔgʉ bata ko bhulyo kabʉ bɨkpɛ. Luki limoti, iki kʉwa ko bhulyo ka nɨnɔ okwo ndɨ, opupo ka mbʉkʉ ko bhulyo kabʉ.
16 Kinili, katʉkya mbɨya wanʉ, takɛgʉ bata kamɨna mʉmbanzʉ abhɛ mʉmbanzʉ wa nzʉyɨ ya lɨtɔmbʉ. Kiko gʉtʉgʉ nɨ tamibho ndɨ Kilisito abhɛ mʉmbanzʉ wa nzʉyɨ ya lɨtɔmbʉ, mbɨya yi nɨmʉ, kɛgʉ bata bɛyɔ. 17 Mʉmbanzʉ kiko kʉsɔ ka Kilisito, a kʉwa mʉtʉ wa mbɨya. Lɨkpʉmʉka la ndɛlɨ kɛgʉ bata, a kʉwa nɨlɔ la mbɨya aka. 18 Masɨ mi nɨma atʉkya ko Kunzi, atɨpá kaiko na yʉkanana na ɨyɨ pisi ka Kilisito. Atɨpá gɔnɨ ligubho kaʉbɨkyaga batʉ bagɔgɔ kaiko kaʉkanana na ɨyɨ. 19 A bɛyɔ, Kunzi agyaga ndɨ bɛ batʉ basɨ biki kaʉkanana na ɨyɨ pisi ka Kilisito nɨ kɛgʉ bata kanda bʉnyɛ ka bambanzʉ. Atɨpá kʉwa ligubho kabɨkyaga mongoni ma yʉkanana yi nɨyɔ.
20 Ibusu kʉwa bɔ tamalyaga lɨkpʉmʉka ka Kilisito, a kʉwa abhɛ Kunzi bɨkpɛ nɔ akamʉmaka pisi ku kusu. Ko lino ka Kilisito, takaɨtatanaga na ibunu ambɛ ukonononi no Kunzi. 21 Kilisito kɛgʉ ndɨ na bʉnyɛ, Kunzi abhinikiso ndɨ bʉnyɛ kusu, kyɛ pisi ka Kilisito tɨɨtɨ kʉwa batʉ bongbingbili ko miso ko Kunzi.