6
1 Kinili, ibusu nɨbɔ takagya ligubho pa imoti no Kunzi, takaɨtatanaga na ibunu ambɛ : ɨzɨyɔ nɨyɔ minisono na iyu, kogonɨtɔgʉ payaya. 2 A bɛyɔ, Kunzi abɨkya ndɨ bɛ : « Ko ngbingo nɨnɔ okwononi, nʉmʉkanatʉ ndɨ.
Ka lɨsyɛ la muukuso, nusingyotʉ ndɨ+\fr 6.2 \ft Isaya 49.8.»
Iyo, mbɨya wanʉ, a ngbingo nɨnɔ okwononi; mbɨya wanʉ a lɨsyɛ la muukuso. »
3 Takapagɨgʉ bɛ mʉmbanzʉ ogwi no lino kusu gʉtʉgʉ ko pisi yimoti aka, kyɛ ligubho kusu kinisonitɔgʉ payaya. 4 Luki limoti, takɨsaga kowoniso bongbingo basɨ ambɛ ta bagya-ligubho ba lɨngʉnʉ ko Kunzi. Tokibyogo yigyogyiso kʉgbɛ, yangya, bʉkpɛkɨ-kpɛkɨ, 5 batɨbhʉmagatʉ ndɨ, batɨmakya ka bhɔlɔkɔ, bʉkpamya bambanzʉ katɨvɨkɨmyanaga, batigyisisogo ndɨ ligubho lapʉ, takikogigʉ ndɨ no ngbingo wa batɔtɔ, gʉtʉgʉ luki lɨlya aka. 6 Ɔbɨlɨ kusu akowoniso bɛ ta bagya-ligubho ko Kunzi pisi kaiko lɨmbɛngɨ bɨngɔ, kaiko na yimibho, kaiko lɨmbɛngɨ lɨnda, kaiko na yɨgya yanza, kaiko pa imoti na Lɨmbɛngɨ-Lotu, kaiko na sɨpananɨsɔ sa lɨngʉnʉ, 7 kapá mʉtʉʉ ma lɨngʉnʉ, pisi ko ngu ko Kunzi. Makpʉmʉka ma lʉnga kusu kaibuulyogo na kabhʉmana na imu nɨ kagya bungbingbili ko miso ko Kunzi. 8 Bambanzʉ batibhibhisogotʉ yagɔgɔ batɨmɨna payaya, batɨtʉmbwagatʉ yagɔgɔ batɨbanga. Batɨvagatʉ abhɛ batʉ ba bɔngɔ, luki limoti, tabɨkyaga ibusu lɨngʉnʉ aka. 9 Batɨgyaga abhɛ bakatimibhogigʉ, luki limoti, batimibhogo bɨnza. Batɨmɨnaga abhɛ takiko kokwogo, luki limoti, ta mbɛyɨ bapʉpʉ aka. Batigyogyisogotʉ, luki limoti, bakatɨmwɔgɨgʉ. 10 Batilisisogotʉ kumbu, luki limoti, tikogo ibusu bongbingo basɨ ka magyagya aka. Batɨmɨnaga abhɛ batʉ ba yangya, luki limoti, tungomikisogotʉ batʉ budhingi. Batɨmɨnaga abhɛ batandɨ, luki limoti, ta na makpʉmʉka masɨ.
11 Ibunu, bavakukusu Bakolito, tamuukwilyi mambɛngɨ bɨngbanganya, tamʉbɨkya makpʉmʉka masɨ. 12 Tamuwonisili bi ibunu sɨpananɨsɔ, luki limoti, ibunu bɔ makatiwonisilyigʉ bi ibusu sɨpananɨsɔ. 13 Mbɨya yi nɨmʉ, nakamʉnzɨnɨlya bɛyɔ bhabha ʉnzɨnɨlyaga mino bomikakɨ, tiukwilyoni mambɛngɨ.
Makomotikononitɔgʉ na batʉ nɨbɔ bakanobhilyigʉ
14 Makomotikononitɔgʉ na batʉ nɨbɔ bakanobinikyonigʉ. A bɛyɔ, yʉkanana tino yɔ akwanana kaiko lugo wa bungbingbili na bʉnyɛ ? Lugo wa bʉngbanganya no bhiti ? 15 Kilisito akwananatʉ kaʉkanana na Abhɨlɨ ? Ikanɨ mʉtʉ nɨnɔ obinikyononi, akwananatʉ kaʉkanana na nɨnɔ konobinikyonigʉ ? 16 Bokunzi bakwananatʉ kaiko kʉsɔ wa ndabʉ ko Kunzi ? Ibusu ta ndabʉ ko Kunzi nɨnɔ a na ɔbɨlɨ bɛgɛyɔ ɨyɨ mombukwono-dhakɨ yi abɨkya ndɨ mino bɛ :
« Tiko ndɛkɛ na ɨbʉ,
nakpakyana ndɛkɛ pa imoti na ɨbʉ.
Niko ndɛkɛ Kunzi kabʉ,
ɨbʉ biko ndɛkɛ lɨvananza kamɨ. »
17 Kinili Kunzi akabɨkya bɛ :
« Puponi lugo kabʉ, wosonononi na ɨbʉ.
Makovilonitɔgʉ luki lanyɛ,
ɨmɨ, namʉtɨlyatʉ. »
18 Mombukwono-dhosu nɨnɔ wongu-kʉgbɛ abɨkya ndɨ bata bɛ :
« Niko ndɛkɛ Obhonu,
miko kʉwa bomikamɨ. »a