Mapʉmʉ ko bhulyo ya kanisa ya Yelusalɛma
16
1 Kʉwa ka nɨlɔ ondi lɨkpʉmʉka la mapʉmʉ ka bakilisito nɨbɔ bikogo ka Yelusalɛma, byeni gɔnɨ ibunu mʉtʉʉ mi nɨmɔ nowonisilo ndɨ ka Makanisa ma Galatia. 2 Makokwononigʉ kabʉndaga kamʉmʉla makpʉmʉka wa aka wa nosilo mino kʉ. Masyɛ ma Mungu masɨ, mʉmbanzʉ yɨkaka-yɨkaka iki kobhisogo ka kpɔlɔ, kʉ kakɨ, luki nɨlɔ inisono nolu kabyɛnɛnɛ no ngu kakɨ 3 Wa nosilo banʉ mino ku kunu, nʉtɨka banʉ bambanzʉ nɨbɔ miko nɨ mupunogini na babhalʉwa ambɛ bɨndɨ na bamapʉmʉ kunu ka Yelusalɛma. 4 Kakwanana bɛ nɨndɨtɔ gɔnɨ, tɨnda kʉwa banʉ na ɨbʉ kʉgʉkɔ kumoti.Tamanaga ka Pɔlɔ ko bhulyo lɨgʉndʉ
5 Nakɨtaga banʉ pisi ka Makedhonia, nosilo sɛ kuwa ku kunu, kyɛ na na tamanaga kabyɛ pisi kʉ bɛyɔ. 6 Yagɔgɔ tagyatʉ banʉ mino na ibunu masyɛ makɛdɛ, ikanɨ gʉtʉgʉ ngbingo wa ndɔbɔ wasɨ aka. Mɛpápa kʉwa banʉ, nidhukulogo na lɨgʉndʉ kamɨ. 7 A bɛyɔ, nakɛgʉ kapa kamʉmɨna na lɨgʉndʉ aka. No bi katamanaga ambɛ Mombukwono-dhosu kapa, tasyɨtɔ bi na ibunu masyɛ makɛdɛ.
8 Luki limoti, na bi kapa kaiko wanʉ ka Ɛfɛsɔ, kadhwɛ ka lɨsyɛ la Patɛkɔtɨ, 9 kyɛ ninisonini no ngbingo wanza kagya ligubho nɨlɔ abʉkʉtatʉ masɔlɔ. Luki limoti, bomuyoniso ba bakpʉ.
10 Timotei kosilo banʉ kʉ, gyoni yasɨ bɛ ɨmʉkanɨ bɨnza, kyɛ amʉgya-ligubho ka Mombukwono-dhosu abhɛ ɨmɨ gɔnɨ. 11 Gʉtʉgʉ mʉmbanzʉ bemoti aka kaminonitɔgʉ payaya. Luki limoti, mupóponitɔ kyɛ isisilogi na lɨgʉndʉ kakɨ kʉsɔ wa mazɨyɔ; igoku kɛtakanya. Takabʉndaga pa imoti na bomika-mama ka bhaya.
12 Ka mutili ka momosu bɛyɔ ka Apɔlɔ, nigomoni na ɨyɨ nganga bɨkyɔ ambɛ baga pa imoti na bomomosu bagɔgɔ ku kunu kʉ, luki limoti, kɛgʉ mbɛyɨ kapa kaɨnda mbɨya wanʉ. Ɨnda kʉwa banʉ wa gɔwa inisono banʉ mino no ngbingo.
Mʉtʉʉ na yuuso ya mulibo
13 Ukwoni miso, migwinonogo bingbufu ka bhaya. Wikoni na lɨlʉkʉ, miko batʉ bo ngu. 14 Gyogoni masɨ kʉsɔ wa sɨpananɨsɔ.
15 Bomika-mama, nakamʉkʉnga bata luki limoti. Sɨ mamibhotʉ Sɛtɛfanɔ na lɨvananza kakɨ, ɨbʉ bɔ ba ndɨ bakilisito ba mambwa ka mugi ma Akaya, bɨpá ndɨ kaugugubhyo bakilisito bagɔgɔ. 16 Umukononi inguwo ya batʉ bi nɨbɔ, na batʉ basɨ nɨbɔ bagyaga na ɨbʉ ligubho na kɛkɛlɛ.
17 Nakogwo magyagya bɛyɔ Sɛtɛfanɔ, Folotunato na Akaiko bosiliku mino yɨ. Ta ndɨ na ɨbʉ mʉdɔngɔnɨ abhɛ makiko wa. 18 Betumisogo ndɨ lɨmbɛngɨ mʉdɔngɔnɨ bɛyɔ bamʉgyɨlyaga ndɨ gɔnɨ mino ibunu. Makozunonitɔgʉ na inguwo ya batʉ bi nɨbɔ.
19 Makanisa nɨmɔ a ka iwili ya Azia amumuusogito. Akila na Pilisila pa imoti na kanisa nɨyɔ amʉmʉkanaga ka ndabʉ kabʉ bamumuusogi kʉgbɛ ko lino ka Mombukwono-dhosu. 20 Bakilisito basɨ nɨbana ba wanʉ bamumuusogito.
Tilyononi, mopututonogo abhɛ bomika-muko.
21 Ɨmɨ Pɔlɔ bɨkpɛ nɔ nokpikogi ambɛ namumusogito.
22 Mʉmbanzʉ kapogi Mombukwono-dhosu, mʉtʉ yi ɨgbangɨ !
Malanata, isi yi bɛ Mombukwono-dhosu, dhoku !
23 Ɨzɨyɔ ka Mombukwono-dhosu Yeso iki pa imoti na ibunu.
24 Namʉpaga ibunu basɨ pisi ka matɨkanaga na Yeso-Kilisito. A bɛyɔ !