Pɔlɔ akabɨkyaga Mongoni Manza nɨmɔ ʉkana ndɨ
15
1 Bomika-mama, mbɨya wanʉ, nakapa kamutomosyo Mongoni Manza nɨmɔ namʉbɨkyaga ndɨ, nɨmɔ mabhaɨlya ndɨ na nɨmɔ mo mino bakigwinonogo bingbufu. 2 Minisonotʉ na muukuso pisi ko Mongoni Manza mi nɨmɔ makiko kabyɛ bɛyɔ aka yɔ namʉbɨkyaga ndɨ mino. Makogyɨ bɛyɔ, bhaya kunu iko payaya.3 Kambwa wa makpʉmʉka masɨ, namukitisyogo mbɛyɨ ndɨ mʉtʉʉ nɨmɔ ɨmɨ mombukwono-dhakɨ yi nʉkana ndɨ. Kilisito okwo ndɨ ko bhulyo bʉnyɛ kusu, mʉdɔngɔnɨ bɛyɔ ikpikogo mino ka Mobiso Motu. 4 Balumbo ndɨ, opupo ka mbʉkʉ kumbuso wa masyɛ masaa, mʉdɔngɔnɨ bɛyɔ Mobiso Motu abɨkya ndɨ mino. 5 Apuponilyo ndɨ Pɛtɛlɛ, kumbuso yi batʉtʉmbwa tɛkɛbɛ na baba. 6 Kʉwa wa, upuponilyo ko ngbingo bemoti babɨbya kakɨ kakɨtaga bamɨya kubukumuti. Budhingi lugo ka babɨbya bi nɨbɔ batʉ mbɛyɨ bata aka ka ɔbɨlɨ, luki limoti, bagɔgɔ bokwogoni ndɨ. 7 Kumbuso yi, apuponilyo ndɨ Yakɔbɔ, kʉwa wa, upuponilyo batʉtʉmbwa basɨ.
8 Kumbuso ka batʉ bɨ nɨbɔ basɨ, epuponilyo ndɨ gɔnɨ ɨmɨ, ɨmɨ nɨnɔ na ndɨ abhɛ miki yi nɨnɔ ɨbʉkʉtaga nɨ kanongotigʉ. 9 A bɛyɔ, na mupipilo lugo ka batʉtʉmbwa basɨ. Nakokwononigʉ gʉtʉgʉ bɛ bɛmakɨ bɛ atʉtʉmbwa, kyɛ nogyogyiso ndɨ Kanisa ko Kunzi. 10 Luki limoti, na kʉwa bɛyɔ no mino mbɨya yi nɨmʉ pisi ka ɨzɨyɔ ko Kunzi. Ɨzɨyɔ yi nɨyɔ abʉkʉtatʉ ndɨ masɔlɔ. Nagya ndɨ ligubho kaʉkɨtaga batʉtʉmbwa bagɔgɔ basɨ. A bɛyɔ, kɛgʉ ndɨ ɨmɨ, luki limoti, ɨzɨyɔ ko Kunzi nɨyɔ a pa imoti na ɨmɨ. 11 Kinili, iki ɨbʉ ikanɨ ɨmɨ, takabɨkyaga Mongoni Manza mi nɨmɔ aka mɔ mabhaɨlya ndɨ.
Kunzi upupisogotʉ bambanzʉ ka bambʉkʉ
12 Takabɨkyaga bɛ Kilisito opupotʉ ndɨ ka mbʉkʉ. Ko bhulyo ɨkɨ yɔ batʉ bagɔgɔ lugo kunu babɨkyaga mino bɛ batʉ nɨbɔ bokwogo ndɨ bakopupigʉ ndɛkɛ ka bambʉkʉ ? 13 Kiko nɛkɨ nɨ a bɛyɔ, Kilisito kopupogʉ ndɨ ka mbʉkʉ bɛgɛyɔ. 14 Kiko nɨ Kilisito kopupogʉ ndɨ ka mbʉkʉ, takɛgʉ na Mongoni Manza nɨmɔ takwanana kabɨkyaga, bhaya kunu a gɔnɨ payaya. 15 Na gɔnɨ, nɨyɔ akowoniso bɛ ta badhɛmʉ ba bɔngɔ ko miso ko Kunzi, kyɛ tabɨkya ndɨ bɨngbanganya bɛ Kunzi apupisotʉ ndɨ Kilisito ka mbʉkʉ. Wɨna sɛ, Kunzi kakwananɨgʉ ndɨ kagya bɛyɔ, kiko nɨ a lɨngʉnʉ bɛ batʉ nɨbɔ bokwogo, bakopupogɨgʉ ka bambʉkʉ. 16 A bɛyɔ, kiko nɨ batʉ nɨbɔ bokwogo, bakopupogigʉ ka bambʉkʉ, Kilisito kopupogʉ ndɨ nɛkɨ gɔnɨ ɨyɨ ka mbʉkʉ. 17 Na kiko nɨ Kilisito kopupogʉ ndɨ ka mbʉkʉ, bhaya kunu a ya payaya na ma asɨ kʉsɔ wa bʉnyɛ kunu aka. 18 Na bata, nɨyɔ akowoniso bɛ batʉ nɨbɔ bokwogo ndɨ kʉsɔ ka Kilisito, ba nɛkɨ gɔnɨ bubungogo. 19 Kiko nɨ a ko bhulyo ɔbɨlɨ yi nɨmʉna aka mʉ nɔ tobhiso mino mʉtamanagɨ kusu ka Kilisito, ta batʉ bʉlya kumbu kaʉkɨtaga batʉ bagɔgɔ basɨ.
20 Luki limoti, a lɨngʉnʉ bɛ Kilisito opupotʉ ndɨ lugo ka bamanda. A abhɛ talʉ-talʉ, kyɛ batʉ bagɔgɔ nɨbɔ bokwogo ndɨ bopupito ndɛkɛ gɔnɨ ɨbʉ. 21 Mʉdɔngɔnɨ bɛgɛyɔ kukwakʉ odhoku ndɨ mino pisi ka mʉtʉ bemoti, pupo ka mbʉkʉ ka batʉ nɨbɔ bokwogo ndɨ, odhoku pisi ka mʉtʉ bemoti gɔnɨ. 22 Bɛgɛyɔ bambanzʉ basɨ bokwogo mino kyɛ ba Bava-adhamʉ, ɨbʉ basɨ binisono ndɛkɛ bata na ɔbɨlɨ kyɛ ba Bava-kilisito.a 23 Luki limoti, mʉmbanzʉ yɨkaka-yɨkaka opupo ndɛkɛ kabyɛnɛnɛ no ngbingo kakɨ : Kilisito nɔ a mʉtʉ wa mambwa, opuponi ndɨ ɨyɨ. Kumbuso yi batʉ kakɨ bopupo ndɛkɛ ngbingo yi nɨnɔ igoku ndɛkɛ mino. 24 Kumbuso yi, iko kʉwa lɨsyɛ la mulibo. Ko ngbingo yi nɨnɔ, Kilisito apʉta ndɛkɛ bʉngama basɨ, ɨbhɨbha yasɨ na ngu yasɨ, amigisyo kʉwa Kunzi Bhabha bʉngama. 25 A bɛyɔ, okwononi bɛ Kilisito iki ngama kadhwɛ kʉ kwa kʉ ʉdɨta ndɛkɛ mino bomuyoniso kakɨ basɨ bɨnvɨ kusili wa magʉ kakɨ. 26 Mumuyoniso nɨnɔ bamwɔ ndɛkɛ ka mulibo, nɨ kukwakʉ. 27 Iyo, Mobiso Motu akabɨkya bɛ : « Kunzi obhiso ndɨ makpʉmʉka masɨ kusili wa magʉ kakɨ+\fr 15.27 \ft Mambʉ 8.7..» Luki limoti, a bɨngbanganya bɛ Kunzi kɛgʉ ɨyɨ kʉsɔ wa «makpʉmʉka masɨ» mi nɨmɔ, kyɛ ɨyɨ nɔ apá ndɨ Kilisito ngu kʉgʉ wa masɨ. 28 Ngbingo yi nɨnɔ Kunzi obhiso ndɛkɛ mino makpʉmʉka masɨ kusili ko Miki, ɨyɨ Kilisito mombukwono-dhakɨ yi ibhiso ndɛkɛ kusili ko Kunzi nɨnɔ apá ndɨ ngu kaiko kʉgʉ wa makpʉmʉka masɨ. Kʉwa wagɔwa Kunzi iko ndɛkɛ lɨngʉnʉ kʉgʉ wa masɨ.
29 Tomononi mbɛyɨ bata lɨkpʉmʉka ka batʉ nɨbɔ bibotisisogo ko bhulyo ka batʉ nɨbɔ bokwogo. Binisono na ɨzangɨya tino ? Kiko nɨ a lɨngʉnʉ bɛ batʉ nɨbɔ bokwogo bakopupogɨgʉ ka bambʉkʉ, ko bhulyo ɨkɨ kʉwa yɔ bibotisisogo mino ko bhulyo kabʉ ? 30 Na bata, ko bhulyo ɨkɨ yɔ ibusu bamombukwono-dhosu bi to mino bongbingo basɨ kaɨkɨsɨlya kukwakʉ ? 31 Bomika-mama, kukwakʉ ɛzʉzaga masyɛ masɨ. A lɨngʉnʉ bɛyɔ nɨbhɨbhaga mino ko bhulyo kunu kʉsɔ wa matɨkanaga na Yeso-Kilisito Mombukwono-dhosu. 32 Nʉlanana ndɨ na bambanzʉ ka Ɛfɛsɔ nɨbɔ ba ndɨ bʉdɨya abhɛ banyama bo tutu. Kiko ndɨ ka yɨgya ko bomikya-bambanzʉ, ninisono ndɨ na ɨzangɨya tino ? Kiko nɨ bamanda bakopupogɨgʉ ka bambʉkʉ, okwononi nɛkɨ « tolyolyini, tomwo kyɛ bʉgala tokwotʉ+\fr 15.32 \ft Wanda kʉsɔ wa kɨtabʉ ka Isaya 22.13.».
33 Wiminyonito sɛ : « Kakɔ lɨmbɨdha na batʉ banyɛ, apʉtagatʉ yɨgya yanza ka mʉmbanzʉ. » 34 Wigilyoni tamanaga kunu yanza, masa kagya bʉnyɛ. Batʉ bagɔ lugo kunu bakamibhigʉ Kunzi. Nakamʉbɨkya bɛyɔ kamupíso suni.
Batʉ nɨbɔ bokwogo ndɨ bopupo ndɛkɛ ka bambʉkʉ lɨkɨ ?
35 Luki limoti, mʉtʉ bemoti akwananatʉ kauuso bɛ : « Bamanda bopupo ndɛkɛ ka bambʉkʉ lɨkɨ ? Biko ndɛkɛ na bʉsɔlɔ ba nzʉyɨ tino ? » 36 Eeeze, wa ngingi ! Ngbingo yi nɨnɔ wakʉnaga mino lɨsɔlɔ, okwononi mbɛyɨ okwi, kumbuso yi abaka sɛ kʉwa. 37 Lɨsɔlɔ nɨlɔ wakakʉna lɔ, kɛgʉ ilu nɨ malɨlɨ nɨmɔ abaka banʉ, luki limoti, a libhumo payaya aka la mʉpʉnga ikanɨ libhumo lagɔgɔ. 38 Kunzi obokisogo kʉwa libhumo li nɨlɔ bɛyɔ opo mino, obukutiso libhumo yɨkaka-yɨkaka kabyɛnɛnɛ na bʉsɔlɔ kakɨ.
39 Nzʉyɨ yasɨ kɛgʉ mʉdɔngɔnɨ. Bambanzʉ ba na nzʉyɨ kabʉ, banyama na nɨyɔ kabʉ, bombu na bosi ba na nɨyɔ kabʉ gɔnɨ.
40 Nzʉyɨ ya kʉgʉ wa lɨsyɛ a dhi na nɨyɔ ya lɨtɔmbʉ, ɨbhɨbha ya kʉgʉ wa lɨsyɛ a dhi na nɨyɔ ya lɨtɔmbʉ. \v 41 Mɔnɨ angɨngaga dhi, tɨmba dhi, mangʉtʉ dhi gɔnɨ. Gʉtʉgʉ mangʉtʉ aka lugo kabʉ angɨnga dhidhi dhi aka gɔnɨ.
42 Iko ndɛkɛ bɛgɛyɔ ngbingo yi nɨnɔ bamanda opupo ndɛkɛ mino ka bambʉkʉ. Bulumbogo bambanzʉ, kumbuso yi bapɔ, wa bopupo ndɛkɛ mino ka bambʉkʉ, biko kʉwa ndɛkɛ na ɔbɨlɨ wa bɛnzɛ na bɛnzɛ. 43 Bolumbogo nzʉyɨ nɨ kɛgʉ na ɨbhɨbha ikanɨ no ngu. Luki limoti, opupogo kʉwa na ɨbhɨbha no ngu. 44 Ngbingo yi nɨnɔ bolumbogo mino, ikogo nzʉyɨ ya lɨmbanzʉ. Luki limoti, kopupo ka mbʉkʉ ɨɨta kʉwa nzʉyɨ ya lɨmbɛngɨ. Kiko nɛkɨ nɨ nzʉyɨ ya lɨmbanzʉ atʉ, nzʉyɨ ya lɨmbɛngɨ atʉ nɛkɨ gɔnɨ aka. 45 A bɛyɔ, Mobiso Motu abɨkyaga bɛ : « Mʉtʉ wa mambwa bɛyɔ ka Adhamʉ a ndɨ na ɔbɨlɨ kʉsɔ wa nzʉyɨ ya lɨtɔmbʉ.» Luki limoti, Adhamʉ yi nɨnɔ wa kumbuso nɨ Lɨmbɛngɨ nɨlɔ apága ɔbɨlɨ+\fr 15.45 \ft Adhamʉ wa mambwa, wanda Mʉpʉnganagɨ 2.7.Adhamʉ wa kumbuso, ni Kilisito.. 46 Kɛgʉ nzʉyɨ ya lɨmbɛngɨ yɔ odhogoku ka mambwa, luki limoti, nɨyɔ ya lɨmbanzʉ. Nzʉyɨ ya lɨmbɛngɨ odhogoku iyu kumbuso. 47 Kunzi agya ndɨ Adhamʉ wa mambwa na libungu. A ɨyɨ mʉtʉ wa ɔbɨlɨ yi nɨmʉ. Luki limoti, Adhamʉ wa yɨba otukyoku ndɨ ɨyɨ kʉgʉ wa lɨsyɛ. 48 Batʉ ba ɔbɨlɨ yi nɨmʉ ba mʉdɔngɔnɨ abhɛ mʉtʉ yi nɨnɔ Kunzi agya ndɨ na libungu, luki limoti, nɨbɔ ba kʉgʉ ba mʉdɔngɔnɨ abhɛ mʉtʉ yi nɨnɔ otukyoku ndɨ kʉgʉ wa lɨsyɛ. 49 Mʉdɔngɔnɨ bɛgɛyɔ to mino abhɛ mʉtʉ yi nɨnɔ Kunzi agya ndɨ na libungu, tiko ndɛkɛ gɔnɨ mʉdɔngɔnɨ abhɛ mʉtʉ yi nɨnɔ otukyoku ndɨ kʉgʉ wa lɨsyɛ.
50 Bomika-mamaaa, nakapa kabɨkya ambɛ : luki nɨlɔ Kunzi agya ndɨ ka nzʉyɨ na ka bangʉ kakwananɨgʉ kalya lisimo la Bʉngama ko Kunzi. Nɨlɔ akwanana kapɔ, kinisonigʉ na ɔbɨlɨ wa bɛnzɛ na bɛnzɛ.
51 Mbɨya wanʉ, nakamumibhiso dhikidi yimoti : takokwigʉ ndɛkɛ basɨ, luki limoti, tigomosyonotʉ ndɛkɛ basɨ. 52 Igyonoso ndɛkɛ bɛyɔ ko ngbingo bemoti abhɛ kʉta, wa ngʉnga wa mulibo obuko ndɛkɛ mino. A bɛyɔ, wa ngʉnga obuko ndɛkɛ mino, batʉ nɨbɔ bokwogo ndɨ bopupo ndɛkɛ ka bambʉkʉ na nzʉyɨ nɨyɔ kapʉgʉ ndɛkɛ bata, ibusu basɨ tigomosyono. 53 A bɛyɔ, okwononi bɛ pɔpɔtʉ ta nzʉyɨ yi nɨyɨ imokisyi nzʉyɨ nɨyɔ kakwananɨgʉ bata kapɔ. Okwononi bɛ nzʉyɨ yi nɨyɨna ya kukwakʉ yi imokisyi nzʉyɨ nɨyɔ kokwigʉ ndɛkɛ bata. 54 Ngbingo yi nɨnɔ nzʉyɨ yi nɨyɔ apɔgɔ imokisyo ndɛkɛ mino nzʉyɨ yi nɨyɔ kapɔgɨgʉ, nzʉyɨ ya kukwakʉ imokisyo nɨyɔ kokwogigʉ, ibha Mobiso Motu mi nɨmana itulyonini sɛ kuwa : « Kukwakʉ kɛgʉ bata, boditini lɨngʉnʉ bɨnvɨ ! »
55 « Eeeze kukwakʉ, ngu kakʉ a kʉwa yanɨ ?
Eeeze kukwakʉ, syogbu kakʉ a kʉwa yanɨ ? »+\fr 15.55 \ft Wanda gɔnɨ ka Isaya 25.8; Ɔsɨya 13.14.
56 Kukwakʉ inisonogo no ngu pisi ka bʉnyɛ, mʉtʉʉ mɔ apága bʉnyɛ ngu. 57 Luki limoti, tamigisilyini Kunzi ɨbhɨbha, ɨyɨ nɔ atɨpága ngu pisi ka Mombukwono-dhosu Yeso-Kilisito.
58 Kinili, bomika-mama, womogoni bingbu nɨ makɛgʉ kodhiyo. Mugugubhyoni Mombukwono-dhosu masyɛ masɨ, kyɛ makaibho bɨnza bɛ bungu basɨ nɨbɔ makaɨkɔ ka ligubho kakɨ, kokwigʉ payaya.