11
1 Byeni yɨgya kamɨ, mʉdɔngɔnɨ bɛyɔ ɨmɨ mombukwono-dhakɨ yi nabyɛgɛ mino yɨgya ka Kilisito.Lɨkpʉmʉka la kitikyo mʉ ko ngbingo wa malʉmba
2 Nakamubhibhiso kyɛ mɛtamanaga bongbingo basɨ na makabyɛ mʉtɨwɨ kamɨ bɛyɔ aka yɔ namuwonisilo ndɨ mino. 3 Luki limoti, nakapa ambɛ wibhoni lɨkpʉmʉka li nɨlɨ : Kilisito nɨ ngama ka mʉlʉkʉ wasɨ, mʉlʉkʉ nɨ ngama ka mukakɨ na Kunzi nɨ ngama ka Kilisito. 4 Mʉlʉkʉ wasɨ kiko mʉ makitikyo kanɨ akalʉmba ikanɨ kabɨkyaga lɨkpʉmʉka ko lino ko Kunzi, akaminisiso Kilisito payaya. 5 Luki limoti, muko wasɨ kiko mʉ bikpo kanɨ akalʉmba ikanɨ kabɨkyaga lɨkpʉmʉka ko lino ko Kunzi, akaminisiso mbʉnyakɨ nɨnɔ ngama kakɨ payaya. A mʉdɔngɔnɨ abhɛ kiko mʉ mʉwa+\fr 11:5 \ft mʉ mʉwa : Ko ngbingo yi nɨnɔ, bakagwi ndɨ muko ka bɨlya, bawaga ndɨ muko yi nɨnɔ mʉ bɨngɔ kowoniso bɛ ogyi bɨlya.. 6 Muko kiki mʉ makitikyo, akwanana nɛkɨ gɔnɨ kaiwisiso mʉ ! Luki limoti, yɛkɨ a suni ka muko kaikusiso tukatʉ ikanɨ kaiwisiso mʉ, a nɛkɨ bɨnza kaitikyo mʉ. 7 Mʉlʉkʉ kakwananɨgʉ ɨyɨ kaitikyo mʉ, kyɛ a likingyosi na ɨbhɨbha ko Kunzi. Luki limoti, muko a ɨyɨ ɨbhɨbha ka mʉlʉkʉ. 8 A bɛyɔ, Kunzi kagyagʉ ndɨ mʉlʉkʉ wa mambwa ka nzʉyɨ ka muko, luki limoti, muko wa mambwa opupo ndɨ ka mʉlʉkʉ. 9 Na kʉgbɛ, Kunzi kagyagʉ ndɨ mʉlʉkʉ ko bhulyo ka muko, luki limoti, agya ndɨ muko ko bhulyo ka mʉlʉkʉ. 10 Kinili, ko bhulyo ka bamalaika, muko akwanana kaitikyo mʉ, kowoniso bɛ a kusili ka mbʉnyakɨ. 11 Luki limoti, ka ɔbɨlɨ kusu pa imoti na Mombukwono-dhosu, muko kikigʉ bɨnza nɨ kɛgʉ na mʉlʉkuʉ, mʉlʉkʉ kikigʉ gɔnɨ bɨnza nɨ kɛgʉ na muko. 12 A bɛyɔ, mʉdɔngɔnɨ bɛyɔ muko wa mambwa opupo ndɨ mino ka nzʉyɨ ka mʉlʉkʉ, mʉlʉkʉ ɨbʉkʉtaga gɔnɨ ɨyɨ na muko; na masɨ apʉnya ko Kunzi.
13 Wondoni mbɛyɨ nɨ ibunu bamombukwono-dhonu bi : atʉ bɨnza muko kaiko mʉ bikpo kanɨ akalʉmba ? 14 Bambanzʉ bibhogotʉ bɛ a suni mʉlʉkʉ kaiko no tukatʉ bivukuku. 15 Luki limoti, a ɨbhɨbha muko kaiko notu bɛyɔ, kyɛ Kunzi apá ndɨ tukatʉ tidhingi kaitikyo notu mʉ. 16 Mʉmbanzʉ kapa bata kagya bodongoso ka lɨkpʉmʉka li nɨlɔ, ibhito bɨnza bɛ : iki makanisa ko Kunzi ikanɨ ibusu bamombukwono-dhosu bi takɛgʉ na yɨgya yagɔgɔ.
Pɔlɔ akauyoyiso bakilisito ko bhulyo malɨlɨ ma musilyoni
17 Nakɛgʉ kamʉbhɨbha wa no mino kamʉpá mʉtɨwɨ mi nɨma. A bɛyɔ, ngbingo yi nɨnɔ mamʉmʉkanaga mino, mʉmʉkana kunu kikogɨgʉ na ɨzangɨya, luki limoti, opupisogo lɨkpʉmʉka lanyɛ aka. 18 Ya mambwa, bebikyi bi bɛ ngbingo yi nɨnɔ mamʉmʉkanaga mino, yɨgbananaga ikogotʉ lugo kunu. Nakaɨna abhɛ o mino bɛyɔ aka yɔ. 19 Okwononito bɛ yɨgbananaga ikito aka lugo kunu, ibha bakilisito balɨngʉnʉ lugo kunu bimibhisikosito. 20 Ngbingo yi nɨnɔ mamʉmʉkanaga mino, kɛgʉ malɨlɨ ka Mombukwono-dhosu mɔ malyaga. 21 A bɛyɔ, nɨyɔ aka yɔ mikogo mino kapʉnga kalyalya, mʉtʉ wasɨ yɨkaka-yɨkaka odusogo kalya malɨlɨ nɨmɔ aka mɔ odhogoku ɨyɨ na imu, kʉwa wa gɔwa, batʉ bagɔgɔ bikogo na nza, bagɔgɔ badhamʉa bɨzɛngɛ. 22 Makɛgʉ ibunu na bandabʉ nɨbayɔ makwanana mino kalyalya na komwo ? Ikanɨ makaɨna kanisa ko Kunzi payaya na makapa kaupíso batʉ bi nɨbɔ bakɛgʉ no luki suni ? Makapa bɛ namʉbɨkyɨ bʉnɨ ? Okwononi bɛ namʉbhɨbhɨ ? Haaa, nakakwananɨgʉ pɔ kamʉbhɨbha ko bhulyo ya lɨkpʉmʉka li nɨlɔ !
Malɨlɨ ka Mombukwono-dhosu
23 A bɛyɔ, mʉtʉʉ nɨmɔ Mombukwono-dhosu ɛpá ndɨ ɨmɨ, imu nɨma, namukitisilyogo kʉwa ibunu : bhiti yi nɨyɔ bagabha ndɨ mino, Mombukwono-dhosu Yeso ava ndɨ mukati, 24 nɨyɔ amigisyo Kunzi ɨbhɨbha, obunonogo mukati, abɨkya ndɨ bɛ : « Nzʉyɨ kamɨ nɨyɨ, namupí ibunu. Gyogoni bɛyɔ kɛtamana yi. » 25 Nɨyɔ bama kalya, ava ndɨ kɔpɔ wa vinya bɛgɛyɔ, abɨkya bɛ : « Kɔpɔ yi nɨmʉ nɨ agɔmɛ wa mbɨya ko Kunzi, nɨnɔ bangʉ kamɨ odukogi mino katulyoso. Bongbingo basɨ wa momwogo ndɛkɛ mino, gyogoni bɛyɔ kɛtamana yi. » 26 A bɛyɔ, bongbingo basɨ wa malyaga ndɛkɛ mino mukati mi nɨma na kamwo kɔpɔ yi nɨmʉ, makabɨkyaga kukwakʉ ka Mombukwono-dhosu bɨngbanganya kadhwɛ kʉ kwa kʉ igoku ndɛkɛ mino.
27 Kinili, nɨnɔ akalya mukati ikanɨ kamwo kɔpɔ ka Mombukwono-dhosu nɨ kokwononigʉ, akagya bʉnyɛ ka nzʉyɨ na bangʉ ka Mombukwono-dhosu. 28 Ɛɛɛ, okwononi bɛ mʉtʉ yɨkaka-yɨkaka ɨkpɨmɨ bɨnza, alya kʉwa mukati na kamwo kɔpɔ yi nɨmʉ. 29 Kyɛ mʉmbanzʉ kalya mukati na kamwo kɔpɔ, nɨ kɛgʉ kotombisyo isi ya nzʉyɨ ka Mombukwono-dhosu, akaɨmakya nɨ ɨyɨ mombukwono-dhakɨ yi ka mʉngɨmbɔ. 30 Kinili, budhingi lugo kunu ba na bokolobu, ba na pɨka bɨpɛkɛ-pɛkɛ na bagɔgɔ bokwogoni ndɨ. 31 Takɨkpɨmaga mbɛyɨ ndɨ nɨ ibusu bamombukwono-dhosu bi, tanyɨkatu bi mʉkɔmbʉ ko Kunzi. 32 Luki limoti, Mombukwono-dhosu akatisombiso na katiyoyiso, kyɛ takogulyonitɔgʉ ka mʉkɔmbʉ pa imoti na batʉ bagɔgɔ ba ɔbɨlɨ yi nɨmʉ.