Bapɛpɛ nɨbɔ Lɨmbɛngɨ-Lotu ʉpága
12
1 Bomika-mama, nakɛgʉ kapa ambɛ wikoni ko bhiti ko bhulyo bapɛpɛ nɨbɔ lɨmbɛngɨ Lotu ʉpága. 2 Makaibho bɛ ngbingo yi nɨnɔ ma ndɨ mino nɨ makanamibhigʉ Kunzi, mikogo ndɨ bakɨgʉmya ka gbɨlɨtɔ nɨtɔ kanzɨnagɨgʉ, makakwananɨgʉ ndɨ kaigwi mambɛngɨ kambwa kabʉ. 3 Mbɨya wanʉ, nakapa kamumibhiso bɛ : mʉtʉ gʉtʉgʉ bemoti aka nɨnɔ Lɨmbɛngɨ ko Kunzi ikogo kʉsɔ kakɨ, kakwananɨgʉ kagbanga Yeso. Na Lɨmbɛngɨ ko Kunzi kiki kʉsɔ ka mʉtʉ yi nɨnɔ, kakwananɨgʉ kabɨkya bɛ : « Yeso nɨ Mombukwono-dhosu ! »4 Bapɛpɛ ba dhidhi dhi, luki limoti, Lɨmbɛngɨ-Lotu aka lɔ ʉpága. 5 Bopisi ba ya mogubho ka Kanisa a dhidhi dhi , luki limoti, bagugubhyogo Mombukwono-dhosu bemoti aka. 6 Mogubho a dhidhi dhi, luki limoti, Kunzi bemoti aka nɔ ʉpága batʉ basɨ mogubho masɨ mi nɨmɔ. 7 Lɨmbɛngɨ-Lotu akagya ligubho ka mʉtʉ wasɨ yɨkaka-yɨkaka ko bhulyo ya ɨzangɨya ka batʉ basɨ. 8 Lɨmbɛngɨ apága mʉtʉ wagɔgɔ kanzɨna na yimibho, Lɨmbɛngɨ limoti li nɨlɔ aka lɔ apá mʉtʉ wagɔ ngu kauwonisilo bambanzʉ lɨkpʉmʉka ko Kunzi na yimibho. 9 Apá wagɔ bhaya yapʉ, wagɔgɔ ngu koukuso bokolobu. 10 Lɨmbɛngɨ apága mʉtʉ wagɔ ngu yɨgya makpʉmʉka mʉmbanga-mbanga, apá wagɔ apɛpɛ kanzɨna na bugyalandʉ, apá wagɔ yimibho kotombisyo lɨkpʉmʉka nɨlɔ otukyogoku ka Lɨmbɛngɨ-Lotu ikanɨ nɨlɔ la kʉbɔbɔkʉ. Apága mʉtʉ wagɔ apɛpɛ kanzɨna masasʉ ka Bamalaika, apá wagɔ yimibho kotongbomosyogo masasʉ mi nɨmɔ. 11 Lɨmbɛngɨ limoti li nɨlɔ aka lɔ agyaga makpʉmʉka mi nɨmɔ masɨ, apá mʉtʉ wasɨ yɨkaka-yɨkaka apɛpɛ kakɨ bɛyɔ abhaɨlyaga mino.
Kanisa a abhɛ nzʉyɨ nɨyɔ a na mabhabha mudhingi
12 A bɛyɔ, Kilisito a mʉdɔngɔnɨ abhɛ nzʉyɨ nɨyɔ a na mabhabha mudhingi. Gʉtʉgʉ mabhabha mi nɨmɔ kiko mudhingi, a nzʉyɨ yimoti aka. 13 Ibusu basɨ, Bayudha ikanɨ batʉ nɨbɔ bakɛgʉ Bayudha, bosunzu ikanɨ batʉ nɨbɔ bakɛgʉ bosunzu, togwo ndɨ ibatiso kyɛ tiki nzʉyɨ yimoti kʉsɔ wa Lɨmbɛngɨ-Lotu limoti. Ibusu basɨ tinisono ndɨ na Lɨmbɛngɨ-Lotu li nɨlɔ.
14 Nzʉyɨ kɛgʉ na lɨbhabha limoti aka, luki limoti, a na imu mudhingi. 15 Kiko nɨ kʉgʉkɔ obikyini bɛ : « Nakɛgʉ ɨmɨ kʉbɔkʉkɔ, nakɛgʉ nɛkɨ lɨbhabha la nzʉyɨ. » Gʉtʉgʉ bɛyɔ, a lɨbhabha limoti aka lugo wa mabhabha ma nzʉyɨ. 16 Na kiko nɨ kutiliko obikyini bɛ : « Yɛkɨ nakɛgʉ ɨmɨ liso, nakɛgʉ nɛkɨ lɨbhabha la nzʉyɨ. » Gʉtʉgʉ bɛyɔ, a lɨbhabha limoti aka lugo wa mabhabha ma nzʉyɨ. 17 Kiko ndɨ nɨ nzʉyɨ yasɨ a liso, akwanana kʉwa ndɨ kaʉkana lɨkɨ ? Kiko ndɨ nɨ a kutiliko, akwanana kʉwa ndɨ kaibho sʉ yo luki lɨkɨ ? 18 A bɛyɔ, Kunzi obhisogo ndɨ lɨbhabha limoti-limoti la nzʉyɨ kabyɛnɛnɛ na sɨpananɨsɔ kakɨ. 19 Masɨ kiko ndɨ lɨbhabha limoti aka, ibha nzʉyɨ kɛgʉ ! 20 Mabhabha a mudhingi luki limoti, nzʉyɨ a yimoti aka.
21 Liso kakwananɨgʉ kabɨkya kʉbɔkʉkɔ bɛ : « Nakɛgʉ na nzoi kakʉ ! » Gʉtʉgʉ mʉ aka kakwananɨgʉ kabɨkya magʉ bɛ : « Nakɛgʉ na nzoi kunu ! » 22 Mabhabha ma nzʉyɨ nɨmɔ inisonogo abhɛ kiko ma payaya, ikogo gɔnɨ imu na ɨzangɨya aka. 23 Mabhabha nɨmɔ tɨnaga payaya, imu mɔ tobhibhisogo kakɨtaga magɔ. Nɨmɔ apága suni kaɨna, imu mɔ tobuulyogo kʉgbɛ, 24 kakɨtaga mabhabha ma ɨbhɨbha ma nzʉyɨ kusu. Kunzi agya ndɨ nzʉyɨ, apá ɨbhɨbha yidhingi ka mabhabha nɨmɔ tɨnaga payaya. 25 Agya ndɨ bɛyɔ kyɛ mabhabha ma nzʉyɨ kikonitɔgʉ na yɨgbananaga. Luki limoti, atʉngbʉlanagɨ mabhɔbhɔ. 26 Kiko kanɨ lɨbhabha limoti akaigomisogo, magɔgɔ masɨ igomisogo pa imoti na ilu. Kiko nɨ limoti ovini ɨbhɨbha, magɔgɔ masɨ ogwo magyagya pa yimoti na ilu.
27 Ibunu ma nzʉyɨ ka Kilisito, mʉmbanzʉ yɨkaka-yɨkaka lugo kunu a lɨbhabha la nzʉyɨ yi nɨyɔ. 28 Kunzi ubhiso ndɨ *batʉtʉmbwa ka pa ya mambwa kʉsɔ wa kanisa, ka pa ya yɨba bogyalandʉ na ya yɨsaa bowonisili. Kumbuso yi, atʉ na batʉ nɨbɔ ba na apɛpɛ kagya makpʉmʉka mʉmbanga-mbanga, kauukuso bambanzʉ, kausingyo bɛngɛnɨ, kaʉnanaga batʉ bagɔgɔ, kanzɨna masasʉ ka Bamalaika. 29 Basɨ bakɛgʉ batʉtʉmbwa, ikanɨ bogyalandʉ ikanɨ bowonisili. Basɨ bakɛgʉ na apɛpɛ kagya makpʉmʉka mʉmbanga-mbanga, 30 kauukuso bambanzʉ, kanzɨna masasʉ ka Bamalaika, ikanɨ kotongbomosyogo masasʉ mi nɨmɔ. 31 Ukisoni nɛkɨ bapɛpɛ nɨbɔ ba na ɨzangɨya kʉgbɛ. Ko bhulyo yi nɨyɔ, nakamuwoniso mbɨya wanʉ pisi yanza kʉgbɛ kakɨtaga bayagɔgɔ bayasɨ.