Sɨpananɨsɔ okitogi makpʉmʉka masɨ
13
1 Nakanzɨna gʉtʉgʉ masasʉ ka bambanzʉ na nɨmɔ ka bamalaika, luki limoti, nakiki na sɨpananɨsɔ, na mʉdɔngɔnɨ abhɛ lɨyʉ la ngwɛyɨ ikanɨ kengele nɨyɔ akobuko. 2 Nakanzɨna gʉtʉgʉ na bugyalandʉ ikanɨ kandʉnga makpʉmʉka masɨ nɨmɔ makɨsʉma ikanɨ kaiko na yimibho yasɨ ikanɨ kaiko na bhaya nɨyɔ nakwanana na iyu kohokiso bangʉpa, luki limoti, nakiki na sɨpananɨsɔ, na payaya aka. 3 Nakʉlʉpya gʉtʉgʉ batʉ ba yangya lɨngama kamɨ lasɨ, nɨsʉta bɛ bɛbhʉsyɨ ko buku, nakiki na sɨpananɨsɔ, nɨyɔ kɛgʉ na ɨmɨ na ɨzangɨya.4 Mʉtʉ wa sɨpananɨsɔ okibhyogotʉ, ikogo mʉtʉ wanza, kikogɨgʉ no miso mopi, kɨbhɨnɨkagɨgʉ, kikogigʉ na lɨmbɛngɨ lidhingi, 5 kagyagɨgʉ lɨkpʉmʉka lo suni, kakɨsagɨgʉ bʉnza kakɨ aka mombukwono-dhakɨ yi, kangbʉtagɨgʉ bɨkwa, kobhisogɨgʉ lɨkpʉmʉka lanyɛ ka lɨmbɛngɨ. 6 Mʉtʉ wa sɨpananɨsɔ kogwogɨgʉ magyagya ka lɨkpʉmʉka lanyɛ, luki limoti, ogwogo magyagya ka lɨkpʉmʉka la lɨngʉnʉ. 7 Apɨlyaga makpʉmʉka masɨ, obuulyogo bhaya ka bongbingo basɨ, ikogo na mʉtamanagɨ na anokibyo bongbingo basɨ.
8 Sɨpananɨsɔ kosyogigʉ. Luki limoti, bugyalandʉ osyotʉ ndɛkɛ , apɛpɛ mʉnzɨna masasʉ ka Bamalaika ikotʉ ndɛkɛ na mulibo, yimibho olimikogo ndɛkɛ. 9 A bɛyɔ, yimibho kusu a yɨkɛdɛ na bugyalandʉ kusu a bikpufu. 10 Luki limoti, ngbingo yi nɨnɔ yimibho ya lɨngʉnʉ odhoku ndɛkɛ mino, nɨyɔ yo kpufu osyo.
11 Ngbingo yi nɨnɔ na ndɨ mino miki, nanzɨnaga ndɨ abhɛ miki, natamanaga ndɨ abhɛ miki, nanotombisyo makpʉmʉka abhɛ miki. Luki limoti, wa nɨɨta kʉwa mino mʉmbanzʉ, nasa lɨbhɛnzɨ lasɨ. 12 Mbɨya wanʉ, takaɨna lɨkpʉmʉka la lɨngʉnʉ abhɛ mulundu kʉsɔ wa nɛlaga wombulu-mbulu, luki limoti, kumbuso, tɨnatʉ ndɛkɛ bɨngbanganya. Mbɨya wanʉ, nakaibho luki lɨkɛdɛ aka. Luki limoti, kumbuso, namibho ndɛkɛ Kunzi bɨnza mʉdɔngɔnɨ bɛyɔ emibhogo mino.
13 Mbɨya wanʉ, makpʉmʉka masaa mi nɨma akpakyanaga pa imoti aka : bhaya, mʉtamanagɨ na sɨpananɨsɔ. Luki limoti, nɨlɔ la ɨzangɨya kʉgbɛ lugo wa makpʉmʉka masaa mi nɨmɔ nɨ sɨpananɨsɔ.