Pɔlɔ akapá mʉtʉʉ ko bhulyo gbɨlɨtɔ
10
1 Bomika-mama, nakapa ambɛ tomononi nɨlɔ usilyo ndɨ batɨtosu. Ba ndɨ kakpakyana ɨbʉ basɨ kusili wa ɨkʉba, bazabha ndɨ gɔnɨ ɨbʉ basɨ libo lidhingi langbʉ. 2 Bamatɨkana ndɨ ɨbʉ basɨ na Musa pisi kogwo ibatiso ka ɨkʉba na kʉsɔ wo libo li nɨlɔ. 3 Balyaga ndɨ ɨbʉ basɨ malɨlɨ mumoti ma lɨmbɛngɨ. 4 Na bomwogo ndɨ gɔnɨ ɨbʉ basɨ libo la lɨmbɛngɨ limoti aka. A bɛyɔ, bomwogo ndɨ libo nɨlɔ opupogo ndɨ ka lɨtalʉ. Lɨtalʉ li nɨ Kilisito nɨnɔ ba ndɨ kakpakyana pa imoti na ɨbʉ. 5 Luki limoti, budhingi lugo kabʉ bakɛgʉ ndɨ bʉkwanana ko miso ko Kunzi, kinili, bokwogo ndɨ ka ɨsa. 6 Makpʉmʉka mi nɨmɔ a likingyosi kukusu ibha takikonitɔgʉ na mʉsasa manyɛ bɛyɔ batɨtosu ba ndɨ mino na imu+\fr 10.6 \ft Wanda gɔnɨ ka Lɨtatanga 11.4.. 7 Makobhibhisogonitɔgʉ gbɨlɨtɔ mʉdɔngɔnɨ bɛyɔ bagɔgɔ lugo kabʉ bagyaga ndɨ mino. A mʉdɔngɔnɨ bɛyɔ ikpikogo mino kʉsɔ wa Mobiso Motu bɛ : « Bambanzʉ bikonono ndɨ kalyalya na komwo, kumbuso yi, bamaga ndɨ kobinoa. » 8 Takikonitɔgʉ kagya bɨlya mʉdɔngɔnɨ bɛyɔ bagɔgɔ lugo kabʉ bagyaga ndɨ mino, bolumwogo ndɨ bɛlɔfʉ batɛkɛbɛ baba na basaa ka lɨsyɛ limoti. 9 Takakingilogonitɔgʉ Kilisito mʉdɔngɔnɨ bɛyɔ bagɔgɔ lugo kabʉ bagyaga ndɨ mino, banzʉka bulumisogo ndɨ. 10 Takikonitɔgʉ kaɨgama mʉdɔngɔnɨ bɛyɔ bagɔgɔ lugo kabʉ bagyaga ndɨ mino, malaika ko Kunzi nɨnɔ ʉmwɔgɔ bambanzʉ, ulumwisogo ndɨ.
11 Makpʉmʉka mi nɨmana masɨ usilyo ndɨ batɨtosu kyɛ iki likingyosi ko bhulyo kusu. Ikpikogo ndɨ katiwoniso kambwa, kyɛ ta ko ngbingo nɨnɔ a buwobhi na mulibo. 12 Kinili, mʉtʉ yi nɨnɔ akasɨma bɛ awakamaga ka bhaya, ɨmɨnyɨtɔ bɛ kogwonitɔ. 13 Kʉbɔbɔkʉ nɨkwɔ amusilyogo, a nɨkwɔ aka kwɔ usilyogo batʉ basɨ. Kunzi nɨnɔ otulyosogo nɨlɔ abɨkyaga, kakwananɨgʉ kasa Mumuyoniso bɛ amʉmakyɨ ka kʉbɔbɔkʉ kakɨtaga ngu kunu. Luki limoti, makogulyo gʉtʉgʉ mino, amʉpátʉ ngu kokibhyo na kopupogo mino.
Makomotonitɔgʉ ligubho ko Kunzi na gbɨlɨtɔ
14 Kinili, bomika-mama bʉpakaa, wiminyonito ! Makobhibhisonitɔgʉ gbɨlɨtɔ. 15 Nakamʉnzɨnɨlya abhɛ batʉ ba yimibho. Wondilyoni mbɛyɨ ibunu bamombukwono-dhonu bi lɨkpʉmʉka nɨlɔ nakabɨkya. 16 Tomononi wa tamwogo mino kɔpɔ wa bʉbʉnga, tamigisilyogotʉ Kunzi ɨbhɨbha. Ngbingo yi nɨnɔ tamwogo mino, takamatɨkanagɨgʉ mbɛyɨ pa imoti na bangʉ ka Kilisito ? Na ngbingo yi nɨnɔ tagbananaga mino mukati, talya, takamatɨkanagɨgʉ mbɛyɨ pa imoti na nzʉyɨ ka Kilisito ? 17 Yɛkɨ mukati a mumoti aka, gʉtʉgʉ ibusu takiko bakpʉ, ta nzʉyɨ yimoti, kyɛ ibusu basɨ talyaga mukati mumoti.
18 Winoni mbɛyɨ likingyosi la yɨgya ka Bɛzalɛlɨ : batʉ nɨbɔ balyaga apɛpɛ nɨnɔ babhisogo ka gbɔgbɔ, bakikogogigʉ mbɛyɨ bʉmatɨkana no Kunzi pisi ka apɛpɛ yi nɨnɔ ? 19 Na sɛ kapa kabɨkya bʉ ? Ambɛ makɔlɔ nɨmɔ bʉpága gbɨlɨtɔ ka apɛpɛ mɔ a na ɨzangɨya ? Ikanɨ gbɨlɨtɔ yɔ a na ɨzangɨya ? 20 Kalɨ ! Luki limoti, nakabɨkya ambɛ apɛpɛ nɨnɔ mʉtʉ yi nɨnɔ kamibhigʉ Kunzi apága, usilyogo babhɨlɨ, kasilyogɨgʉ Kunzi. Nakɛgʉ kapa ambɛ motikononi na babhɨlɨ. 21 Makakwananɨgʉ komwo ko ngbingo bemoti ka kɔpɔ ka Mombukwono-dhosu na ka nɨnɔ ka babhɨlɨ. Makakwananɨgʉ gɔnɨ kalyalya ko ngbingo bemoti, ka mɨza ka Mombukwono-dhosu na ka nɨnɔ ka babhɨlɨ. 22 Ikanɨ, takapa kadhwaga imi ka Mombukwono-dhosu ? Makasɨma bɛ ibusu bɔ takitogi no ngu ?
Togyini makpʉmʉka masɨ ka ɨbhɨbha ko Kunzi
23 Batʉ bagɔgɔ lugo kunu babɨkyaga bɛ : « Takwanana kagya masɨ. » Iyo, luki limoti, masɨ kɛgʉ manza. « Takwanana kagya masɨ. » Iyo, luki limoti, masɨ kakwananɨgʉ kopiko bhaya kusu. 24 Mʉmbanzʉ gʉtʉgʉ bemoti aka kokisonitɔgʉ ɨzangɨya kakɨ ka mombukwono dhakɨ yi, luki limoti, nɨyɔ ka batʉ bagɔgɔ.
25 Lyoni masɨ nɨmɔ bagabhaga ka sɔkɔ nɨ mambɛngɨ kɛgʉ kamʉdhwa ko bhulyo yi. 26 A bɛyɔ, ikpikogo bɛ : « Ɔbɨlɨ na masɨ nɨmɔ a kʉsɔ yi a ma ka Mombukwono-dhosu. »
27 Kiko nɨ mʉtʉ nɨnɔ kamibhigʉ Kunzi amumokini kalyalya kʉ kakɨ, makabhaɨlya kaɨnda, lyoni masɨ nɨmɔ bamʉpá nɨ mambɛngɨ kɛgʉ kamʉdhwa ko bhulyo yi. 28 Luki limoti, mʉtʉ bemoti kamʉbɨkya bɛ : « Makɔlɔ mi nɨmana a nɨmɔ bapá ndɨ abhɛ apɛpɛ ka gbɨlɨtɔ. » Kiko bɛyɔ, makolyonitɔgʉ ko bhulyo ka mʉtʉ yi nɨnɔ amubikyi na bɛkyɛ lɨmbɛngɨ kadhwonitɔ. 29 Nakɛgʉ kabɨkya ko bhulyo ya mambɛngɨ kunu, luki limoti, ko bhulyo ka nɨlɔ ka nɨnɔ amubikyi.
Mʉtʉ bemoti akwananatʉ kauuso bɛ : « Ko bhulyo ɨkɨ yɔ bɛpakyaga kagya bɛyɔ na mino kapa ko bhulyo ya lɨmbɛngɨ ka mʉtʉ wagɔgɔ ? 30 Nakamigisyo Kunzi ɨbhɨbha ko bhulyo luki nɨlɔ nakalya, ko bhulyo ɨkɨ yɔ bɛnzɨnzɨnya mino ko bhulyo malɨlɨ mi nɨmɔ. ? »
31 Kinili, kiko nɨ makalyalya, komwo ikanɨ kagya makpʉmʉka masɨ, gyogoni ka ɨbhɨbha ko Kunzi aka. 32 Yɨgya kunu kugwisisonitɔ Bayudha ikanɨ batʉ nɨbɔ bakɛgʉ Bayudha gʉtʉgʉ Kanisa ko Kunzi aka. 33 Byeni yɨgya kamɨ. Nagyaga yapʉ kyɛ yɨgya kamɨ yasɨ ubosili bambanzʉ basɨ. Nakakɨsagɨgʉ ɨzangɨya kamɨ ka mombukwono-dhamɨ, luki limoti, nɨyɔ ka batʉ basɨ, kyɛ binisoni na muukuso.