Mʉkalya ka atʉtʉmbwa
9
1 Nakɛgʉ mbɛyɨ gɔnɨ mʉkʉlɨkanaga kagya bɛyɔ nopo mino ? Nakɛgʉ mbɛyɨ atʉtʉmbwa ? Nakamɨnagʉ mbɛyɨ ndɨ gɔnɨ Yeso Mombukwono-dhosu ? Makɛgʉ mbɛyɨ masɔlɔ ma ligubho nɨlɔ nagyɨlyaga Mombukwono-dhosu ? 2 Gʉtʉgʉ batʉ bagɔgɔ bakabɨkya bɛ nakɛgʉ atʉtʉmbwa, ibunu yɨpɛpɛ matʉ kaibho bɛ na atʉtʉmbwa. A bɛyɔ, yɛkɨ ma kʉwa luki limoti na Bamombukwono-dhosu, ibunu bɔ makowoniso bɛ na atʉtʉmbwa.3 Nusikisyogo batʉʉ bi nɨbɔ bɛsʉngʉlyaga bɛ : 4 tokokwononigʉ kainisono na luki lɨlya ikanɨ nɨlɔ limwo ka ligubho nɨlɔ tagyaga ? 5 Tokokwononigʉ gɔnɨ ibusu kaʉva boko nɨbɔ tiko kakpakyana pa imoti na ɨbʉ ka ligubho mʉdɔngɔnɨ abhɛ batʉtʉmbwa bagɔgɔ, bamamakɨ Mombukwono-dhosu na gʉtʉgʉ Pɛtɛlɛ aka ? 6 Ikanɨ ibusu na Bhalanabha aka bɔ tokwononi kaigugubhyo bamombukwono-dhosu bi kainisono no luki ka ɔbɨlɨ kusu ? 7 Sʉdha tino nɔ ɨkɨsɨlyaga nɨ ɨyɨ mombukwono-dhakɨ yi makpʉmʉka ma bʉsʉdha ? Ikanɨ mʉtʉ tino nɔ kakwananɨgʉ kalya bhumo ya muzabhibhu nɨnɔ akʉna ndɨ ? Ikanɨ, mububulyo tino nɔ kakwananɨgʉ komwo maziba ka banyama nɨbɔ ubuulyogo ?
8 Makasɨma bɛ nakabɨkya bɛyɔ kyɛ nawakɨgʉmya ka tamanaga ka bambanzʉ ? Gʉtʉgʉ Mʉtʉʉ ka Musa aka abɨkyaga bɛgɛyɔ. 9 A bɛyɔ, ikpikogo kʉsɔ wa Mʉtʉʉ ka Musa bɛ : « Wakakondilonitɔgʉ ngɔmbɛ mʉnɔkʉ kanɨ akadɨta mʉpʉnga+\fr 9.9 \ft Wanda kʉsɔ wa Tomosyo 25.4.. » Kunzi asyɛgɛtʉ lɨmbɛngɨ ka bangɔmbɛ ? 10 Kɛgʉ mbɛyɨ kanzɨna bɛyɔ ko bhulyo kusu ? Abɛyɔ, bokpiko ndɨ mʉnzɨna mi nɨmɔ ko bhulyo kusu. Okwononi bɛ mʉtʉ nɨnɔ akadhɨma tiko na nɨnɔ akobhuulyo, bagyɨ ligubho na mʉtamanagɨ bɛ ka mulibo, binisonotʉ gɔnɨ ɨbʉ na masɔlɔ mi ma kabʉ. 11 Takʉna ndɨ masɔlɔ ma lɨmbɛngɨ kʉsɔ kunu. Iko kʉwa lɨkpʉmʉka lɨmbanga tino kiko kanɨ ta na mʉsasa kalya luki ka mabɔkʉ kunu ? 12 Kiko nɨ batʉ bagɔgɔ bakalyalya ka mabɔkʉ kunu, kɛgʉ ibusu bɔ talyalya bi kaʉkɨtaga ɨbʉ ?
Takagyagʉ ndɨ ibusu bɛyɔ, luki limoti, takokibhyo masɨ mi nɨmɔ kyɛ takokpingbonitɔgʉ Mongoni Manza ka Kilisito.
13 Makibhigʉ ambɛ batʉ nɨbɔ bagyaga ligubho ka ndabʉ ko Kunzi, balyalyaga ka ligubho li nɨlɔ ? Na nɨbɔ bʉpága bapɛpɛ ka gbɔgbɔ, balyayaga ka bapɛpɛ bi nɨbɔ gɔnɨ bɔ. 14 Na gɔnɨ, Mombukwono-dhosu obikyoni ndɨ bɨngbanganya bɛ batʉ nɨbɔ babɨkyaga Mongoni Manza, balyalyagɨ ka Mongoni Manza.
15 Luki limoti, nakagyagʉ ɨmɨ bɛyɔ, na nakokpikigʉ bɛkyɛ na mino kakʉnga luki. Okwononi gʉtʉgʉ nokwi kanɨ mʉmbanzʉ kokpingbigʉ yɨbhɨbha kamɨ ko bhulyo lɨkpʉmʉka li nɨlɔ. 16 Nakakwananɨgʉ kaɨbhɨbha ko bhulyo yɨbɨkyaga Mongoni Manza, kyɛ a ligubho nɨlɔ nokwononi kagya. Nokogyi bɛyɔ, iko kumbu yidhingi na ɨmɨ. 17 Nakɨtwa ndɨ nɨ ɨmɨ ka ligubho li nɨlɨ, nakwananatʉ bi kaiko na mʉkalya. Luki limoti, yɛkɨ a likumbogi nɨlɔ bebhinikiso ndɨ, nakwanana kagya aka. 18 Mʉkalya kamɨ sɛ kʉwa nɨ ɨkɨ ? Imu nɨ kabɨkyaga Mongoni Manza payaya kanɨ nakigumyigʉ kakʉnga nɨlɔ Mongoni Manza akwanana bi kɛpá.
19 A bɛyɔ, nakɛgʉ musunzu ka mʉmbanzʉ gʉtʉgʉ bemoti aka. Luki limoti, nɨɨta musunzu ka bambanzʉ basɨ kyɛ babɨnɨkyanɨ bakpʉ. 20 Lugo ka Bayudha, nɨgyaga abhɛ Muyudha kyɛ babɨnɨkyanɨ. Nakɛgʉ ɨmɨ kusili wa Mʉtʉʉ ka Musa, luki limoti, ngbingo yi nɨnɔ nikogo mino lugo kabʉ, nɨgyaga abhɛ nakiko gɔnɨ ɨmɨ kusili wa Mʉtʉʉ mi nɨmɔ kyɛ babɨnɨkyanɨ. 21 Nɨyɔ nikogo gɔnɨ lugo ka batʉ nɨbɔ bakibhogɨgʉ Mʉtʉʉ mi nɨmɔ, nɨgyaga abhɛ ɨbʉ, nɨ nakɛgʉ kanda mʉtʉʉ, kyɛ babɨnɨkyanɨ. Kɛgʉ bɛkyɛ na dhi na mʉtʉʉ ko Kunzi, kyɛ na kusili wa mʉtʉʉ ka Kilisito. 22 Ka nɨbɔ ba na bʉpɔ ka bhaya, nɨgyaga abhɛ mʉpɔ kyɛ binisoni na muuukuso. Ka batʉ basɨ, navaga yɨgya kabʉ aka, kyɛ nagyaga yasɨ ambɛ bemoti-bemoti lugo kabʉ binisoni na muukuso. 23 Nagyaga nɨmɔ masɨ ko bhulo ya Mongoni Manza, kyɛ ninisonito gɔnɨ ɨmɨ na bʉbʉnga bi.
24 Mibhogo bɨnza bɛ batʉ nɨbɔ bagyaga masindani ma mbangʉ, bapɨkɨtaga basɨ. Luki limoti, mʉtʉ bemoti aka nɔ bapága mʉkalya. Ɛɛɛ, pikitoni nɛkɨ mbangʉ wa makwanana mino kainisono na mʉkalya. 25 Batʉ basɨ nɨbɔ bagyaga masindani, biginyilyogotʉ. Bagyaga bɛyɔ kyɛ bʉbhangɨ bɛgbɛgbɛ, wɨna sɛ bɛgbɛgbɛ bi nɨbayɔ kolipyogɨgʉ na pʉtɨkana. Luki limoti, tagyaga ibusu bɛyɔ kyɛ tinisoni na nɨbayɔ kapʉtɨkanɨgʉ ndɛkɛ. 26 Kinili, nakɛgʉ kapɨkɨta gbalɨ. Nakabhʉmana luki limoti, kɛgʉ abhɛ nakiko kabhʉmana na ovivi. 27 Nakogyogyiso nzʉyɨ kamɨ kʉgbɛ, ibha nakozongonitɔgʉ mʉkalya, kumbuso kaʉbɨkyaga batʉ bagɔgɔ Mongoni Manza.