Apɛpɛ wa makɔlɔ nɨmɔ bʉpága bokunzi
8
1 Ka nɨlɔ ondi apɛpɛ wa makɔlɔ nɨnɔ bʉpága bokunzi, takaibho ambɛ « ibusu basɨ ta na yimibho » ka lɨkpʉmʉka li nɨlɔ bɛyɔ mo mino kabɨkya. Yimibho apága yɨbhɨnɨka, luki limoti, sɨpananɨsɔ opikogo kʉsɔ wa bhaya. 2 Mʉmbanzʉ kiko kasɨma bɛ a na yimibho, kanibhigʉ bɛyɔ okwononi mino bɛ ibhi. 3 Luki limoti, mʉtʉ yi nɨnɔ apaga Kunzi, Kunzi amibhagatʉ mʉtʉ yi nɨnɔ.4 Ka nɨlɔ ondi apɛpɛ wa makɔlɔ nɨnɔ bʉpága bokunzi, takwananatʉ kalya makɔlɔ mi nɨmɔ ? Takaibho bɨnza ambɛ gbɨlɨtɔ kɛgʉ luki la bangbɔlɔ kʉnʉ ka ɔbɨlɨ, Kunzi a bɛmoti aka. 5 Atʉ na makpʉmʉka kʉgʉ wa lɨsyɛ na kʉnʉ ka lɨtɔmbʉ nɨmɔ batʉ bagɔgɔ balɨkyaga bɛ bokunzi. Yɛkɨ a bɛyɔ, atʉ nɛkɨ na «bokunzi» bakpʉ na «bangama» bakpʉ. 6 Luki limoti, ka nakpangbala kusu yɨpɛpɛ, Kunzi a bemoti aka, Obhosu nɨnɔ agya ndɨ makpʉmʉka masɨ, ta na ɔbɨlɨ ko ngu kakɨ. Na gɔnɨ, Mombukwono-dhosu a bemoti aka, nɨ Yeso-Kilisito. Kunzi agya ndɨ makpʉmʉka masɨ pisi kʉ kakɨ, ɨyɨ nɔ atɨpága ɔbɨlɨ.
7 Luki limoti, batʉ basɨ bakibhigʉ lɨngʉnʉ la lɨkpʉmʉka li nɨlɔ. A bɛyɔ, batʉ bagɔgɔ bibhonono ndɨ kaubhibhiso bokunzi aka. Kadhwɛ na lɨsyɛ li nɨlɨ, balyaga makɔlɔ nɨmɔ bɨnaga abhɛ bʉpá bokunzi ka bapɛpɛ, tamanaga kabʉ a ya bʉpɔ, bɨmɨnaga kʉwa abhɛ boputikonini pisi ka makɔlɔ mi nɨmɔ. 8 Wɨna sɛ, kɛgʉ malɨlɨ mɔ atikpudiso banʉ buwobhi no Kunzi. Takalya abhɛ tokolyigʉ, a mʉdɔngɔnɨ aka.
9 Wiminyonito, yɛkɨ makɛgʉ bata bosunzu, yɨgya kunu kubhumyonitɔgʉ batʉ nɨbɔ bakɛgʉ bʉngata ka bhaya. 10 A bɛyɔ, kiko kanɨ mʉtʉ yi nɨnɔ bhaya kakɨ konongotigʉ uminini, ɨwɛ nɨnɔ wa na yimibho, kalyalya ka ndabʉ nɨyɔ bubhibhisogo mino bokunzi, kɨnɨgʉ abhɛ kiko bɨnza kalya makɔlɔ nɨmɔ bʉpága bokunzi ? 11 Kiko bɛyɔ, mʉtʉ yi nɨnɔ obungogotʉ ko bhulyo yimibho kakʉ. Wɨna sɛ, Kilisito okwo ndɨ ko bhulyo kakɨ gɔnɨ. 12 Makʉgyɨya bomomonu bʉnyɛ nɨbɔ bakanongotigʉ ka bhaya, mutuliso mambɛngɨ, a mʉdɔngɔnɨ abhɛ makagyɨlya Kilisito mombukwono-dhakɨ yi bʉnyɛ. 13 Kinili, mika-mama kogwo ka bʉnyɛ ko bhulyo ya malɨlɨ, nakalyɨgʉ ndɛkɛ bata makɔlɔ kyɛ nakagwisisoni.