Posambaya merapi masalisa ratulungi
70
Dade i Daud nipovia tempo ia nombadekei pesomba ala ia ratora nTUPU. Dade hitu nipovia ka pakeni ntopodade.2 O PUE Alatala, tulungimo yaku,
kabasakamo yaku masalisa.
3 Palambakamo tona anu madota mompatesi yaku
maeya bo maipu rarara.
Palambakamo tona nompovooka kasala nggadungguku,
radagi bo rasalai.
4 Palambakamo tona nompongirika yaku
matikaja bo maeya.
5 Kambou pura-pura tona metupu nte Komiu,
masana bo madamba.
Pura-pura tona madota rapakasalamaMiu mosukuru nte Komiu
bo njuu-njuu manguli nakuasa mpuu TUPU.
6 O PUE Alatala, yaku hii napakasi bo nalente;
tulungimo yaku masalisa.
Aga Komiumo Topetulungi bo Topepakasalama,
kamaimo tulungi yaku.