Posambaya bo posukuru
40
Dade i Daud nipovia ka pakeni ntopodade.
2 Yaku mpuu-mpuu nanjarumaka TUPU bo nompopea petulungiNa.
Ia nomparantaika yaku bo nipetalingaiNa pekakaiku.
3 Ia nangoretaka yaku dako ra lovu kamatea,
bo dako ralonjo.
Ia nompakaroso kadaku,
molipa ri bavo bulu vatu.
4 Ia nombadekei dade nabaru ka yaku kupodadeka,
mombatoiya Alatala nisombata.
Madea tona manggisani dade haitu bo ira mokumaa,
bo momparasaya TUPU.
5 Nasana mpuumo tona nomparasaya TUPU,
anu ledo nanjarumaka tona nalanga rarana,
bo ledo nangoseaka tona nadea davana.
6 O PUE,
nadea mpuu anu nipoviaMiu ka kami,
poviaMiu anu nipokumakaa bo patujuMiu ka kami ledoria simbayuna.
Yaku madota mantesakina bo mompatolelena,
tapi ledo kupakule mantesakina pura.
7 Pesomba nipalabu bo kandea rapesombaka ledo nipokonoMiu,
binata nipalabu rapompakalali dosa ledo nituntuMiu.
Tapi Komiu nombadekei talinga ka yaku
ala mamala mangepe suaraMiu.
8-9 Jadi yaku nanguli,
“Siimo yaku,
o Pue Alatala,
nasana raraku movia dotaMiu,
nasimbayu mpo anu nitulisi riara Buku Gasa anu nombatesaki yaku.
AturaMiu kuboliaka riara ntaiku.”
10 O PUE riara nggasiromu ntodea nombasomba Komiu,
kupatolele kareba berimbana Komiu nompakasalama kami.
Anu haitu ledo menonto-nonto kutesa,
Komiu nanggisani pura-pura haitu.
11 Kareba kasalama haitu ledo aga kuboli riara ntaiku.
Kabelo bo toveMiu ledo ria kaupu-upuna,
kana kupatolele njuu riara nggasiromu ntodea nombasomba Komiu.
12 O PUE,
nemo ranga menonto mompotove yaku,
jagaimo yaku ante toveMiu ledo ria kaupu-upuna.
13 Sabana nirasaiku,
yaku nipatiku nu silaka,
ledo namala rabila kadeana.
Yaku eva niraga nu dosa-dosaku
sampe domo namala yaku nekita.
Dosa bo silakaku nadeapa pade bulua ri balenggaku,
nompakaupu raraku.
14 O PUE pakasalama yaku!
Tulungimo yaku masalisa!
15 Tona anu madota mompatesi yaku,
dekeikamo radagi bo malai nte ingu rara.
Tona nompokono yaku masilaka,
dekeikamo moura bo rapakaeya.
16 Tona nompongirika yaku
dekeikamo matikaja bo maeya.
17 Kambou pura-pura tona nombasomba Komiu
masana bo madamba,
bo pura-pura mompotove kasalama dako nte Komiu
njuu-njuu manguli,
“Nambaso mpuu kakuasa nTUPU.”
18 O Pue,
yaku nandasa bo napakasi,
tapi Komiu nomparantaika yaku.
O Alatala,
Komiumo topotulungi bo topompakasalama yaku,
nemo maulia mombatulungi yaku!