Perapi riara nggasusa
39
Dade i Daud nipovia ka i Yedutun,
pakeni ntopodade.
2 Nipekiriku,
yaku kana mainga mokainggu bo motesa
ala yaku ledo madosa.
Ane da maria tona nadaa ri sijoriku,
yaku ledo madota motesa.
3 Tapi ane ledo motingo yaku,
haitu aga mompakarugi karoku mboto
bo mantambai kantamona kandasaku.
4 Tempo nipekirikuka nantambai kasusa raraku,
bo nasesa mpuu raraku.
Kaupuna nangulimo yaku,
5 “O PUE,
ulimo maipia yaku mamate
ala kusani yaku ledo matuvu sampe ri kasae-saena.”
6 Nambuku mpuu umuruku nipakatantuMiu!
Ri panggitaMiu katuvuku ledo ria batuana.
Mpuu-mpuu katuvu manusia,
aga eva sumoa nasalisa nalipo.
Jedaa
7 Katuvu nu manusia aga nalipo mpo vayo.
Pura-pura bagona ledoria batuana;
ia notambunaka mbara-mbara,
tapi ledo nisanina isema rakabolikana.
8 O Pue,
hitupa nuapapa kupopea,
aga Komiu nisarumakaku.
9 Kabasaka yaku dako ri pura-pura dosaku,
bo nee rapalamba yaku rapongeika ntona nambongo.
10 Yaku domo notingo bo domo nokanano,
sabana Komiu mbotomo nombahuku yaku.
11 Tumo rahukuMiu yaku hanupa,
pehuku nidekeiMiu sakidepa nompakamate yaku.
12 Komiu nombahuku manusia ante pehuku
sabana kasala nipoviana.
Komiu nombagerosi anu nipokono manusia,
eva ane nombagerosi kayu,
Mpuu-mpuu,
manusia aga mpo sumoa nasalisa nalipo.
Jedaa
13 O PUE,
epemo posambayaku,
pariara perapiku nekitulungi,
nee aga rapetalingai nggoo yaku motumangi.
Yaku aga eva topanjayo anu nesai sampalai ri dunia,
nasimbayu mpo pura-pura totuaku nggaulu.
14 O PUE,
tumo marau raraMiu mangganoto yaku,
ala masana sakide pombarasaiku
dopame yaku mompalaisi dunia hitu.