Posambaya riara nggasusa
38
Dade i Daud tempo nombadekei pesomba ala ia ratora nTUPU.
2 O PUE,
nau marau raraMiu nemo rahukuMiu yaku,
nau magigi raraMiu nemo rapandasaMiu yaku.
3 Kandasa nirasaiku eva Mata panaMiu nombatosu karoku,
bo kantamona nirasaiku eva niparoo paleMiu.
4 Nadua mpuu nirasaiku isi nggaroku sabana karau nu raraMiu;
Ledo nabelo nirasaiku bukuku sabana dosaku.
5 Kasalaku eva lono oge noavesaka yaku,
dosaku nantamo mpuu nirasaiku.
6 Baka-bakaku nanana bo navau,
sabana kambongoku.
7 Nandasa mpuu dua nirasaiku
njumaeo yaku namundo bo nabuku raraku.
8 Dua nompakapane karoku,
ledo ria nabelo nirasaiku karoku.
9 Yaku nalente sabana naupu roso nggaroku,
yaku nongau sabana ledo nasana raraku.
10 O Pue,
nisaniMiu pura pompokono raraku,
pongauku ledo namala ratabuniaka ka Komiu.
11 Suleku norende-rende,
roso nggaroku nalipo,
mataku navuraumo.
12 Roa-roaku bo vega rapaku nepetalilikamo sabana duaku,
bo sampesuvu-sampesuvuku nombakavaosi yaku.
13 Tona madota mompatesi yaku nombataa tolia ka yaku;
tona anu madota mompakasusa yaku,
nompekirika berimbana mompakarugi yaku
bo nonia mompanavu yaku ante pebagiu.
14 Tapi yaku aga netibongo eva tona ledo neepe,
bo ledo notesa eva tona nabobo.
15 Yaku mpuu-mpuu eva tona ledo neepe,
bo yaku ledo notingo.
16 O PUE,
aga Komiu nisarumakaku,
Komiu Tupu Alatala nisombaku,
anu mompesanaka yaku.
17 Nee rapalamba baliku masana mompeinta kasusaku,
nee rapalamba ira mompakalanga rara tempo yaku malente.
18 Sabana nirasaiku sakidepa maupumo raraku,
apa dua nirasaiku njuu.
19 Yaku mombanoa kasalaku;
apa nasesa raraku nompekirika dosaku.
20 Nadea mpuu tona nompobali yaku,
bo ledo ria sabana ira nompovuu mata yaku.
21 Ira nobalasi pokaingguku nabelo ante anu nadaa,
ira nompobali yaku sabana yaku nangelo anu belo.
22 O PUE Alatala nisombaku,
nee rapalaisi yaku,
bo nee rakavaosi yaku.
23 O PUE,
kakavamo masalisa mantulungi yaku,
Komiu topompakasalama yaku.