Uere ntona nadaa bo tona nabelo
37
Dade dako nte i Daud.
Nee marau raramu sabana tona nokainggu nadaa,
nee masiriati nte tona nokainggu natenggo.
2 Sabana katuvura ledo masae ri dunia,
ira mpo kavoko bo tuda-tuda nasalisa nalele bo nangau.
3 Parasayamo TUPU,
bo pokainggumo mabelo,
katetidamo ri ngata nijanjiNa bo kana matutu mangoseaka Ia.
4 Elomo kasana raramu nte TUPU,
Ia mompakaosa dota nu raramu.
5 Dekeimo katuvumu ka TUPU,
bo sarumakamo Ia,
ratulungiNa iko.
6 Ia mompopakita katutumu neose mpo reme,
bo kagasa raramu mpo reme nu eo.
7 Tongorakamo bo posabaramo mompopea
nuapa rapovia nTUPU ka iko.
Nee mapari rara manggita tona noasele katuvuna,
anu nompaelo ante pebagiu.
8 Nee marau bo mapane raramu,
nee mapari raramu,
haitu aga mompakasesa iko.
9 Sabana tona nokainggu nadaa kana rapakaropu,
tapi tona nanjarumaka TUPU,
rakaboli tana nijanjiNa.
10 Apa tona nadaa domo masae malipomo,
nau raelo ira domo rakava.
11 Tapi tona naede rarana rakaboli ntana nijanjiNa haitu,
bo mombarasai kasana mpelabi-labi.
12 Tona nadaa nonia nadaa ka tona nabelo,
bo navuu matana nopeinta tona nabelo.
13 Tapi TUPU nompongirika tona nadaa,
sabana nisaniNa kaupu nggatuvu ntona haitu domo masae.
14 Tona nadaa nombaosu taono bo mepana
mompatesi tona napakasi bo nasusa,
mompepate tona natuvu nanoa.
15 Tapi tona nadaa matetosu nte taonona mboto,
bo panara rakotosi.
16 Noalipa mbara-mbara sakide naria nte tona nabelo
pade kakalumana nadea naria nte tona nadaa.
17 Sabana karoso ntona nadaa kana ralelusi nTUPU,
tapi tona nabelo rajagaiNa.
18 TUPU mombajagai njuu katuvu ntopomparasaya,
bo ngata nidekeiNa ka ira raponturora sampe ri kasae-saena.
19 Ri tempo kasusa topomparasaya ledo mandasa,
bo ri tempo maara mpai,
kandea rakandera mpelabi-labi.
20 Tapi tona nadaa kana maropu,
TUPU mombaropusi baliNa mpo bunga ri karava,
bo ira malipo mpo unu nu apu.
21 Tona nadaa neinda ledo nipopanjilina,
tapi tona nabelo nombadekei nte joi nu rarana.
22 Tona nipoporasi nTUPU kana manggava tana nijanjiNa haitu,
tapi tona nipindasiNa kana raropusi.
23 TUPU nanggeniaka tona
anu nipokono nTUPU dala nggatuvuna.
24 Ane madungga ia ledo matudu ri tana,
sabana TUPU mombatande ia.
25 Dako ri kakodikume sampe natua,
dopa naria nikitaku tona nabelo nipalaisi nTUPU,
bara muli-mulina najadi toperapi-rapi.
26 Ia nasaro nompopaindaka bo nombadekei anu naria nte ia ka tona,
bo mulina najadi rasi ka ia.
27 Kabasakamo anu nadaa bo poviamo anu nabelo,
ala iko moroo ri tana nijanji nTupu sampe kasae-saena.
28 Sabana TUPU nompokono pokainggu nabelo bo nanoa,
tona natutu neose nte Ia ledo nipalambaNa.
Ia nombajagai ira sampe ri kasae-saena.
Tapi muli ntona nadaa kana raropusi.
29 Tona nomparasaya kana rakaboli ntana nijanji nTupu,
bo maroo hamai sampe ri kasae-saena.
30 Tona nabelo notesa ante noto mpekiri,
bo ia nanguli tesa-tesa nanoa.
31 Parenta nu Alatala niboliakana riara ntaina,
bo ledo ria niliunakana.
32 Tona nadaa nompomata-mata tona nabelo
bo mangelo loga mompatesi tona nabelo.
33 Tapi TUPU ledo nompalamba tona nabelo manavu rampale nu balina,
bo ledo mompalamba ia rapakasala ntona riara mpotangara.
34 Sarumakamo TUPU bo oseakamo parentaNa.
Jadi rapelisiNa iko rakaboli tana nijanjiNa
bo mukita tona nadaa raropusi.
35 Yaku nompeinta tona nadaa notesa ante langa rarana;
ia mpo kayu naroso bo nandala kalena.
36 Tapi tempo yaku noliu vai ri sia,
domo naria ia,
nau nieloku,
domo nikavaku.
37 Parantaikamo tona nokainggu nanoa bo tona mpuu-mpuu rarana;
apa tona nompokono posinggabelo masana katuvuna eo nggapurina.
38 Tapi tona nadosa kana raropusi;
katuvura ledo masana ri eo nggapurina.
39 TUPU mompakasalama tona nomparasaya,
bo Ia najadi petalendura ri tempo nggasusa.
40 TUPU mombatulungi bo mombakabasaka ira,
bo mompakasalama ira dako ri tona nadaa,
sabana ira netalendu nte Ia.