Ester
I Wasti nosapuaka parenta bereina Magau Ahasyweros
1
1-2 Nggaulu Magau Ahasyweros, nonturo ri ngata mbaso Susan nomparenta kamagaua Persia. Ri kamagaua haitu naria saatu ropulu bo papitu (127) propinsi niparentana, nompamula dako ri tana India sampe ri tana Etiopia.3 Ri mpae katataluna Magau Ahasyweros nomparenta, ia novia posusa mbaso ka pura-pura tomaoge bo topokarajaa ri banua kamagauana. Tadulako dako ri Persia bo Media nakavamo ri posusa haitu, ivesia muni gubernur bo tomaoge dako ri ngata ntanina. 4 Ono mbula kasaena magau nompopakita kakalumanana, karosona, bo kagaya nu kamagauana.
5 Naliutaka posusa haitu, nipovia magau vai posusa ka pura-pura tona ri Bente Susan, ka tomaoge bo ka tona biasa. Posusa haitu saminggu kasaena nipovia ri banua kamagaua. 6 Ri doyata nu banua kamagaua nirambaki ante kae linen nagavu bo naputi, nipou nte kaloro linen nalusu, bo nisoda ri ponto-ponto salaka anu nipataka ri tinja vatu pualam. Jaula nirambaki vatu puti, vatu lei, kuli mutiara anu nenggila, bo vatu pirus nagavu. Ri bavo jaula haitu nidika ponturo-ponturo anu nipovia dako ri bulava bo salaka.
7 Magau nompasadia anggur mpelabi-labi kaogena ri mpengaya-ngaya tubu bulava. 8 Magau nombadekei parenta ka tomaoge ri banua kamagaua, ala isema-sema torata ratande nangoseaka anu pompokonona. Torata namala manginu nangoseaka dotana mboto, ledo muni nibarusu manginu. 9 Tempo haitu i Wasti berei magau, novia posusa muni ka mombine ri banua kamagauana.
10 Eo kapapituna, nadamba ntotomo magau sabana saminggu da nanginu anggur njuu. Sabana haitu nipokiona papitu tomaoge anu nitaniaka majadi potuduanaa; haitumo i Mehuman, i Bizta, i Harbona, i Bigta, i Abagta, i Zetar bo i Karkas. 11 Nituduna ira hau mangala bereina bo rapakeka songgo kamagaua. Berei nu magau haitu nagaya mpuu bo magau madota mompopakita kagaya nu bereina ka tomaoge bo pura-pura toratana. 12 Tapi tempo batua gahaitu nanguli parenta nu magau ka bereina, bereina ledo nadota hau, sampe narau mpuu rara magau.
13 Magau biasana nerapi panggava nte tona anu nangisani atura ada bo atura huku. Sabana haitu nirondena ira ala rasani nuapa rapovia ri parakara ivehaitu.
14 Topodekei panggava anu nasaro ntoto nirondena, haitumo: i Karsena, i Setar, i Admata, i Tarsis, i Meres, i Marsena, bo i Memukan. Ira haitu tomaoge ntoPersia bo Media. Ira nalanga ntoto nturona ri kamagaua bo namala mantingayo magau. 15 Nangulimo magau ka ira papitu haitu, “Nitudukumo batuaku hau noronde bereiku i Wasti tumai nte yaku. Tapi i Wasti ledo nadota tumai. Nangoseaka huku kamagaua, nuapa rapoviata ka ia?”
16 Jadi nangulimo i Memukan ka magau bo tomaoge ntanina, “Pokainggu ivehaitu ledo aga magau nipakaeya i Wasti, tapi pura-pura timali nu magau, bo pura-pura langgai ri kamagaua hitu! 17 Apa natantumo pokainggu berei nu magau haitu rasani nu pura-pura mombine, bo rabanjereniramo bereira langgai. Apa raulira magau nomparenta bereina i Wasti makava mantingayo ia, tapi ledo nadota ia nakava.
18 Jadi, ane raepe berei ntomaoge Persia bo Media anu haitu, tantu masalisamo raulikara bereira. Jadipa raevaramo parenta bereira langgai bo langgai mompokarau bereira.
19 Ane rapodota i pua, aginamo rabotusi, domo mamala i Wasti mantingayo magau. Bo kabotu haitu kana rapajadi atura Persia bo Media anu ledo mamala rabaliki. Maupu haitu dekei nturo i Wasti ka mombine ntaninamo anu nabelopa pade ia.
20 Ane kabotu nu magau haitu rapatolele ri njumangu kamagaua naluo hitu, pura-pura berei mombine mombabila bereina langgai nau tomaoge bara tona biasa.”