I Daud nantudu moreke kadea ntoIsrael
24
TUPU narau vaia ka toIsrael. Ia nompasusu i Daud ala todea ngata Israel masusab. TUPU nanguli, “Tulisimo sanga ntona ri Israel bo Yehuda.”2 Pade nangulimo i Daud ka i Yoab tadulako tantarana bo ka pakeni-pakeni tantarana, “Koimo mosanggani nte tantara-tantaramu, hau nte pura-pura valaa ntoIsrael, ri njumangu ngata dako ri ngata Dan ri tasina sampe ngata Bersyeba ri puluna, mombatulisi sangara. Yaku madota mangisani sakuya kadeana ira.”
3 I Yoab nanguli ka magau, “Pua, damo TUPU Alatala nisombamiu mombatambai todea Israel majadi saatu ngganipa kadeana sii-sii. Kambou komiu da matuvu bo rakitamiu mboto. Tapi nuapa patujumiu motulisi sangara bo mangisani kadeana irac?” 4 Tapi magau ledo nangepe tesa i Yoab bo tadulako. Jadipa i Yoab bo pura-pura tadulako haumo mombareke todea Israel.
5 Naliupa ira nombavote binangga Yordan, i Yoab ante tantarana notenda ri ngata Aroer, sangu ngata ri tatanga nu lembana ri bagia Gat. Dako rahaitu ira hau ri ngata Yaezer bagia mpandake 6 pade napola hau ri bagia Gilead bo ngata Kades ri bagia ngata toHet. Naupu haitu hau ri ngata Dan, pade dako ri Dan negoli hau ri mpanauna, hau ri ngata Sidon. 7 Dako rahaitu ira hau ri bagia puluna, hau ri ngata Tirus ngata mbaso anu notembo. Kapolana haitu ira hau ri ngata toHewi bo toKanaan, kaupuna hau ri ngata Bersyeba, ri bagia puluna tana Yehuda. 8 Siombula bo ropulu eo kasaena ira nompesayo njumangu ngata. Naupu haitu nanjilimo ira hau ri Yerusalem, 9 bo nanguli asele potulisira sanga haitu. Langgai anu mamalamo rapopesua majadi tantara valuatu njobu (800.000) ri Israel bo ri Yehuda limaatu njobu (500.000) kadeana.
10 Tapi naupupa i Daud noreke todeana haitu, nanjoso rarana bo nirasaina nasalamo, pade nanguli ia ka TUPU, “O PUE, yaku nadosa ntotomo! Ampungimo yaku, sabana yaku eva tona nambongo novia ivehitu.”
11-12 Nangulimo TUPU ka i Nabi Gad, anu najadi topompapola tesa nTUPU ka i Daud, “Koimo, bo ulikamo ka i Daud, Yaku mombadekei tatalu pompelisi ka ia. Nuapapa rapelisina kana Kupadupa.” Kamailena, tempo i Daud nembangu naturu, 13 Nabi Gad nakava nte i Daud nanguli parenta nTUPU haitu, niulina, “Pua, umba rapelisimiu: ngata hitu rakava ara mpai talu mpae kasaena, bara komiu madota raraga-raga nu bali talu mbula kasaena, bara ngata hitu rakakava nu dua talu eo kasaena? Pekirimo bo timbamo hitu-hitu nuapa kupesanaka TUPU anu nombatudu yaku.”
14 Nesana i Daud, “Nasusa mpuu raraku, nemo kita rahuku nu manusia, aginapa kita rahuku nTUPU sabana nambaso pepotoveNa.”
15 Jadi nipakakava nTUPUmo dua ka toIsrael nompamula dako mpadondona sampe ri tempo nipakatantuNa, ri njumangu Israel dako ri ngata Dan ri bagia tasina sampe ri ngata Bersyeba ri puluna, pitupulu njobu (70.000) kadeana tona namate. 16 Malaeka nitudu nTUPU anu nanggeni dua haitu nakavamo ri poini gando i Arauna toYebus. TUPU nanggita Malaeka anu nanggeni dua haitu nasadiamo mompakaropu ngata Yerusalem, TUPU nombabali pobotusiNa bo Ia nenonto mombahuku todea ri ngata haitu. Nangulimo Ia ka Malaeka haitu, “Naganamo! Petaamo!”
17 Malaeka haitu nikita i Daud da ranja nompatesi todea, pade nangulimo i Daud ka TUPU, “Yakumo hii nadosa, sabana yaku novia sala hitu. Tapi nuapa sala ntodea nu ngata hitu? Aginamo yaku bo sampesuvuku rahuku!”
Lanta pesomba nipopeangga napara Yerusalem
18 Ri eo haitu muni Nabi Gad nakava nte i Daud bo nanguli ka ia, “Pua, komiu kana hau ri poini gando i Arauna bo mombasunju vatu rapovia lanta pesomba rapodekei pesomba ka TUPU.”
19 Nanggalivomo i Daud, bo niturusina parenta nTUPU anu niuli i Nabi Gad ka ia.
20 Tempo haitu eva nisuka, i Arauna nompetiro hau riambena, nikanotona magau ante tomaogena nakava tumai nte ia. Nantaputumo ia ri ngayo i Daud 21 bo nekutana, “Pua, nuapa patujumiu nakava tumai?”
Nesana i Daud, “Yaku nakava mangali tana ri poini gando hitu bo mompopeangga lanta nipovia dako ri vatu rapodekei pesomba ka TUPU ri sii rahitu, ala menonto dua nanggava todea.”
22 Nangulimo i Arauna, “Alamo, pua, bo dekeimo pesomba ka TUPU, nangoseaka bara nuapa nirasaimiu nabelo. Hitu japi rasambale rapalabu majadi pedekei pesomba. Komiu mamala mangala pasanga bo dopi-dopi nipake noini gando, rapake mompalabu pesomba haitu.” 23 I Arauna nombadekei pura-pura haitu ka magau bo nanguli, “Pua, kambou TUPU Alatala anu nisombamiu mantarima pesomba anu nidekeimiu.”
24 Tapi nesana magau, “Nemo! Kana kuali. Ledo yaku madota mombadekei pesomba ka TUPU Alatala ante anu kukava nggoo-nggoo.” Pade niali i Daudmo tana poini gando bo japi-japi haitu, alina limapulu mpeka doi salaka. 25 Nipopeangga i Daudmo lanta nipovia dako ri vatu rapodekei pesomba ka TUPU, pesomba rapalabu ante pesomba posinggabelo. TUPU nangepe anu niperapi i Daud bo dua haitu nenontomo ri Israel.