1 Samuel
Pompoanaka i Samuel
1
Naria saito langgai toEfraim dako ri ngata Rama anosanga i Elkana,
dako ri bagia bulu Efraim.
I Elkana ana i Yeroham,
tupu i Elihu,
tupu karontapi i Tohu,
tupu i Zuf kataluntapina.
2 I Elkana noberei randua,
i Hana bo i Penina.
I Penina noana,
tapi i Hana ledo noana.
3 Mpae-mpaeb i Elkana nanggalivo lako ri ngata Rama hau metupu ri ngata Siloc bo nombadekei pesomba ka TUPU anu nompajadi dunia bo isina.
Tona najadi topanggeni pesomba ri Silo iamo i Hofni bo i Pinehas,
ana-ana i Eli.
4 Nggani-nggani i Elkana nombadekei pesomba,
nidekeikana simbo sabagia bau pesombad haitu ka i Penina bo pura-pura anana.
5 Tapi i Hana nidekeikana sangu bagia tobelona sabanae nipotovena mpuu naupa TUPU ledo nombadekei ngana ka ia.
6 I Penina nasaro nompakadua rara i Hana maruena ala magigi rarana,
sabana Tupu ledo nombadekei muli ka i Hana.
7 Mpae-mpae aga ivesiamo.
Ane ira hau ri Banua nTUPU,
kana nipakadua i Penina rara i Hana.
Nadeamo ngganina i Hana notumangi nisalai bo domo nadota ia nangande.
8 Nggani-nggani i Elkana nompekutana bereina,
“Hana,
nakuya iko notumangi bo ledo nadota nangande?
Nakuya nabuku raramu?
Apa ledo noalipa yaku ri matamu pade sapulu ngana langgai?”
9 Naria saeo naupu ira nangande bo nanginu ri Banua nTUPU ri ngata Silo,
neanggamo i Hana hau mosambaya.
Tempo haitu muni i Eli balengga ntopanggeni pesomba naria ri sia.
Ia nonturo ri gadera napara vamba pesua ri Banua nTUPU bo nikitana i Hana nosambaya.
10 Nabuku mpuu rara i Hana nosambaya.
Ia nosambaya nte tangi natesumonde-monde.
11 Naliu haitu i Hana nojanji nte TUPU Alatala,
niulina,
“O PUE,
anu nompajadi dunia bo isina.
Parantaikamo yaku,
batuaMiu hitu!
Peintamo susa nu raraku.
Toramo yaku bo nemo rakalingasi!
Ane radekeiMiu ka yaku saito ngana langgai,
yaku mojanji kudekei ka Komiu ia sampe ri kaupu nggatuvuna.
Bo yaku muni mojanji buluana ledo ria sanggania ralompof.”
12 Nasae mpuu i Hana nosambaya,
bo i Eli nompeinta via nu bivi i Hana.
13 I Hana nosambaya riara ntai aga bivina novia-via,
tapi suarana ledo niepe.
Sabana haitu nisarumaka i Eli ia nalangu.
14 Bo nangulimo i Eli,
“Berimba iko bo nalangu ri sii?
Tumo rainu hanupa anggur!”
15 Tapi nesana i Hana,
“Ledo ivesia,
pua.
Yaku ledo nalangu,
ledo ntoto naria yaku nanginu anggur bara panginu anu mepakalangu!
Nasusa mpuu raraku,
yaku nosambaya nanguli vua mpekiriku ka TUPU.
16 Nemo ingguku nosambaya ivehitu raulimiu yaku mombine nadaa.
Yaku nosambaya ivehitu sabana nabuku mpuu raraku.”
17 Pade nanguli i Eli,
“Ane ivesia panjilimo.
Perapi doa iko masalama ri dala.
Damo Alatala anu nisombata toIsrael,
mombadekei anu niperapimu nte Ia.”
18 Nesana i Hana,
“Kambou maasi matamiu manggita yaku.”
Naupu haitu nanjilimo ia bo nadotamo ia nangande,
domo nabuku rarana.
19 Kamailena nasadondo ira nembangu bo nombasomba TUPU.
Naliu haitu nanjilimo ira hau ri banuara ri Rama.
Pade nosampaturumo i Elkana bo bereina i Hana,
bo TUPU nompoiyo posambaya i Hana.
20 Sampae naliu haitu i Hana noanaka saito ngana langgai.
Nipoposangana ngana haitu i Samuel [batuana,
“ngana nidekei nu Alatala”] bo niulina,
“Ngana hitu niperapiku lako nte TUPU.”
21 Nakavamo tempona i Elkana sambanua hau ri ngata Silo manggeni binata rasambale rapesomba ka TUPU,
evamo kabiasara mpae-mpae.
I Elkana nanggeni muni pesomba ntanina anu nijanjina ka TUPU.
22 Tapi tempo haitu i Hana ledo netuntuni.
Niulikana bereina,
“Ane i Samuel domo metomi,
pade kukeni ia hau ri banua nTUPU,
bo monturo hamai sampe ri kaupu nggatuvuna.”
23 Nesana i Elkana,
“Nabelomo,
poviamo anu nipekirimu mabelo;
karoomo ri banua sampe manggava tempona anata domo metomi.
Kambou rapakadupa nTUPU janjimu.”
Jadi i Hana naroo ri banua sampe anana domo netomi.
24 Domopa netomi i Samuel,
nikeni ntinanamo ia hau ri banua nTUPU ri Silo.
Tempo haitu ia da nakodi ntoto.
I Hana nanggeni sangu japi tuama da noumuru talu mpae,
gando sapulu kilo,
bo sangu kanto kuli uve anggur.
25 Naupupa japi haitu nisambale,
nikenimo i Samuel hau nte i Eli.
26 I Hana nanguli ka i Eli,
“Merapi ampu yaku,
pua.
Da nitoramiu yaku?
Yakumo hii mombine nipeintamiu neangga ri sii,
tempo nosambaya nerapi nte TUPU.
27 Ngana hitumo hii niperapiku dako nte TUPU.
NipoiyoNamo sambayaku.
28 Bo haitumo sabana ngana hitu kudekei ka TUPU sampe ri kaupu nggatuvuna.”
Naupu haitu nantaputumo ira nombasomba TUPU.