2 Samuel
I Daud nangepe kareba, i Saul namatemo
1
Namatepa i Saul, nanjilimo i Daud dako ri posieva nombadagi toAmalek bo nonturo ri ngata Ziklag roeo kasaena. 2 Kamailena nakavamo saito tantara i Saul [anu nabuku rarana]. Nabite-bitemo pakeana bo naria tana nidikana ri balenggana, tanda kabuku nu rarana. Ia nakava nantaputu ri ngayo i Daud. 3 Nekutanamo i Daud, “Dako ri umba iko?”Nesana ia, “Yaku namala nalai dako ri posieva nte toFilistin.”
4 Nekutana vai i Daud, “Nuapa najadi? Tesamo ka yaku.”
Nesana tantara haitu, “Tantara kami nalaimo dako riara mposieva, nadea tantara namate, i Saul bo i Yonatan namate muni.”
5 Nekutana vai i Daud, “Berimba sampe nisanimu?”
6 Nesana ia, “Yaku hamai ri Bulu Gilboa. Nikitaku i Saul netidanda ri tavalana, bo kareta-kareta nu bali ante tantara-tantara nojara naparamo mepatiku. 7 I Saul neili nikitana yaku bo nirondena. Nesana yaku, ‘Nuapa, pua?’
8 Nekutana ia, ‘Isema iko?’
Bo niuliku ka ia, ‘Yaku toAmalek.’
9 Pade nanguli ia ka yaku, ‘Kamai patesimo yaku! Nandasa mpuu niepeku. Naoge belaku.’
10 Jadi yaku nanggaparai ia, bo nipatesikumo, sabana nisaniku, ane madungga ia domo rapakulena meangga, tantu mamate muni ia. Pade nialasiku songgo bulava ri balenggana bo ponto ri kabosuna, bo nikeniku tumai ka komiu, pua.”
11 Nangepe kareba haitu nabuku mpuu rara i Daud sampe nibitesina bajuna mboto, tanda nggabuku rarana. Ivesia muni nipovia ntona nikeniaka i Daud. 12 Ira nodadeka dade kasusa rara sampe nasolo eo, nombatangisi bo nopuasa nantora i Saul, i Yonatan, bo todea Israel, todea nTUPU, sabana nadea mpuu ira namate riara mposieva haitu.
13 Naupu haitu i Daud nompekutana tantara anu nanggeni kareba haitu, “Tonuapa iko?”
Nesana ia, “Yaku hii toAmalek, topanjayo anu naroo ri ngatamiu.”
14 Nanguli i Daud, “Nabia mpuu iko nompatesi magau nipelisi nTUPU!” 15 Pade nirondena saito tona nikeniakana bo niulikana, “Patesimo toAmalek tutu!” Bo nitimbe ntona haitu mpuumo toAmalek sampe namate. 16 Nangulimo i Daud ka toAmalek haitu, “Iko mboto nombahuku mate karomu apa nipangakumu, ikomo nompatesi magau nipelisi nTUPU!”
Dade i Daud nantangisi i Saul bo i Yonatan
17 Naupu haitu i Daud nodadeka dade kasusa rara nantora i Saul bo i Yonatan. 18 Ia nantudu ala dade haitu rapatuduki ka todea Yehuda. (Dade haitu nitulisi riara Buku Yazar.)
19 “O toIsrael, hamai ri bulu-bulumiu
namatemo ranga tadulako-tadulakomiu, tomalanggai nu ngatamiu.
Ira namate nombajagai kagaya ngatamiu.
20 Nemo rapopaepeka toGat kareba hitu,
kambou nemo matolele ri dala-dala ri ngata Askelona,
ala nemo madamba rara mombine-mombine toFilistin
bo ala nemo mombine anu ledo nangoseaka Alatala manggati madamba.
21 Kambou bulu-bulu Gilboa domo radunggusi nu uda bo domo rabanggasi nu leni!
Kambou mangau nggede talua bo karavamiu.
Sabana hamai kaboli nu kaliavo tadulako
bo kaliavo i Saul natagaramo, domo nilanai.
22 Pana i Yonatan nabisa, nepakamate.
Guma i Saul ledo nisanina napakasi, nompatesi bo nompakaropu bali.
23 I Saul bo i Yonatan nipokono bo nipotove.
Batena nosangu rara riara nggatuvu bo riara nggamate.
Ira nagasipa pade tonji love,
narosopa pade singa.
24 O ranga, mombine ntoIsrael! Tangisimo Magau Saul!
Apa ia norambaki komiu ante pakea nalei anu noali.
Ia nombarambaki komiu ante bulava nagaya.
25 Namatemo tadulako-tadulako
riara mposieva.
Ri bulu nalino
kadungga i Yonatan namate nipatesi.
26 O ranga Yonatan, sampesuvuku! Nabuku mpuu raraku,
sabana noali mpuu iko ri mataku.
Nambaso mpuu tovemu ka yaku,
nelabipa pade tove nu mombine.
27 Namatemo tadulako ntodea.
Domo ria gunana pareva mposievara!”