I Saul bo ana-anana langgai namate
31
Tempo haitu toFilistin da nosieva nte toIsrael bo toIsrael nidagi.
Ira nalai hau ri bulu Gilboa bo nadea ira namate ri sia.
I Saul ntaliana nalai muni.
2 Tapi ira niraga ntoFilistin njuu bo tatalu ana i Saul namate muni.
Ana-ana i Saul anu namate haitu iamo i Yonatan,
i Abinadab,
bo i Malkisua.
3 Posievara haitu najadi-jadi mpuu,
bo i Saul nambela nipana.
Bela i Saul anu nipana haitu mpuu-mpuu nipondasana.
4 Pade nangulimo i Saul ka topanggeni pareva mposievana,
“Osumo gumamu bo tosumo yaku,
ala nemo yaku rapongei-ngeika bo rapatesi ntona anu ledo nomparasaya TUPU.”
Tapi topanggeni pareva mposievana haitu ledo nadota nombatosu ia,
sabana ia mpuu-mpuu naeka.
Sabana haitu niala i Saul gumana bo nipatesinamo karona mboto.
5 Nipeintapa ntopanggeni pareva mposieva haitu i Saul namatemo,
bo nipatesina munimo karona.
Ia namate ri sinjori i Saul.
6 Jadi i Saul ante tatalu anana,
topanggeni pareva mposievana,
bo tantara-tantarana namate ri eo saeo haitu.
7 Niepepa ntoIsrael anu nonturo ri sambote Lemba Yizreel bo ri sabingga mpandake Binangga Yordan tantara Israel nalaimo,
bo i Saul ante ana-anana namate munimo,
nipalaikaramo ngatara.
Pade toFilistinmo nonturoka ngata-ngata haitu.
8 Kamailekana toFilistin nakava mangalasi pareva mposieva ntona anu namate ri posieva haitu,
nikavara i Saul ante ana-anana namate ri Bulu Gilboa.
9 Nitampara tambolo i Saul nialasira pareva-pareva mposievana bo baju mposievana.
Nitudura suro manguli kareba belo haitu ka todea ri njumangu ngata Filistin bo ka todea ri banua pombasombara viatara.
10 Baju mposieva i Saul nibolira riara banua pombasombara Dewi Asytoret,
bo karobata i Saul nipakura ri tembo nu ngata Bet-Sean.
11 Niepepa ntoYabesh ri tana Gilead anu nipovia ntoFilistin ka i Saul,
12 nasadia bo neanggatakamo tona-tona anu nabia dako rahaitu nolipa njambongi-mbongi hau ri ngata Bet-Sean.
Mboa i Saul bo mboa nu ana-anana nitaurakara dako ri tembo ngata haitu pade nikenira hau ri ngata Yabesh,
bo nipalabura.
13 Avu buku-bukura nipasiromu pura bo nitana ri puna kayu tamariska ri ngata haitu.
Naupu haitu nopuasamo ira pitu eo kasaena.