Nosieva ante toAmalek
30
1-5 Tempo i Daud bo todeana nakava ri ngata Ziklag,
ri eo katataluna,
nikavara toAmalek nombasuu sabingga puluna bagia Yehuda bo ngata Ziklag.
Ledoria saitoa tona nipatesira.
Tapi ngata haitu nitunjusira pakaupu pade nipapolara vai polipara bo nanggenisi mombine,
ngana,
bo tona ntanina.
Berei i Daud ante anana bo berei ntodea i Daud ante ana-anara nitavanira pura.
Berei i Daud anu nitavanira iamo i Ahinoam bo i Abigail.
Nabuku mpuu rara i Daud bo todeana sampe ira namangga notumangi sampe domo nasova.
6 Nasusa mpuu rara ntodea i Daud sabana berei bo anara domo ria.
Sabana haitu ira madota mombarempe i Daud ante vatu.
I Daud mpuu-mpuu nasusa,
tapi TUPU Alatala nompakaroso rarana.
7 I Daud nanguli ka i Abyatar ana i Ahimelekh balengga ntopanggeni pesomba,
“Kenimo baju efoda tutu tumai!”
Bo nikeni i Abyatar ka iamo baju efod haitu.
8 Pade nipekutana i Daudmo TUPU,
“Kana hau kuraga toAmalek nombasuu ngata kami?
Da kukava ngena ira?”
Nesana TUPU,
“Iyo,
ragamo,
da mukava ira bo pakasalama tona nitavanira.”
9-10 Pade neanggatakamo i Daud ante onoatu todeana.
Tempo ira nakava ri Binangga Besor,
i Daud nompapola polipana ante pataatu todeana,
bo todeana roatu naboli ri binangga haitu.
Ira domo napola sabana nalenge gagamo bo domo nipakulera nevote.
11 Riara mpolipa todea i Daud,
niposintomukara saito ngana langgai toMesir ri karava,
bo nikenira ka i Daud.
Ngana haitu nipainu bo nipakande,
12 bo nidekeikara muni vua ara anu nipakangau,
bo rompaa anggur ngau.
Naupupa ia nangande,
naranggaamo bukuna,
bo tano mai talu mbongimo ia ledo nanginu bo ledo nangande!
13 Pade nipekutana i Daud ia,
“Batua isema iko,
bo iko dako riumba?”
Nesana ngana haitu,
“Yaku toMesir,
batua ntoAmalek.
Talu mbongimo yaku nipalaisina sabana yaku nadua.
14 Kami nombasuu karava bai Negeb tana niponturo ntoKreti bo bagia ngata Yehuda sabingga puluna.
Nisuu kami muni karava bai Negeb tana niponturo muli i Kaleb bo ngata Ziklag naupu nitunjusi kami.”
15 Pade nipekutana i Daud vai ia,
“Madota iko manggeni yaku hau nte topesuu gahaitu?”
Nesana ngana haitu,
“Madota yaku,
tapi i pua mojanji ante sanga nTupu nisomba i pua,
yaku ledo rapatesi bara radekei i pua ka tona nompobatua yaku.”
16 Pade nikeninamo i Daud bo todeana hau nte topesuu gahaitu.
Topesuu notani-tani ri bagia haitu,
ira nompesana nanginu bo nangande sabana nadea anu niagora dako ri ngata ntoFilistin bo toYehuda.
17 Kamaile mpadondona da sanggaeo mpisina,
nisuu i Daudmo ira,
bo ira nosieva sampe nabongi.
Aga pataatu topesuu gahaitu namala nalai nesavi unta.
Ntanina dako rahaitu ledoria saitoa namala nalai.
18 Pura-pura anu niago ntoAmalek niala i Daud mpanjili,
bo randua bereina nialana mpanjili muni.
19 Ledoria nalipo,
pura-pura ngana langgai,
mombine bo muni mbara-mbara niago ntoAmalek,
niala i Daud mpanjli.
20 Bimba,
tovau bo japi ntoAmalek niala i Daud muni.
Binata-binata haitu nipanuntu ntodea nigaarakara dako ri binatara mboto.
Nangulimo ira,
“Hitu asele peago i Daud!”
21 Naupu haitu i Daud bo todeana hau nanjili nte roara roatu pangane anu nalenge gagamo naboli ri Binangga Besor.
Nitomunakara i Daud bo pura-pura tona nosanggani nte ia.
I Daud nanggaparai ira bo nompekutana berimba karebara.
22 Tapi todea i Daud anu nombatuntuni ia,
naria muni nadaa.
Nangulimo ira,
“Tona gahaitu ledo netuntuni,
jadi ira ledo mamala manggava mbara-mbara anu niago.
Aga bereira bo anara mboto mamala raalara bo malaimo.”
23 Tapi nanguli i Daud,
“Sampesuvu-sampesuvuku,
nemo komiu ivetutu ante anu nidekei nTUPU ka kita!
Apa nisalikuNamo kita bo nidagitamo topesuu bo topeago anu nombasuu ngatata.
24 Jadi ledo ria saitoa mombasintuvui panggava ivehaitu!
Pura-pura kana manggava bo rabagi njimbayu:
tona anu naboli nojaga mbara-mbara kana masimbayu bagiana ante tona hau nosieva.”
25 Pade botu nisintuvuira haitu nipajadi i Daud atura,
bo hitu-hitu da nipake ri Israel.
I Daud nompakatu mbara-mbara ka pakeni-pakeni ngata ri tana Yehuda
26 Tempo i Daud nanjili ri ngata Ziklag,
nipakatuna sabagia mbara-mbara anu niago haitu ka pakeni-pakeni ngata ri tana Yehuda anu nosabinggaka ia.
Nangulimo ia,
“Hitumo pedekei ka komiu,
mbara-mbara anu niago kami dako nte tona anu nobali ka TUPU.”
27-31 Hitumo sanga ngata-ngata anu nipakatukana pedekei:
Betel bo Rama ri sabingga puluna tana Yehuda,
ngata Yatir,
Aroer,
Sifmot,
Estemoa,
Rakhal,
bo muni ngata-ngata ntoYerahmeel,
ntoKeni,
Horma,
Bor-Asan,
Atakh bo Hebron.
Pura-pura ngata haitu niponturo i Daud bo todeana baipia.