I Daud nitudu ntoFilistin manjili
29
Pura-pura tantara ntoFilistin nipasiromu ri ngata Afek,
bo toIsrael notenda napara ri mata nu uve ri Lembah Yizreel.
2 Alima magau Filistin ante tantara-tantarana nobaresi,
naria saatu santagu bo naria muni sanjobu santagu.
I Daud bo todeana nobaresi ri purina nosanggani ante Magau Akhis.
3 Tadulako-tadulako ntoFilistin nompeinta ira bo nanguli,
“Nakuya toIbrani gahaitu ri sii?”
Nesana i Akhis,
“Hitu i Daud,
topokarajaa ka Magau Saul ruru ri Israel.
Nasaemo ia nonturo nte yaku.
Dako ri kakavaname sampe eo hitu,
doparia ia novia sala.”
4 Tapi tadulako-tadulako ntoFilistin haitu narau ka i Akhis bo nanguli,
“Tudu tona tutu manjili hau ri ngata anu nidekeimu ka ia.
Ledo mamala ia mosieva mosanggani-nggani ante kita,
nemo-nemo ia aga majadi balita riara mposieva.
Apa vehitu tempo belo ka ia mompatesi todeata,
mangala rara i Saul magau anu nipokarjaakana nggaulu ri Israel.
5 Apa ledo ia hitu i Daud?
Iamo baipia nipolodi-lodika mombine,
nodade ivei,
‘I Saul nompatesi balina nonjobu-njobu,
tapi i Daud nopulu-pulu njobu.’ ”
6 I Daud nironde i Akhis bo niulikana,
“Ante sanga nTUPU anu Natuvu sampe ri kasae-saena,
niparasayaku iko natundu nte yaku.
Nasana raraku ane iko momporoa yaku riara mposieva hitu.
Sabana dako ri kakavamume ante yaku sampe eo hitu.
Tapi magau-magau ntanina haitu ledo nipokonona iko.
7 Sabana haitu panjilimo,
perapi doa iko ledo makuya-kuya ri dala,
bo nemo movia nuapa-nuapa anu mompakarau rara magau ntoFilistin.
8 Nesana i Daud,
“Sala nuapa nipoviaku,
pua?
Evamo anu niuli i pua,
ledoria sakidea yaku novia sala nte i pua,
dakome yaku nompamula nokarajaa ka i pua,
bo nakuya yaku ledo nidekei mosieva mangeva bali i pua?”
9 Nesana i Akhis,
“Nisanimumo iko nipokonoku mpo suro nu viata.
Tapi tadulako gahaitu nombabotusi iko ledo mamala mosieva mosanggani ante kami.
10 Haitumo sabana,
maile pura-pura komiu anu nompalaika i Saul bo nakava nte yaku,
kana masadondo membangu bo mebondapa eo,
palaimo.”
11 Kamaile mpadondona,
i Daud bo todeana neanggatakamo manjili hau ri ngata Filistin,
bo tantara Filistin neanggatamo hau ri lemba Yizreel.