I Saul ri ngata En-Dor
28
Tempo haitu toFilistin nompasiayu tantarana mosieva nte toIsrael,
bo i Akhis nanguli ka i Daud,
“Tantu nipahamumo iko ante todeamu mosieva mosabingga ka yaku.”
2 Nesana i Daud,
“Natantumo,
damo rapeinta i pua mboto ngena nuapa kupovia ka i pua.”
Nanguli vai i Akhis,
“Nabelomo.
Iko kuanggataka majadi topombajagai yaku sampe ri kaupu nggatuvuku.”
3 Dopame haitu,
i Samuel namatemo.
Pura-pura toIsrael nombatangisi ia bo mboana nitanara ri ngata Rama,
ri tanana mboto.
Topeboto bo toporonde malaeka ntomate,
nipopalai i Saul puramo dako ri ngata Israel.
4 Tempo tantara toFilistin nasiromu bo notenda napara ri ngata Sunem,
i Saul muni nompasiromu toIsraeli,
bo ira notenda ri bulu Gilboa.
5 Tempo i Saul nompeinta tantara toFilistin,
naeka mpuumo ia.
6 Nekutana i Saul nte TUPU [nuapa rapoviana],
tapi ia ledo nipesanaka nTUPU,
nau dako nte nabi,
bara ri pangipi.
Nau ia nompake vatu Urim bo Tumim,
[anu nipakera rapangisanira nuapa rapodota nTUPU],
ledo muni nipesanaka nTUPU ia.
7 Sabana haitu i Saul nangulika topombajagai ia,
“Elomo saito sando mombine toporonde malaeka ntomate,
yaku hau mekutana ante ia.”
Nesana ira,
“Ri ngata En-Dor naria saito sando ivehaitu.”
8 I Saul aga nompake baju biasa ala ia ledo rasani ntona.
Randua langgai nomporoa ia hau.
Ira nakava ri banua nu sando haitu bongina.
Bo nanguli i Saul ka sando haitu,
“Rondemo malaeka ntomate anu kuuli sangana,
bo perapimo ala raulina bara nuapa majadi.”
9 Nesana mombine haitu,
“Tantu nisanimumo,
pura-pura topeboto bo sando toporonde malaeka ntomate nipopalai i Saul dako ri Israel.
Nakuya mutoliani yaku ala yaku rapatesi?”
10 I Saul nosumpa,
bo nanguli,
“Ante sanga nTUPU anu Natuvu sampe ri kasae-saena,
yaku nojanji iko ledo rahuku sabana novia anu hitu.”
11 Nekutana mombine haitu,
“Malaeka isema ku ronde ka i pua?”
Nesana i Saul,
“Malaeka i Samuel.”
12 Tempo mombine haitu nompeinta i Samuel,
nongare ia bo niulikana i Saul,
“Nakuya i pua nombabagiu yaku?
I puamo tano Magau Saul!”
13 Nesana i Saul,
“Neemo maeka!
Ulimo nuapa nipeintamu!”
Nesana mombine haitu,
“Nipeintaku malaeka nesuvu dako ri lino.”
14 Nekutana i Saul,
“Berimba lenjena?”
Nesana ia,
“Saito langgai natuamo.
Ia nesuvu nompake baju ndoe.”
Bo nisani i Saulmo anu nesuvu haitu i Samuel,
pade nisombanamo.
15 Naliu haitu nangulimo malaeka i Samuel ka i Saul,
“Nakuya nibagomuka yaku?
Nakuya nirondemuka yaku?”
Nesana i Saul,
“Naipumo raraku sabana nisuu ntoFilistin,
bo Alatala domo nipeiliNa yaku.
Domo nipesanakaNa yaku,
nau damo hau nte nabi-nabi,
nau ri pangipi.
Haitu sabana nirondekuka iko,
ala iko manguli ka yaku nuapa kupovia.”
16 Pade nanguli vai malaeka i Samuel,
“Nuapa gunana murondeka yaku,
iapa TUPU domo nipeiliNa iko bo iko najadi baliNamo.
17 Evamo anu niuli nTUPU ka yaku ivesiamo rapoviaNa ka iko.
Ngata Israel niala nTUPUmo dako nte iko bo radekeiNa ka i Daud.a
18 Iko nangeva parenta nTUPU bo ledo nadota mombaropusi toAmalek bo pura-pura binatarab.
Haitumo sabana iko nipovia nTUPU ivetutu.
19 Iko nte toIsrael rapalamba nTUPU radagi ntoFilistin.
Maile iko ante ana-anamu mosinggani ante yaku,
bo muni tantara-tantara Israel rapalamba nTUPU radagi ntoFilistin.”
20 Tempo haitu muni i Saul nadungga kaododo ri tana,
sabana natekaja nangepe tesa malaeka i Samuel.
Bo ia muni naleomo,
sabana sambongi saeomo ledo nangande nuapa-nuapa.
21 Sando haitu nombakaparai i Saul bo nipeintana,
mpuu-mpuu naipu rara i Saul.
Sabana haitu nangulimo ia ka i Saul,
“Pua,
anu niperapimiu nipoviakumo bo ledo nipekiriku karoku mboto nau mate nitingayoku.
22 Jadi,
epe munimo perapiku hitu,
kana rakande pangande anu kupasiayu,
nau aga sakide,
ala i pua mamala vai mompapola polipa.”
23 Tapi nanguli i Saul,
“Ledo yaku mangande.”
Tapi topojagai ia bo mombine haitu nombabarusu,
bo nadotamo ia.
I Saul nembangu dako ri tana bo nonturo ri tambale.
24 Mombine haitu kapola-pola nosambale ana japina anu toboyana bo nialana muni gando,
nitangina bo nitununa najadi roti anu ledo noragi.
25 Naupu haitu nipasadianamo pangande ka i Saul nte topojagai ia,
bo nangandemo ira.
Bongi haitu muni ira nanjili.