I Daud nonturo ri tatanga ntoFilistin
27
Nipekiri i Daud,
“Nau damo berimba,
yaku kana rapatesi i Saul.
Jadi domo ria dala ntanina kupovia,
bo aga malai hau ri ngata ntoFilistin.
Aga ivesia yaku domo raelo i Saul ri Israel,
bo yaku matuvu matinonto.”
2 I Daud bo onoatu todeana kaliu-liu hau nte i Akhis ana i Maokh,
magau ngata Gat.
3 I Daud ante todeana naroomo ri ngata Gat,
ira simbo njamboko ntaliana.
Randua berei i Daud nikenina,
iamo i Ahinoam mombine dako ri ngata Yizreel,
bo i Abigail mombine dako ri ngata Karmel,
timbala i Nabal.
4 Niepepa i Saul i Daud nalaimo hau ri ngata Gat,
domo nipasimbukuna hau mombasaka i Daud.
5 I Daud nerapi nte i Akhis,
ivei,
“Ane masana rara i pua ante yaku,
dekeimo sangu ngata kodi kuponturo anu makavao dako ri ngata kamagaua hitu,
ala yaku domo monturo ante i pua ri ngata hitu.”
6 Pade nidekei i Akhismo ngata Ziklag ka i Daud.
Haitumo sabana nompamula dako rahaitu,
ngata Ziklag najadi bagia nu magau-magau Yehuda.
7 I Daud nonturo ri ngata Filistin sampae pata mbula kasaena.
8 Tempo haitu i Daud bo todeana nasaro hau nombasuu toGesur,
toGirzi,
bo toAmalek,
tupu nu ngata-ngata ri bagia haitu.
Ngata haitu nompamula dako ri bagia Telam hau ri bagia Sur sampe ri tana Mesir.
9 Nipatesira pura langgai bo mombine bo niagora muni bimba,
japi,
keledai,
unta,
bo pakea.
Naupu haitu ia,
pade hau nanjili nosinggavaka i Akhis.
10 Ane i Daud rapekutana i Akhis,
ivei:
“Dako riumba vai pesuumiu eo hitu?”
Ia manguli,
“Dako ri sabingga puluna ngata Yehuda bara dako ri ngata ntoYerahmeel bara dako ri ngata niponturo ntoKeni.”
11 Pura-pura tona ri ngata nisuura haitu nipatesira,
ala nemo maria ira dako ri ngata haitu hau ri ngata Gat mangadu ka i Akhis anu nipovia i Daud bo todeana.
Ivehaitu nipovia i Daud tempo ia nonturo ri ngata ntoFilistin.
12 Tapi niparasaya i Akhisimo tesa i Daud,
nipekirina,
“Ia nipovuu mata ntona ri ngatana mboto,
ia mamala kupajadi batua potuduaku sampe ri kaupu nggatuvuna.”