Karongganinamo i Daud ledo nadota mompatesi i Saul
26
Naria santempo toZif nakava ante i Saul ri ngata Gibea bo nanguli,
“I Daud netabuni ri Bulu Hakila ri karava bai Yehuda.”
2 Jadi i Saul ante talu njobu tantara ntoIsrael tobelona,
kapola-pola neanggataka mangelo i Daud ri karava bai Zif.
3 Ia ante tantarana notenda ri bivi nu dala ri bulu Hakila.
I Daud ri karava bai nangepe i Saul mantuntuni ia sampe ri karava bai haitu.
4 Pade nitudunamo tona hau mompomata-mata i Saul,
bo nisaninamo naria mpuu i Saul.
5 I Daud kapola-pola hau ri potenda i Saul bo nikavana i Saul naturu nosinjori nte i Abner ana i Ner,
tadulako tantarana.
Tenda nipaturu i Saul ri tatangana,
bo tantarana notenda nombalintiku tenda paturuna.
6 Pade nekutanamo i Daud nte i Ahimelekh toHet,
bo i Abisai tuei i Yoab (tinara nosanga i Zeruya),
“Isema mabia mesua mosinggani nte yaku hau ri potenda i Saul?”
Nesana i Abisai,
“Yaku.”
7 Bongi haitu muni i Daud bo i Abisai nesua ri potenda i Saul bo nikavara i Saul naturu bo namonjo ri tenda tatangana,
bo tavalana nipatindana ri tana ri sinjori balenggana.
I Abner nte tantarana naturu ri sinjori i Saul.
8 Nangulimo i Abisai ka i Daud,
“Bongi hitu nidekei nu Alatala ka ikomo balimu.
Dekeimo yaku mombasaku ia ante tavalana mboto melosa ri tana.
Ledo marombela ia kusaku bo mamate,
tapi aga sambela!”
9 Tapi nanguli i Daud,
“Nemo mukuya-kuya ia!
TUPU mombahuku tona mokainggu madaa ka magau anu nipelisiNa.
10 Ante sanga nTUPU anu Natuvu sampe ri kasae-saena,
nisaniku damo TUPU mboto mompatesi i Saul,
bara makavamo janjina,
bara mamate riara mposieva.
11 Kambou TUPU mombataamaka yaku ala ledo mompatesi magau anu nipelisiNa!
Raalatamo tavala bo boyo pade haumo kita!”
12 Tavala bo boyo haitu niala i Daud dako ri sinjori balengga i Saul pade nalaimo ira.
Ledoria saitoa nompeinta bara nangisanina,
bo ledo muni naria nembangu,
sabana ira nipakaluru nTUPU.
13 Nakavapa i Daud ri bulu sambotena,
neanggamo ia ri bavo nu bulu haitu ala makavao sakide dako nte ira.
14 Pade nongaremo i Daud ka i Abner bo tantara i Saul,
“Abner!
Niepemu suaraku?”
Nesana i Abner,
“Isema iko nongare-ngare ka magau?”
15 Nesana i Daud,
“Apa ledo ikomo tona anu nalanggai ri Israel?
Nakuya ledo nijagaimu magaumu?
Dako-dakopa tona nombasuaki potendamu madota mompatesi magaumu.
16 Ledo nabelo pokarajaamu,
Abner!
Ante sanga nTUPU anu Natuvu sampe ri kasae-saena,
pura-pura komiu masipato mamate,
sabana ledo nijagaimiu magau anu nipelisi nTUPU.
Peintamo!
Riumba tavala magau?
Riumbamo boyo ri sinjori balenggana pangane?”
17 Suara i Daud nisani i Saul bo nangulimo ia,
“Anaku Daud,
ikomo tutu?”
Nesana i Daud,
“Iyo,
pua.”
18 Nanguli vai i Daud,
“Nakuya i pua da nombaraga-ragapa yaku?
Nuapa salaku?
19 Pua,
epe ruru tesaku.
Rapana,
ane i pua nitudu nTUPU mangeva yaku,
mamala kupesombaka sangu pesomba rapalabu mompakaondo rau rara nTUPU nte yaku.
Tapi ane rapana,
aga manusia nombatudu i pua,
kambou ira rapindasi nTUPU!
Sabana ira nompopalai yaku dako ri tana nTUPU bo nitudura yaku hau ri ngata ntanina mombasomba tupu-tupu ntanina hamai.
20 Hitupa,
nemo rapalamba yaku mamate ri ngata ntona,
anu nakavao dako nte TUPU.
Nuapa gunana magau ntoIsrael makava mompatesi yaku,
tona ledo ria batuana?
Nuapa gunana ia mombaraga yaku eva tona nombaraga manu nggakayu?”
21 Nesana i Saul,
“Nadosamo yaku.
Panjilimo,
Daud,
anaku!
Domo kukuya iko sabana ledo nipatesimu yaku ri bongi.
Nadoyo mpuu yaku.
Yaku mpuu-mpuu nasalamo!”
22 Nanguli i Daud,
“Hitumo tavala i pua,
tudumo saito tantara i pua tumai mangalana.
23 TUPU mombadekei belo ka tona nanoa rarana bo natutu nangoseaka parenta nTUPU.
Naupa eo hitu TUPU nombadekei loga ka yaku mompatesi i pua,
tapi yaku ledo nadota mokainggu madaa ka i pua,
apa i pua magau anu nipelisi nTUPU.
24 Jadi,
kuperapi doa TUPU mompakasalama yaku nasimbayu eva yaku nompakasalama katuvu i pua eo hitu!
Perapi doa Ia mompakasalama yaku dako ri pura-pura kasusaku.”
25 Nangulimo i Saul ka i Daud,
“Anaku,
kambou TUPU mombadekei belo ka iko!
Nuapa-nuapa mupovia,
kana moasele.”
I Daud nompapola polipana bo i Saul nanjili hau ri banuanamo.